भारतीय जनता मा जागृति फैलाय बर सार्वजनिक गणेश परब के शुरूवात होइस

 भारतीय जनता मा जागृति फैलाय बर सार्वजनिक गणेश परब के शुरूवात होइस 

हमर सनातन संस्कृति मा बुद्धि के देवता गणेश जी के अब्बड़ महत्व हे।कोनो भी काम ला चालू करे ले पहली भगवान गणेश जी के पूजा करे जाथे। येकर ले कोनो भी कारज हा बने सिद्ध 

होथे अइसे आस्था के रुप मा रचे- बसे हे। यज्ञ,पूजन, बिहाव, गृह प्रवेश अउ आने आयोजन मा गणेश जी के पूजा करे जाथे।गणेश जी हा माता- पिता ला सबले बड़का धाम मानिस। अपन बुद्धि  ले मूसवा सवारी गणेश जी हा पिता भगवान महादेव जी अउ माता पार्वती के गोल- भांवर घूम के सुघ्घर आशीष पाइस ।पहिली पूजन के वरदान प्राप्त करिन। तब ले भगवान गणेश जी के पूजा कोनो काम करे ले पहिली जरूर करे जाथे।

        सार्वजनिक गणेश पूजा के शुरूवात 

  श्री गणेश जी के स्थापना हिंदू पंचाग के अनुसार भादो मास के शुक्ल पक्ष चतुर्थी के दिन करे जाथे। दस दिन भक्ति  के धार गांव -गांव शहर -शहर मा बोहाय ला लगथे। अनंत चतुर्दशी के दिन श्री गणेश जी के विसर्जन करे जाथे।दस दिन तक सनातनी मन भक्ति रुपी गंगा मा गोता लगाथे।

इतिहासकार मन के मानना हे कि हमर भारत वर्ष मा गणेश पूजा के  शुरुवात वीर शिवाजी हा अपन महतारी जीजा बाई के संग मिलके मुगल मन ले लड़े बर जनता मन ला संगठित करे के उद्देश्य ले करे रिहिन। छत्रपति शिवाजी महाराज के बाद गणेश महोत्सव के परंपरा ला मराठा साम्राज्य के आने पेशवा मन घलो जारी रखिन।बछर 1892 मा भाऊ साहब जावले हा पहली बार गणेश मूर्ति के स्थापना करिन।

       जब हमर देश मा अंग्रेजी शासन रिहिस ता बछर 1893 मा भारतीय राष्ट्रीय कांग्रेस के नेता लोकमान्य बालगंगाधर तिलक हा येला बड़का रूप मा महाराष्ट्र मा सुरुवात करिन। सार्वजनिक गणेश पूजा के उद्देश्य भारतीय जनता मा राष्ट्रीयता के भावना मा बढ़वार कर अंग्रेजी शासन ला इहां ले भगाना रिहिस। गणेश पूजा के माध्यम ले भारत के सभी जाति, धर्म के मनखे मन ला एक साझा मंच देय के उद्देश्य रिहिनी जिहां सब सकला के अपन विचार रख सके।

सार्वजनिक गणेश पूजा के बेरा मा वीर सावरकर, लोकमान्य तिलक अउ आने नेता मन अपन भाषण मा भारतीय जनता मा जागृति फैलाय के काम करिन। अंग्रेजी शासन के शोषण, अत्याचार अउ कतको गलत नीति के बारे मा बताके देश के आजादी बर लड़े बर प्रेरित करे गिस। गणेश पूजा के समय पढ़इया लइका मन देशभक्ति के नारा अउ अंग्रेजी शासन के विरुद्ध नारा लगाय। मराठा मन ला  छत्रपति शिवाजी कस विद्रोह करे बर प्रेरित करे जाय।

 तो ये प्रकार ले देखथन कि सार्वजनिक गणेश पूजा हा आजादी के लड़ाई के बेरा मा भारतीय जनता मा देशभक्ति के भावना ला बढ़वार करे, छुआछूत दूर करे, समाज ला संगठित करे के दिसा मा  सुघ्घर माध्यम बनिस। ये सार्वजनिक पूजा हा अंग्रेजी शासन बर जी के जंजाल बनगे अउ जनता मन बर देश के आजादी के लड़ाई बर माध्यम बन गे।  तिलक जी के उदिम ले पहिली गणेश पूजा परिवार तक सीमित रिहिन। गणेश परब के बेरा मा भाषण देवइया प्रमुख नेता मन मा वीर सावरकर, लोकमान्य बालगंगाधर तिलक, नेताजी सुभाष चंद्र बोस, बैरिस्टर जय कर,रेंगलर परांजये,पं. मदन मोहन मालवीय, मौलिक चंद्र शर्मा, बैरिस्टर चक्रवर्ती,दादा साहब खापर्डे अउ सरोजिनी नायडू के नांव शामिल हे।कवि गोविंद अपन कविता के माध्यम ले जनमानस मा छाप छोड़य।

डीजे संस्कृति अउ अश्लील गाना चिंतनीय 

    देश ला आजादी मिले के बाद कतको शहर मा आयोजन के बड़का स्वरूप जारी हे। गणेश परब बर प्रसिद्ध शहर मन मा मुंबई , पुणे, हैदराबाद, बेंगलुरु, अहमदाबाद, चेन्नई, नासिक, जयपुर, दिल्ली,गोवा, नागपुर,इंदौर, राजनांदगांव , रायपुर के संगे संग आने शहर मा गणेश पूजा के बड़का आयोजन देखे ला मिलथे।लोगन भक्ति भाव मा रम जाथे। भारतीय संस्कृति ले संबंधित बड़का आयोजन होथे।लोक सांस्कृतिक कार्यक्रम अउ कवि सम्मेलन के आयोजन के माध्यम ले जन समुदाय हा जुड़थे अउ सुनता के गांठी मा बंधे के संदेश देथे।समय के साथ येकर स्वरूप मा अब्बड़ बदलाव घलो होइस। दिखावा के चलते अड़बड़ खरचा करे जाथे। लोक संस्कृति के जगह डीजे संस्कृति हा मूल संस्कृति ला दबा के रख देथे। डीजे के कानफोड़ू अवाज हा पर्यावरण बर अउ मानव समाज बर खतरा होवत जात हे। आयोजन समिति मन ला चाही कि आयोजन मा अश्लील गाना ला झन बजाय। अपन संस्कृति   के बढ़वार बर काम करय।तभे गणेश पूजा के महत्ता हा कायम रहि। गणेश परब हा पारा, गांव,शहर प्रदेश अउ देश ला एकता के के सूत्र मा पिरोय के सुघ्घर काम करथे। जरूरत हे आधुनिकता के चकाचौंध मा घलो अपन मूल संस्कृति ला सहेज के रख सकन तभे सार्वजनिक गणेश पूजा हा सार्थक हो पाही।

        - ओमप्रकाश साहू अंकुर 

       सुरगी, राजनांदगांव

दाई ददा के मान करइया के पूजा होथय*

 *दाई ददा के मान करइया के पूजा होथय*

सावन ला भगवान भोले बाबा के महिना माने जाथे अइसने भादो ला गनेश जी के अउ कुंवार ला माता पार्वती के। भगवान गणेश भादो महिना मा 10-11दिन बर गांव-गांव शहर-शहर गली-गली घर-घर आथे। ये दस दिन मा गनेश महराज लम्बोदर महराज विघ्नहर्ता गजानन के जय जयकार होथे। हमर शास्त्र मा गनेश जी के नाना किसम के कथा हे ओहा गजानन कइसे बनिस ओला मूसवा सवारी कइसे मिलिस ओला रिद्धी सिद्धी कइसे मिलिस। गनेश के जनमेच के कथा बड़ बिचित्र हे मनखे जनम धरथे ता ओमा दाई अउ ददा दोनों के अंश होथय फेर गनेश के जनम मा अइसने नइ होय रहिस ओकर मा ददा के अंश नइ रहिस बेटा अउ ददा हा एक दूसर ला नइ चिन्हय दोनों ला एक दूसर के जानकारी नइ रहिस दाई पार्वती हा ओला बनइस अउ अपन शक्ति ले ओमा प्राण डारे रहिस अइसे गनेश के जनम होय रहिस। गनेश दाई ला जानय ता ओहा दाई के सबले बड़का भगत बनिस ओखर बर दाई के बात के रखवार बनके ददा ला घलो नइ घेपिस।

        गनेश के पहिली पूजा होय के कथा ले आज के लइका मन ला सीख मिलथे कि संसार मा उही मनखे के पूजा अउ मान गउन होथय जौन अपन दाई ददा के पूजा करथे ऊँखर हियाव करथे। श्रवण कुमार के कथा आज घलो सुने अउ सुनाय जाथे। कोनों भी मनखे ला संसार मा पूजाना हे अउ मान गउन पाना हे ता ओखर शुरुआत घर ले होथय।दाई ददा के अशीष जौन मनखे ला मिलिस ओहा संसार मा पूजनीय बन जाथे एखरे सेती मनखे ला दाई ददा के सेवा करव कहे जाथे। दाई ददा के अशीष हा बुद्धिमान बनाथे। जौन बुद्धिमान होथे ओखर पूजा होथे।बुद्धिमान बने के मंत्र महाभारत के कथा यक्ष युधिष्ठिर के गोठबात मा मिलथे जब यक्ष पूछथे कि युधिष्ठिर बुद्धिमान कोन होथे तब युधिष्ठिर कहिथे *वृद्धसेवोबुद्धिमानो भवति* माने जौन सियान मन के सेवा करथे उही बुद्धिमान बनथे।

     गनेश ला बुद्धि के देवता माने जाथे बुद्धि के ताकत ले कामयाबी मिलथे कामयाब मनखे के पूजा मान गउन होथे। बिन बुद्धि के मनखे ला कतको सोन चांदी ले लाद दे अउ बने बने  बने अंगरखा पहिरा दे फेर ओखर पूजा नइ हो सके। बुद्धि पाय बर जौन उदिम करे जाथे वहू गुण मनखे हा गनेश ले सीख सकत हे बुद्धि पाय के सोज सोज उदिम गनेश के हाथ मा दिखथे पहिली चिनहा अंकुश हे जेन सिखाथे कि जौन मनखे अपन दसो इंद्री ला अपन बस मा राख लेथे ओहा पूजा के लइक बन जाथे जइसे साधू संत मनके होथे। दूसर चिन्हा कमल फूल हरे जौन सिखाथे कि मनखे जेन समाज मा जनम लेथे रहना बसना करथे ओखर जर उहाँ जुड़े रहय फेर ओहा अपन बिचार बुता अउ बेवहार ऊँच राखय एला असंगति कहे जाथय जइसे कमल हा तरिया के पानी मा फूलथे ओखर जर लद्दी मा रहिथे फेर ओहा पानी ले ऊपर मा रथे।

          तीसर चिनहा ओखर हाथ मा राखे पुस्तक माने शास्त्र हरे जौन सिखाथे कि मनखे के जिनगी शास्त्र के अनुसार होना चाही बिन बेद शास्त्र के जिनगी के अधार नइ रहय अइसने गनेश के एक हाथ मा लड्डु रहिथे जौन मिठास के चिनहा आवय कहे जाथय जेन मनखे के बोली गुरतुर रथे नैन मा मिठास रहिथे नत्ता गोत्ता अउ बेवहार मा मिठास राखथे ओखर मान गउन समाज अउ संसार मा होथे। आज हमर देश मा लाखो ठउर मा गनेश बइठारत हे करोड़ो मनखे अउ संस्था मन भाव भक्ति ले पूजा करत हे फेर गनेश ले सीखे बर न लइका न सियान न बुढ़वा धियान देवत हे अउ न नारी मन धियान देवत हे एखरे सेती आज कोनों मनखे ला मान गउन मिलत हे न पूजावत हे ऊपर ले दाई ददा ला दुख देय के उदिम करत हे एखरे सेती हिनमान कराथे अउ दुख भोगत हे।

हीरालाल गुरुजी "समय"

छुरा, जिला- गरियाबंद

9575604169

हिंदी अउ छत्तीसगढ़ी

 

हिंदी अउ छत्तीसगढ़ी

देवभाषा संस्कृत के दुलौरिन बेटी हिन्दी के सहोदरा हमर गुरतुर भाखा छत्तीसगढ़ी हा आय । ये हा अवधी भाषा के सगे बहिनी तको कहाथे। जइसे के कोनो सगे बहिनी मन  के चेहरा-मोहरा अउ आदत-सुभाव मा मेल दिखथे ओइसने छत्तीसगढ़ी भाखा मा हिंदी के अमिट प्रभाव नजर आथे। दूनों के लिपि हा देवनागरी लिपि हर आय। थोड़-बहुत क्षेत्रीय लक्षण ला छोड़ देवन ता,दूनों के वर्णमाला एक समान हे।

      मौखिक भाखा के रूप मा छत्तीसगढ़ी कब ले हे ,तेकर सिरिफ अनुमान लगाये जा सकथे फेर एखर लिखित रूप लगभग 1100 साल पहिली हैहयवंशी राजा मन ले माने जाथे। वर्तमान मा छत्तीसगढ़ी के पुरातन लिखित स्वरूप 1703 ईस्वी मा मैथिल पंडित भगवान मिश्र के लिखे  दंतेवाड़ा(बस्तर) के दंतेश्वरी मंदिर के शिलालेख मा देखे ला मिलथे।

  बहुत झन विद्वान मन के कहना हे के छत्तीसगढ़ी मा  श,ष,क्ष, त्र, ज्ञ, अउ ऋ  वर्ण नइ बउरे जाय। वोखर बदला स,छ,तर(तिर),ग्य(गिय) अउ रि के प्रयोग होथे। फेर अब तो शिक्षा के प्रभाव के सँगे-संग छत्तीसगढ़ी ला 28 नवम्बर 2007 ले छत्तीसगढ़ राज्य के राजभाषा घोषित करे के बाद हिंदी जइसे जम्मों 52 वर्ण के प्रयोग करे जावत हे।ये हा बने बात ये काबर के हिंदी अउ आन भाषा मन के कुछ शब्द अइसे हें जे मन ला छत्तीसगढ़ी मा जस के तस लिखे जाथे।ये मन ला पुरातन ठेठ छत्तीसगढ़ी मा बोले या लिखे मा विकृति आये के अंदेशा होथे।एक बात अउ हे के छत्तीसगढ़ी भाषा के मानकीकरण करे बर कोनो न कोनो एक रूप ला अपनाये ला परही।

          हिंदी अउ छत्तीसगढ़ी मा प्रगाढ़ सबंध हे। हिंदी के कहावत, मुहावरा अउ भाव-संस्कार के नजदीकी रूप छत्तीसगढ़ी मा देखे-सुने मा आथे।सच कहे जाय ता छत्तीसगढ़ी भाषा मा हिंदी के ताकत हे।

        छत्तीसगढ़ी हा भाषा शास्त्र के दृष्टि ले पूर्वी हिंदी(अर्धमागधी) के बोली(उपभाषा) आय जेन हा आर्यभाषा समूह मा आथे। जइसे हिंदी हा भारत देश के सम्पर्क भाषा आय ओइसने छत्तीसगढ़ी हा हमर प्रदेश के सम्पर्क भाषा आय।अंग्रेज शासनकाल के वृहद छत्तीसगढ़ी क्षेत्र के रूप मा देखन ता ये हा अपन सीमा ले लगे महाराष्ट्र, उड़ीसा, मध्यप्रदेश अउ उत्तरप्रदेश मा तको बोले जाथे।एखर उलट देखन ता हमर राज्य के सीमावर्ती इलाका मन मा मराठी,उड़िया, बुंदेलखंडी अउ अवधी के मिले-जुले रूप द्रविड़ भाषा समूह के हल्बी, गदबा, कोरकु,तुरी, भतरी, उरांव, दड़मी आदि प्रचलित हे।

        हिंदी अउ छत्तीसगढ़ी भाषा मा जेन प्रमुख भिन्नता हे वो व्याकरण मा हावय।छत्तीसगढ़ी के खुद के व्याकरण हे जेन हिंदी उपर आधारित नइये।छत्तीसगढ़ी मा लिंग परिवर्तन ले क्रिया रूप मा कोनो परिवर्तन नइ होवय जबकि हिंदी मा हो जथे। कई झन इतिहास कार अउ भाषाशास्त्री मन के कहना हे के छत्तीसगढ़ी के व्याकरण हा ,हिंदी के व्याकरण ले पहिली बनगे रहिस जेला काव्योपाध्याय हीरालाल चंद्रनाहु जी हा लिखे रहिन।सुप्रसिद्ध भाषा वैज्ञानिक, सर्वेक्षक ग्रियर्सन हा छत्तीसगढ़ मा भाषा सर्वेक्षण के बेरा एखर सहारा ले रहिन।

         हिंदी भाषा मा छत्तीसगढ़ी के लेखक-कवि मन चिरस्मरणीय सृजन करे हें। मान्यता हे के हिंदी के पहिली कहानी "एक टोकरी भर मिट्टी' ला इहाँ के स्वतंत्रता संग्राम सेनानी, साहित्यकार पंडित माधव राव सप्रे जी हा लिखे हें। उही मन अपन साथी पंडित रामराव चिंचोलकर जी अउ श्री बलिराम लाखे जी संग सन् 1900 मा पेंड्रा ले हिंदी मासिक पत्रिका "छत्तीसगढ़ मित्र " के नेंव धरे रहिन। इहाँ के रहइयाँ छत्तीसगढ़ी अउ हिंदी के मूर्धन्य सृजनकार सर्व श्री डा० पदुमलाल पुन्नालाल बख्शी, गजानन माधव 'मुक्तिबोध' ,छायावाद के प्रवर्तक पंडित मुकुटधर पाण्डेय,पंडित लोचन प्रसाद पाण्डेय,ठाकुर प्यारे लाल सिंह, डा० खूबचंद बघेल,लाला जगदलपुरी, नारायण लाल परमार,पंडित सुंदरलाल शर्मा,  केयुर भूषण हरि ठाकुर, पंडित श्यामलाल चतुर्वेदी, लतीफ घोंघी, श्री कांत वर्मा,  पंडित रामदयाल तिवारी,  जया जादवानी, गुलशेर खाँ, डा० नरेंद्रदेव वर्मा ,संत पवन दीवान, जनकवि कोदूराम 'दलित' आदि मन साहित्य के कोठी ला भरे मा बहुमूल्य योगदान दे हावयँ।

         हिंदी अउ छत्तीसगढ़ी के वर्तमान दशा अउ दिशा उपर विचार करना जरूरी हे। भले हिंदी के विपुल साहित्य भंडार हे, संसार मा सबले जादा बोले जाने वाला दूसरा नंबर के भाषा आय फेर अपने देश मा उपेक्षित होवत जावत हे। देश ला आजाद होये 74 साल होगे फेर राष्ट्र भाषा के दर्जा नइ मिलिस। ये हा रोजगार परक नइ होइस। अंग्रेजी के मोह जाल मा फँसके सब भटक गेन। एकर ले उबरे के जरूरत हे।ओइसने छत्तीसगढ़ी राजभाषा तो बनगे फेर राजकाज के भाषा नइ बन पाये हे।प्राथमिक शिक्षा तको एमा नइ होवत ये तब एखर बढ़वार कइसे होही? छत्तीसगढ़ी भाषा मा साहित्य तो अब्बड़ रचे जावत हे फेर पाठक नइये। छत्तीसगढ़ी पुस्तक मन ला जन-जन तक पहुँचाये के जरूरत हे।

      हिंदी अउ छत्तीसगढ़ी के कोनो भाषा संग विरोध नइये।लोगन हजारों भाषा जानयँ, लिखयँ-पढ़यँ फेर पुरखा साहित्यकार भारतेंदु हरिश्चंद जी के कहना ला सुरता करके ,आत्मसात करके अपन मातृभाषा ला व्यवहार मा लावयँ। भारतेंदु जी कहे हें---

निज भाषा उन्नति अहै,

सब उन्नति के मूल।

बिन निज भाषा ज्ञान के,

मिटत न हिय को सूल।

*छत्तीसगढ़ी निबंध संग्रह -मैं गाँव के गुड़ी अँव के एक निबंध*

चोवा राम वर्मा 'बादल '

राजा चक्रधर शाह पोर्ते समारोह* (सुर -ताल, छंद, संगीत अउ घुंघरू के 41"बरस)

 *राजा चक्रधर शाह पोर्ते समारोह*

(सुर -ताल, छंद, संगीत अउ घुंघरू के 41"बरस)

----------------------------------

      आवव हमर छत्तीसगढ के बड़का "बिश्व संगीत सम्राट" राजा चक्रधर शाह (पोर्ते) के बारे मा जानन । जेकर छत्तीसगढ़ मा आजो 40 वां समारोह मनाय जावत हे।

    महाराजा चक्रधर शाह छत्तीसगढ़ मा रायगढ़ रियासत के राजा अउ गोंडवाना वंश के गढ़पति, बरगढ़ के राजा भूपदेव सिंह के बेटा रिहिस। जेकर जनम 19अगस्त 1905 अउ देहांत 07अक्टूबर 1947 म होय रहिस। बरस 1924 मा ओकर बड़े भाई राजा नटवर सिंह के देहांत होय के पाछु चक्रधर हर राज गद्दी मा बइठिस। जेहर 1924 ले 1947तक राजगढ़ के रियासत ल अपन दम मा चलइस। राजा चक्रधर के सिक्छा रइपुर के राजकुमार महाविद्यालय मा होय रहिस। ओहर गायन, वादन, अभिनय अउ नाच कला के बिसेसग्य रिहिसे हे। जेनहर संगीत अउ नृत्य बिद्या के बड़का करम के रचना ला करिस। बर्तमान मा छत्तीसगढ़ सरकार (छ.गढ़ संस्कृति विभाग) के डहर ले महाराजा चक्रधर शाह के सुरता मा "चक्रधर सम्मान" संगीत नृत्य के नाव मा देय जाथे।

  रायगढ़ के सांसकिरतिक बिरासत ला पोठ करे के काम इहाँ के राजा चक्रधर शाह हर करे हे। चक्रधर शाह बढ़िया तबला अउ सितार बजाय के संगे - संग "तांडव नृत्य" मा घलोक जब्बर सुजानिक रहिस हे। ओहर कत्थक मा लखनऊ अउ जयपुर घराना ले जुरे रहिस, त उहाँ के गुरुजी मन ला रायगढ़ मा बलाइस। कत्थक के दुनो शैली ल  मिंझारे बर ओहर एकठीन नवा शैली "रायगढ़ शैली" के सुरुवात करिस। गोंडराजे चक्रधर हर संगीत अउ कबिता मा बहुत अकन गरंथ के रचना ला घलोक करे रहिसे जेमा मेन रचना _नर्तक सर्वस्व, तालतोय निधि , तलब पुष्पकर, राजरत्न मंजुस, पुराजपरन पुष्पकर। उरदू भाषा मा तको ओकर पकड़ जमगरहा रिहिसे, ओहर "फरहद"के उपनाव ले उरदू भाषा मा गजल लिखिस। संस्कृत, उरदू अउ हिंदी मा लिखे परकासित किताब हाबे _ रत्नहार, काव्य कानन, रम्यराज, बैरागढ़िया राजकुमार, निगोर फरहद, अलकापुरी -तीन भाग, जोशे फरहद, माया चक्र, प्रेम के तीर। "तालतोयनिधि " नाव के किताब के वजन 32"किलो हाबे। ये सब्बो किताब ह आजो भी चाँदी के पेटारा मा धराय हे। गढ़ा मंडला" रियासत कालिन _खैरागढ़ सम्मिलन 1943 म कल्याण दास के नृत्य परदरसन म खैरागढ़ मा दुसरइया बार तबला तको बजाए रिहिस हे।राजा चक्रधर शाह पोर्ते के जनम गनेस चतुर्थी के दिन होय रिहीस हे। तेकर खुशी मा ओकर पिताजी हर सहर मा उसल मंगल (उत्सव) मनाय के सुरू करिस। इहि ला आगू बढ़ात राजा चक्रधर शाह के सुरता मा साल 1985 ले गनेस चतुर्थी के अउसर मा इहां के राजघराना के डाहर ले शास्त्रीय संगीत अउ नृत्य महोत्सव के रूप मा गनेस मेला, चक्रधर समारोह सुरू करिन। जेमा देश के बड़का- बड़का कलाकार मनहा अपन कला के परदरसन करथें ।

  येकर पाछू साल 2001 मा जिला परसासन हर तिहार मनाए के जुम्मेदारी लेलिस। तब ले छत्तीसगढ़ के रायगढ़ मा गनेस मेला जोरपरहा तिहार बनगे हावे।

--------------=-----------------

          मदन मंडावी

ढारा, डोंगरगढ़,राजनांदगांव

व्यंग* *मस्ती के पाठशाला**

 *व्यंग*

 *मस्ती के पाठशाला** 

         आजकल हाईटेक जमाना आय। हाईटेक जमाना म लईका लोग सब सब हाईटेक हे।।जनम धरते साठ मोबाइल के दरसन हो जथे।मानो साक्षात परमात्मा के दरसन होगे।अऊ उही मोबाइल म जनम कुंडली घलो निकाल डरथे। भले ओकर भाग म काय लिखाय हे तेला नी जाने।लईका मन मोबाइल देखत देखत अइसे बाढथे साल भर बाद अपन सट्ठी के रिल फोटो सबो ल जान जथे। मोबाइल के आय ले महतारी मन के घलो भाग जाग गेहे।थोरको लईका रोथे मोबाइल ल धरा देथे।लईका खुश। फेर पाछु चिल्लावत हे अरे नही रे बेटा जादा मोबाइल देखे ले आंखी खराब होथे।आंखी कम दिमाग जादा खराब होथे।

       सब ल अपन अपन बुता (काम)के बड़ कान्फीडेंस रहिथे।रहिना घलो चाही। एक झन गुरुजी के मन मे लईका मन के टेस्ट परिक्षा ले के बिचार होइस।लईका मन कथे चलो पाठशाला के निबंध लिख के देखाव।तब काकरोच टाईप लईका लिखे राहय।

    हमन अमुक गांव के अमुक स्कूल मे पढथन।हमन हमन माड़ी भर चिखला ल नाहाक के स्कूल जाथन।हमर स्कूल मे दू कमरा एक ठन परछी हे अऊ परछी के कोंन्टा म बड़े गुरुजी के आफीस हे।जेमे पांच ठन कक्षा लगथे।इंहा पहिली ले पांचवीं तक सरमेट्टा रहिथन।पंच मिझरा साग कस।इंहा के छत के पलस्तर ओदरे के पारी आ गेहे। कोनो- कोनो जगा विकास के पानी टप -टप चुहत रहिथे।हमर स्कूल के पाछु शौचालय हे जेकर कपाट के खालहे कोती भोंगरा हे।जेहा टोनही लटके कस एक हाथ ऊपर ले झुलत रहिथे।हमर स्कूल म मध्यान भोजन घलो देथे जेमे गुरुजी मन घलो तर जथे। पढ़हई के गारंटी राहय चाहे झन राहय फेर मध्यान भोजन समे म मिले के गारंटी हे।जइसे सरकार के गारंटी।

  हमर स्कूल के गुरूजी मन बहुत अच्छा हे।फेर वहू मन नराज फूफा कस घेरी बेरी आंदोलन म चले जथे।येकर सेती हमर पढ़हई ह टू जी,थीरी जी कस चलथे। भगवान करतीस यहू मन अनलिमिटेड रिचार्ज होतिस ते हमरो पढ़हई फाईफ जी कस चलतीस।

नराज फूफा के भतिजा।

   

     फकीर प्रसाद साहू 

           सुरगी 🙏

18"सितम्बर 1857बलिदान दिवस"[संसिप्त बिसलेशन] ----------------------------------

 18"सितम्बर 1857बलिदान दिवस"[संसिप्त बिसलेशन]

----------------------------------

*शंकर शाह, रघुनाथ शाह*

    

        1857 के करांति मा अपन परान तियाग करइया बीर राजा शंकर शाह अउ ओकर बेटा रघुनाथ शाह, गढ़ा मंडला(मध्यप्रदेश) अउ गोंड राजवंश के परतापी राजाम्बत शाह के वंशज रिहीस। इहां के राजवंश के सिलालेख मा देश अउ अपन आत्मसनमान के खातिर परान गंवईया ला देखे जा सकत हे। राजाम्बत शाह (1488-1543) के बड़े बेटा दलपत शाह के पत्नी रानी दुर्गावती अउ बेटा वीरनारायण अपन धरती के सनमान बर रक्छा करत अकबर सेना ले जुझत जुद्द मा बलिदान दे दिस।

शंकर शाह के बबा गोंड राजवंश के आखरी परसिद्ध सासक राजा निजाम शाह अउ ददा राजा सुमेंद शाह (1715) रिहिस।(पाछू पेसावा मुगल काल)

राजा शंकर शाह अउ कुंवर रघुनाथ शाह दुनो गजब बीर, संत, अउ बढ़िया कवि रिहिस। कविता के माध्यम ले लोगन मन मा देश परेम के भाव जगा के देश रक्छा के परचार करे। अंगरेजन के खिलाफ लिखे कविता -

खुद गौड़ दुष्टन को शत्रु संहारिका,

मार अंग्रेज रेज का देह मात चण्डी,

बचे नहीं बैरी बाल बच्चे संहारिका।

शंकर की रक्षा कर दास प्रतिपालका,

दिन की सुन आये मीत कालका

मच्छन कर तत्छन धौर मात कालका।

*ये कविता के सार ए रिहीस कि अंग्रेजन ला समूल नास कर देवव।*

वो बेखत अंगरेजी लेफ्टिनेंट जनरल - क्लार्क मण्डला सेत्र मा बहुते अतियाचार, लूटपाट, हहाकार मचावत रिहिस। (अंगरेजन _मंडला, झांसी, नागपुर, अवध रामगढ़ कानपुर ला अपन संग संघेरना चाहत रिहीन) राजा शंकर शाह जनता अउ जमींदार मन ला साथ लेके अंगरेज ले भिड़े बर एलान कर दिस।

    वोती क्लार्क हर अपन जासूस ला साधु भेस मा शंकर शाह के तइयारी खबर लेय बर गढ़पुरबा महल मा भेज दिस। राजा धरम परेमी रिहिस बहिरूपिया साधु मनके आदर सतकार करेके के संगे - संग अजादी मा सहियोग करे बर निवेदन करिस। राजा जुद्ध के योजना ला जनता संग साधु मनकरा फोरियाके गोठियादिस। फेर उही साधु मन 52वी रेजिमेंट के क्लार्क ला जाके बता देइस।

अंगरेज तुरते 14 सितम्बर1857 के रात गढ़पुरबा महल ला चारोमुड़ा ले घेर लेइन, शंकर शाह,अउ बेटा रघुनाथ शाह ल धरबाँध के लेगइन। सैनिक महल के तलासी करिस त चिट्ठी -परची मिलीस जेमा एक परची मा शंकर शाह अपन कुल देबी, मालादेबी ला बंदन करत अंगरेज के नास करे के बात लिखे रिहीस।

 लेफ्टिनेंट जनरल क्लार्क हर बाप - बेटा ला जेल मा बंद करदिस,देशद्रोही, सड़यंत्र रचे के आरोप मा मउत के सजा सुना दिस। अंगरेज दुनो झन ला फाँसी देना चाहत रिहिस, शंकर शाह, रघुनाथ शाह बुधियार रहिस ओमन कहिन - हमन कोनो, चोर, डाकू, लुटेरा थोरे हरन, हमला फाँसी नहीं जनता के बीच तोप मा बाँधके उड़ाए जाय।

   18 सितंबर 1857 के दिन बाप - बेटा के कहे मुताबिक  एजेंसी हाऊस के आगू मा लाने गिस। आसपास के देखइया मनके के भारी भीड़ लग गे।

राजा अउ राजकुमार के खिले चेहरा,सांत,तेज मजबूत, गौरव के भाव। तोप के आगू मा साती तानके खड़े होगे। सरीर के अंग - अंग,चिथड़ा - चिथड़ा 50 फिट दुरिहा -दुरिहा फेंकागे ।

  बाद मा शंकर शाह के पत्नी फुलकुंवर अउ बहु मानकुंवर चिथड़ा मास ला उठाके अंतिम किरिया करम करके अंग्रेजन ले बदला लेय के कसम खाइन। दूनो राजा के बलिदान होय के बाद महाकौसल सेत्र के जनता मा जब्बर बिद्रोह भड़कगे। बाद मा इही मंडला,जबलपुर के खैरी के लड़ई मा रानी अवंती बाई लोधी(1831- 1858)हर ब्रिटिश सासन ले जनतामन ला छोड़ाइस। ये सेत्र के जम्मो करांती मा राजा शंकर शाह, रघुनाथ शाह, रानी अवंती बाई लोधी जइसन बीर बिरांगना मन अपन बलिदान देइस।

------------------------------------

      *मदन शाह मंडावी*

ढारा, डोंगरगढ़ राजनांदगांव

पुरस्कार*

 *पुरस्कार*

"जय हिन्द गो! गुरुजी! कहां लकर धकर जावत हस?" 

"जय हिन्द गा बबा! कुछु नहीं। चार दिन ले आगर हो गेहे चैतू के लइका स्कूल नी आवत हे तेकरे आरो लेबर जावत हों।" 

"तोर आए ले हमर गांव के पूरा दशा बदलगे गुरुजी। पहिली के लइका मन लटपट पांचमी तक पढ़े ताहन छेरी पठरु चरावय।तोर परताप ले आज हमर गांव ले कतको लइका मन साहेब सिपाही बनके माटी महतारी के सेवा करत हे।" 

"एमा मोर ज्यादा योगदान नीहे गा सियान! में तो अपन कर्तव्य के पालन करत हों।ए तो लइका मन के मिहनत अउ उंकर दाई ददा के परवरिश के नतीजा आय।" 

"नहीं गुरुजी! स्कूल तो हमर ननपन ले चलत हे फेर सबो चमत्कार तोरे आए ले होइस हे।एकठन बात पूछंव का गुरुजी?" 

"सुने हंव अच्छा पढ़ाने वाले गुरुजी ला सरकार कोती ले ईनाम मिलथे कथे?तोला कब मिलही?" 

" हव बबा! सरकार कोती ले ईनाम मिलथे।फेर ओकर बर पत्रकार,अफसर, विधायक,मंत्री मन तक चिन पहिचान लागथे।मोला तो अपन स्कूल अउ लइका मन ले फुरसत नी मिले।ता कहां ले चिन पहिचान बढ़ाहूं।फेर मोला सरकारी ईनाम के जरुरत का हे।गांव ले अतिक मान सम्मान मिलथे।वो हर का कम हरे?

"तभो ले गा!जेकर काम संहराय के लाइक रथे ओला ईनाम मिलना चाहिए।" 

"मोला तो आए दिन ईनाम मिलथे बबा!हाट बजार में गिंजरत खानी जब कोनो लइका उदुप ले आके पांव छूथे अउ अपन परिचय देवत बताथे कि में अमुक जगह में शिक्षक बनगेंव,सिपाही बनगेंव।ता मोर छाती चौड़ा हो जथे।इही हरे मोर असली ईनाम!!!" 

रीझे यादव टेंगनाबासा 

छुरा