छत्तीसगढ़ी गीत अउ बॉलीवुड के गायक गायिका

*छत्तीसगढ़ी गीत अउ बालीवुड के गायक गायिका*

                छत्तीसगढ़ अपन संस्कृति,संस्कार, बन, नदिया, पहाड़, खनिज, खेल,खेती किसानी, साहित्य,समाज अउ गीत संगीत के दम मा दिनों दिन वैश्विक पटल मा छावत जावत हे। नवा राज बने के बाद सरलग विकास के रद्दा मा रेंगत हे। आखिर भारत के ह्रदय के रूप मा विख्यात मध्यप्रदेश के एक चानी छत्तीसगढ़(ह्रदय के टुकड़ा) कइसे सबके चहेता नइ रही। आज बात  करबों हमर राज के गीत संगीत मा बॉलीवुड के गायक गायिका मनके योगदान के बारे मा। वइसे तो हमर राज मा कतको सुर साज के धनी गायक गायिका हे, जिंखर सुमधुर आवाज सुबे शाम जम्मो छत्तीगढ़िया मनके कान मा मधुरस घोरत रहिथे, तभो कोई गीत ला कोनो नामी गायक गायिका स्वर देथे, ता ओखर का कहना। बॉलीवुड मा बतैर अभिनेता, अभिनेत्री, गीतकार, संगीतकार, नर्तक, निर्देशक, अउ कतको काम मा छत्तीसगढ़ के शक्स मन अपन स्थान बना चुके हे, अउ अभो अपन लोहा मनवावत हे। बॉलीवुड अउ छत्तीसगढ़ के बड़ जुन्ना नता हे, जे आजो सरलग निभत हे। छत्तीसगढ़ के पहली फिल्म कहि देबे संदेश(1965) मा भारत के मशहूर गायक रफी साहब अपन आवाज के जादू बिखेर चुके हे। छत्तीसगढ़ के पहली(कहि देबे सन्देश 1965) के अलावा दूसरा फिलिम(घर द्वार 1971) मा पूरा बॉलीवुड गीत संगीत मा दिखिन। एखर आलावा राज निर्माण के बाद घलो बॉलीवुड के महान हस्ती मन अपन स्वर ले छत्तीसगढ़ी गीत ला अमर करिन।बॉलीवुड के बहुत अकन गायक गायिका मन छत्तीसगढ़ी फिलिम अउ एलबम मा अपन आवाज देहे,आवन कोन कोन बॉलीवुड के गायक गायिका मन का का छत्तीसगढ़ी गीत गायें हें ,उंखर विस्तार ले चर्चा करिन-

1, *मोहम्मद रफी साहब*

रफी साहब ना सिर्फ भारत बल्कि पूरा विश्व मा अपन आवाज के जादू बिखेर चुके हे। उन मन  कतको अकन गीत कतको भाषा मा गायें हें। उंखर मुखारबिंद ले छत्तीसगढ़ी गीत घलो सुने बर मिले हे, जे हम सब छत्तीगढ़िया मन बर गर्व के बात आय। रफी साहब सन 1965 के छत्तीसगढ़ी फिलिम कहि देबे सन्देश अउ सन 1971 के फिलिम घर द्वार मा छत्तीसगढ़ी गीत गा चुके हे, जे आजो मन ला मोह लेथे।

*झमकत नदिया बहिनी लागे,पर्वत मोर मितान* (फिलिम कहि देबे संदेश, ये रफी साहब के पहली छत्तीसगढ़ी गीत रिहिस।)

*तोर पयरी के झनर झनर, जीव ला ले लेइस* (फ़िल्म कहि देबे सन्देश)

*मैना तही मोर मैना,आजा नैना तीर, आजा रे* (फ़िल्म कहि देबे सन्देश)

*गोंदा फुलगे मोर राजा, छाती ला मारे बाण* (फिल्म- घर द्वार)

*सुन सुन मोर मया पीरा के संगवारी रे, आजा जिवरा तीर आजा रे* (फ़िल्म घर द्वार)

ये दुनो शुरूवाती फिलिम मा हरि ठाकुर, हेमन्त नायडू राजदीप जइसन सशक्त गीतकार अउ रफी साहब, मन्ना डे, महेंद्र कपूर, सुमन कल्यानपुर, मीनू पुरषोतम जइसन महान गायक, गायिका मनु नायक, मलय चक्रवती के महिनत, छत्तीसगढ़ी गीत संगीत के दुनिया मा आजो धूम मचावत हे।

2, *सुमन कल्याणपुर जी*

सुमन कल्याणपुर जी रफी साहब के संग कहि देबे सन्देश अउ घर द्वार फिलिम मा मुख्य गायिका रिहिन, उंखर गाये गीत- *झन मारो गुलेल, बाली उमर लरकइयाँ, सुन सुन मोर मया पीरा के संगवारी रे, मोर अँगना के सोन चिरइया नोनी* बेहद मनभावन हे। 

*मोर अँगना के सोन चिरइया वो नोनी, ये गीत ला फिल्मकार मन लता जी ला गवाना चाहत रिहिन, फेर समय अउ बजट के चलते सम्भव नइ हो पाइस, तेखर बाद मुबारक बेगम जी मन तैयार होगिन, पर गीत के एक शब्द "राते अँजोरिया" ला बार बार रिहर्सल के बाद घलो राते अँझुरियाँ केहे के कारण, अंततः सुमन जी ला ये गीत ऑफर होइस।*

3, *लता मंगेशकर दीदी जी*

सुर सम्राज्ञी लता जी  घलो अनेक भाषा मा कतको अकन अमित गीत गाइन, जेखर पार पाना असम्भव हे। साक्षात सुर साज के देवी लता जी के मुख के छत्तीसगढ़ी गीत निकलना छत्तीसगढ़ वासी मन बर वरदान बरोबर हे। सन 2005 मा भकला फिलिम मा लता दीदी मन एक विदाई गीत *(छूट जाही अँगना अटारी)* गाये रिहिन, जे आजो बर बिहाव के बेरा खूब बजथे। लता जी ये गीत के एवज मा घलो कुछु नइ ले रिहिस, गीतकार मदन शर्मा जी के योगदान घलो अविस्मरणीय हे। लता जी मन छत्तीसगढ़ पर्यटन विभाग के एक टाइटल सांग घलो गाइन हे। कहि देबे सन्देश मा विदाई गीत, फिल्मकार मन लता जी ला सन 1965 मा गवाना चाहत रिहिन, पर संयोग ले 2005 मा लता जी मन अंततः भकला फिलिम मा एक दूसर विदाई गीत गाइन।

4, *सोनू निगम जी*

सोनू निगम जी के जतका छत्तीसगढ़ी  गीत सुने बर मिलथे, ओला देखत अइसे लगथे कि, बॉलीवुड गायक गायिका मन मा सोनू निगम जी मन छत्तीसगढ़ी मा सबले ज्यादा गीत गाये हे। उन मन खैरागढ़ संगीत विश्वविद्यालय ले संगीत के शिक्षा घलो लेहे।उंखर गाये 20 ले घलो ज्यादा गीत हे, कुछ एलबम अउ कुछ फिलिम मा घलो ले गेहे। सोनू निगम जी के कुछ सुपरहिट छत्तीसगढ़ी गीत-

*तोर नथनी के मोती रे, मारे टूरा मन ला गोंटी रे।*

*तैं आगास के बन जा सुरुज।*

*ना धरती मा हे कोनो, ना कोनो आगासे मा।*

*छुनुर छुनुर पैरी बाजे।*

*गोरा बदन मा लाली चुनरिया, उड़ा देथे मोर निदिया।*

*कारी कजरेरी गोरी, झूम के नाचे रे।*

*तोर नाम ला सुनके करौंदा।*

*टूरी निकले हे सज सँवर के रे, येला लाज नइ लागे।*

*ऐ वो जवैया का नाम।*

*मोर प्रेम प्रसंग मा।*

*दौना के पान ला।*

*ऐ हँसनी, ऐ रागिनी।*

*मोर मैना मंजूर।*

*तैं हलो हलो केहे।*

*मोर सोना चाँदी हीरा रे।*

*जब ले देखेंव दिल मा।*

*तोर पाँव मा काँटा गड़ जाही, गोरी धीरे धीरे रेंग*

*जिनगी के आजा गोरी मजा उड़ाले, नैन लड़ाले*

*खोंच मोंगरा के फूल, तोर बेनी मा झूले झूल*

*मात गेहे बगिया मा फूल रे संगी झुलबो झूलना रे झूल।*

*तोर मया के मारे।* (फिलिम- तोर मया जे मारे, टाइटल सांग)

*मैं होगेंव दीवानी रे।* (फिलिम मया देदे मया लेले)

सोनू निगम जी के ये सब गीत सन 2000 मा आइस, तब छत्तीसगढ़ी संगीत मा एक तूफान आगे रिहिस, सबे कोती इहिच गीत मन सुनाये, ये गीत मनके आजो माँग बरोबर हे।  लोक गायिका पद्म श्री ममता चन्द्राकर जी मन संग सोनू निगम जी मन एलबम अउ फिलिम मा गीत गाये हे।

5,*मोहम्मद अजीज जी*

बॉलीवुड के मशहूर गायक मोहम्मद अजीज जी दूसर नम्बर मा सबले ज्यादा छत्तीसगढ़ी गीत गाये हे। उन मा फिलिम मयारू गंगा(2017), जय जगन्नाथ, मोर धरती मइया के संगे संग एलबम तै मोला जहर देदे, तोला अब्बड़ मया करथों,गाबों अउ गवाबों  मा घलो स्वर दिये हें, कुछ मनभावन गीत प्रस्तुत हे-

*गुइयाँ रे ऐ गुइयाँ, परी कि तैं सोन चिड़िया।* (एलबम गीत)

*तँय मोला जहर देदे।* (दर्द भरे गीत)

*खिलौना समझ के दिल ला तोड़े।* (दर्दीला गीत)

*जिनगी मा आके तैं चल दे रे।*

*चैत कुंवार मा मोर महारानी,महामाया दाई।* (जस गीत)

*मैं आयेंव दुवारी तोर।* (जस गीत)

*तोला जब ले देखे हँव हिरनिया।*

*सुख दुख मा जिनगी बीते।*

*मयारू गंगा।* (फिलिम मयारू गंगा टाइटल सांग)

*कलयुग के नारायण तिहीं जगन्नाथ हो।* (फिलिम- जय जगन्नाथ,2007)

*महाशक्ति सुन मोर विनती, नटखट ये सब तिहीं करे हस।* (फिलिम जय जगन्नाथ)

*महामाया दाई वो मैं*

एखर आलावा अउ कई गीत अजीज साहब मन गाये हे, जे आजो बरोबर मन लगाके पूरा छत्तीसगढ़ मा सुने जाथे।

6, *कुमार सानू जी*

बॉलीवुड के मशहूर गायक कुमार सानू जी मन घलो छत्तीसगढ़ी गीत ला अपन आवाज दे हें, कुछ गीत देखिन-

*मोर मनके मनमोहनी, मोर दिल के तैं जोगनी वो। *

*देखे हँव जबले तोला, मोला प्यार होगे रे।*

*फुलगे मनके फूल, होगे पिरित कुबूल।*

*मन के मन मोहनी, मोर दिल के तैं जोगनी वो।*

*मया करबे का।* (मया करबे का छत्तीसगढ़ी एलबम)

*तै बिलासपुरहिंन अस।*

*तोर संगी मोला बनाले*

*तोला मया होगे न*

*मोला चुम्मा दे दे(मयारू भौजी फिलिम)।*

*बइहा पगला दीवाना गाये गाना।*

*तोर संग जीना तोर संग मरना फिलिम मा घलो कुमार सानू जी मन अपन आवाज दिये हे।*

7, *अलका याग्निक*

*आजा रे निंदिया, चंदा के पलना मा झूला झुलाये* ये छत्तीसगढ़ी लोरी गीत ला अलका जी मन सुमधुर स्वर दे हवे।

8, *साधना सरगम*

*अबड़ तैं गोठियाथस तोर मनके भरम गा, ठुमुक डार के* ये प्रसिद्ध गीत ला साधना जी मन अपन आवाज मा  घलो गाये हे।

*साधना जी मन फिलिम मोर संग चलव रे मा अपन सुमधुर आवाज दिये हे, उंखर गाये गीत कोन इहाँ बाँसुरी बजाथे, बाँसुरी के धुन मा सोये ला जगाथे।* बहुत ही मनभावन हे।

*साधना सरगम जी महान संगीतकार कल्याणसेन जी के निर्देशन मा मयारू भौजी अउ जय महामाया फिलिम मा अपन आवाज देय रिहिस* 

कुछ गीत- *बन रसिया के मारे।*

*ए भौजी मोर मन हा उड़त हे आगास मा।*

*महिमा हे तोर अपार।*

*जा रे पिरोहिल।*

*महामाया सुन ले पुकार।*

*मैया फूल गजरा।*

*सिद्ध हे माई*

9, *अनुराधा पौडवाल*

अनुराधा जी मन अपन खनकत आवाज मा कतको एलबम *(झर झर नदिया, माँ तारा तारिणी, जान ले पहिचान ले)* मा गीत गाइन। फिलिम मोर संग चलव रे मा घलो अनुराधा जी मन अपन आवाज के जादू बिखेरे हें। कुछ गीत के मुखड़ा प्रस्तुत हे-

*छम छमाछम पैरी बाजे आयेंव सजन के द्वार।*

*झर झर नदिया के पानी, नीम अउ पीपर के छाँव, मोर सजना के गाँव।*

*जरा हलू हलू मया मा पास आना।*

*तारे नारे तारे नाना, तोर मोर एके गाना,संगे जीना संगे मरना*

*जिनगी के दुख हरौ माँ।* (जस गीत)

*लेजा लेजा पतिया लेजा, मया के चिठिया ले जा।*

*कोन रे इहाँ बंसुरी बजात हे/दिल दीवाना गावय गाना* (फिल्म-मोर संग चलव)

10, *नितिन मुकेश जी*

तोला अब्बड़ मया करथों एलबम मा अजीज जी के संग नितिन मुकेश जी मन घलो अपन आवाज के जादू बिखेरे हे।  लक्षमण मस्तूरिहा जी के गीत- *तोला अब्बड़ मया करथों रे, तोला अब्बड़ मया करथों* येला नितिन मुकेश जी गाये हे। नितिन मुकेश जी मन छत्तीसगढ़ी भक्ति एलबम  *शबरी के राम* मा अपन आवाज दिन। गीत के बोल *शबरी वो दाई चीख चीख जूठा बोइर ला खवाये सिया राम ला।*

11, *सुरेश वाडेकर*

मस्तूरिहा जी के प्रसिद्ध गीत *मोर संग चलव जी* ला वाडेकर जी मन अपन आवाज मा घलो स्वर दिये हे। एखर आलावा छत्तीसगढ़ी फिल्म बनिहार मा *कइसे आवँव तोर दुवारी* गीत ला स्वर दिन। मोर संग चलव फिल्म मा साधना सरगम, सुरेश वाडेकर, अभिजीत, अनुराधा पौडवाल मन लक्ष्मण मस्तूरिहा के लिखे गीत मन ला अल्का चन्द्राकर, मस्तूरिहा अउ दिलीप षडंगी मन संग मिलजुल के गायें हें।

12, *शान जी*

*सजनी हा दिल चुराये हे, मया के गीत सुनाये हे, दिलबर जानी* अइसन मनभावन गीत ला शान जी मन अपन आवाज देके अउ मनमोहक बना दिये हे।

13, *उदित नारायण जी*

बॉलीवुड के मश्हूर सिंगर उदित जी घलो छत्तीसगढ़ी गीत अउ ददरिया ला अपन आवाज  मा गाके अउ मनमोहक कर दे हे।

*बटकी मा बासी अउ चुटकी नून*

*बागे बगीचा दिखेल हरियर*

*चना के दार राजा।*

*लाली चुनरिया तोर लचके कमरिया तोर।*

14, *शंकर महादेवन जी*

स्वच्छता बर शंकर महादेवन जी एक गीत गाये हे,*स्वच्छ बने छत्तीसगढ़, छत्तीगढ़िया सबले बढ़िया*

15, *विनोद राठौर जी*

विनोद राठौर जी के गाये गीत *ऐ हंसनी, ऐ रागनी, तोला सपनावँव* बहुतेच जादा प्रसिद्ध होइस, आजो सुने मा मन बड़ भावन लगथे। एखर आलावा कल्याण जी के निर्देशन मा मयारू भौजी फिलिम मा *तँय बिलासपुरहिन अउ मैं रायगढ़िया(गीतकार- रामेश्वर वैष्णव), अउ खनके जब चूरी जइसे मनभावन गीत गाये हे।

16, *अभिजीत जी*

सुपरहिट छत्तीसगढ़ी फिलिम *मोर संग चलव रे* मा अभिजीत जी ला सुने जा सकथे।

*दिल दीवाना गावय गाना*(फिल्म- मोर संग चलव रे)

17, *महेंद्र कपूर जी*

महेंद्र कपूर साहब मन घलो छत्तीसगढ़ी मा बड़ अकन मनभावन गीत गाये हें। कपूर साहब मन *कहि देबे सन्देश के आलावा मोर धरती मइया फिलिम मा अपन आवाज के जादू बिखेरे हे।* उंखर कुछ गीत के मुखड़ा-

*ऐ वो नखरा वाली, जान देना वो।* (फिलिम- मोर धरती मइया)

*होरे होरे होरे होरे, कोयली कुहके आमा के डार।* (कहि देबे सन्देश)

*संगी हाथ लमाबो, संगी हाथ बढ़ाबो।* (गीतकार- दुर्गाप्रसाद पारकर, फिल्म- मोर धरती मइया )

*दुर्गा भवानी जग कल्याणी*

             *बालीवुड के अउ कतको सिंगर  मन ला मोर धरती मइया फिलिम मा कोरस करत सुने जा सकथे जेमा- *हेमलता, एस ए कादर, चंदारानी,सतीश,अउ दीपमाला जी मन के नाम प्रमुख हे।*

18, *मन्ना डे साहब*

मशहूर गायक मन्ना डे साहब मन छत्तीसगढ़ के पहली फिलिम कहि देबे सन्देश के टाइटल साँग *(कहि देबे सन्देश, दुनिया हा आघू बढ़गे।)* के आलावा रफी जी ला उही फिलिम मा कोरस मा साथ दे रिहिन।

19, *मीनू पुषोत्तम*

*मीनू पुरषोत्तम जी सुमन कल्याणपुरी जी कस कुछ गीत ला कहि देबे सन्देश फिलिम मा अपन आवाज देय हे।*

*बिहनिया के उगत सुरुज देवता।* (कहि देबे सन्देश)

*सुवा गीत- तरी हरी* (कहि देबे सन्देश)

*होरे होरे होरे, कोयली कुहके।* (कहि देबे सन्देश)

20, *कविता कृष्णमूर्ति जी*

 मोर धरती मइया फिलिम मा कविता जी मन मुख्य प्लेबैक गायिका रिहिन हे। उंखर कुछ गीत प्रस्तुत हे-

*मोर बगिया मा तैं गोंदा असन, ममहावत रबे।*

*ये कजुवा के मन डोले, मादर थाप मा।*

*ए गा बैला गाड़ी वाला, लॉन देना*

*तोर संग जीना तोर संग मरना फिलिम मा घलो कविता जी मन अपन स्वर दिये हें।*

21, *बाबुल सुप्रियो*- 

*ए हंसिनी, ए रागिनी, तुही ला मैं गाओं,तोला सपनाओं*

*कुछु कुछु होय गोरी मोला,जोन दिन ले देखेंव गोरी तोला-फिल्म गीत*

22, *कैलाश खेर*- फिल्म भूलन काँदा के टाइटल गीत- भूले से जो खुंद गया

अउ कतको अकन बॉलीवुड के मशहूर गायक गायिका मनके सुर साज मा सजे छत्तीसगढ़ी गीत जे समय बनिस वो समय अउ आजो कर्णप्रिय हे, मनभावन हे। छत्तीसगढ़ के गीत संगीत बॉलीवुड के गायक गायिका मन ला खासा प्रभावित करिस, तभे तो उंखर लगाव,झुकाव अतिक अकन दिखिस अउ आघू घलो दिखही। छत्तीसगढ़ी गीत संगीत मा बॉलीवुड के गायक गायिका मनके योगदान ला कभू नइ भुलाये जा सके। लगभग बनेच अकन बॉलीवुड के गायक गायिका मन छत्तीसगढ़ी गीत ला अपन आवाज दिन,फेर छत्तीगढ़िया मन के रग मा छत्तीसगढ़ के लोकल गायक गायिका मनके गीत जादा रचे बसे दिखथे। केदार यादव जी, साधना यादव जी, लक्षमण मस्तूरिहा जी, भैया लाल हेड़ाऊ जी, कविता वासनिक जी, अनुराग ठाकुर जी, पंचराम मिर्झा जी,धुर्वा राम मरकाम जी, लता खापर्डे जी, राकेश तिवारी जी,मेहतर राम साहू जी,सुनील सोनी जी, ममता साहू जी, कुलवंतीन बाई जी, रेखा बाई देवार जी, पद्मश्री तीजन बाई जी, चम्पा निषाद जी,ममता चन्द्राकर जी, गंगाराम शिवारे जी, अलका चन्द्राकर जी, छाया चन्द्राकर जी,  झाड़ूराम देवांगन जी,ऋतु वर्मा जी,बैतल राम साहू जी, महादेव हिरवानी जी, दीपक चन्द्राकर जी,गोरे लाल बर्मन, दिलीप सडंगी जी, दुकालू यादव जी, कुलेश्वर ताम्रकर, भूपेंद्र साहू,देवदास बंजारे, लक्ष्मीनारायण पांडे, नीलकमल वैष्णव,पूनम तिवारी, नवलदास मानिकपुरी जी जइसे अनेको लोक गायक मनके स्वर, छत्तीसगढ़ के माटी के महक ला छत्तीगढ़िया मनके अन्तस् मा बगरावत दिखथे। छत्तीसगढ़ के कतको नवा जुन्ना गायक मन बॉलीवुड के गीत तको गा चुके हे। तभे तो कथे छत्तीगढ़िया सबले बढ़िया।

जीतेंन्द्र वर्मा"खैरझिटिया"

बाल्को, कोरबा(छग)