2 अक्टूबर - सरला शर्मा

 2 अक्टूबर -सरला शर्मा

***********

     आज के तारीख देश भर बर सुरता करे लाइक तारीख आय । हमर छत्तीसगढ़ अउ हम छत्तीसगढ़िया मन बर गरब गुमान के मौका आय ...काबर ???

महात्मा गांधी ...

*****  राष्ट्रपिता महात्मा गांधी के जनम तारीख आय । उन पहिली घवं दिसम्बर 1920 मं छत्तीसगढ़ आए रहिन । कंडेल नहर के विवाद सत्याग्रह के आधार मं सुलझाए रहिन धमतरी , कुरूद घलो गए रहिन । दूसर घवं नवम्बर 1963 मं फेर छत्तीसगढ़ आए रहिन ओ समय स्वराज कोष अउ तिलक कोष बर दान देहे के बात रखिन । 

रायपुर के वर्तमान गांधी चौक मं उन जनसभा ल सम्बोधित करे रहिन त इहां के किसान मन के मेहनत के तारीफ भी करे रहिन । 

    पंडित सुन्दर लाल शर्मा जेन कवि , स्वतंत्रता संग्राम सेनानी , जातीय सहिष्णुता के पुरखा आंय गांधी जी ल लेहे 2 दिसम्बर 1920 के दिन कलकत्ता गए रहिन , कंडेल ग्राम मं उंकर संगे मं रहिन आज हमन उनला छत्तीसगढ़ के गांधी कहिथन । 

     लाल बहादुर शास्त्री ...

     ******* 

इंकरो जनम 2 अक्टूबर के होए रहिस , इन देश के दूसर प्रधान मंत्री रहिन । सन 1965 के भारत पाकिस्तान युद्ध के समय देश के मनोबल बढ़ाईन ,सक्षम नेतृत्व के धनी रहिन । देश के रखवारी करइया अउ देश के अन्नदाता दूनों ल एकसमान सनमान दिहिन नारा दिहिन " जय जवान , जय किसान । " पहिली घवं माटी के मितान किसान ल राष्ट्रीय स्तर मं महत्व मिलिस । 

इनला बाद मं भारत रत्न के सम्मान मिलिस । 

   हमर छत्तीसगढ़ हर किसानगढ़ घलाय तो आय तभे तो एला धान के कटोरा कहे जाथे । आज इन 

 महान देशसेवक मन ला छत्तीसगढ़ अउ छत्तीसगढ़िया मन नमन करत हें । 

   सरला शर्मा