कहिनी *// फइसला //*
****************************************
मनराखन अपन पार्टी के जबर निष्ठावान कार्यकर्ता रहय।ओकर आघू म पार्टी के विरोध म कोनों कुछू गोठिया झन पारहीं ओकर *पोड़कीपइयां बजा* देवय।ओहर पार्टी के जमीनी कार्यकर्ता के संगे-संग दरी बिछइया सकलइया,झण्डा-बेनर टंगइया अऊ पार्टी के जिन्दाबाद नारा लगइया रहय।ओकर पहनइ-ओढ़इ ल देखबे त सादा कुरता-पैजामा अरारोड लगे ठाड़ किरिच वाला पहिरे,ओकर किरिच म *तुमा पउला* जाही अइसन जनावय।ओहर दू बछर पहिली ले जिला पंचायत के चुनाव म प्रत्याशी बनहूं अऊ जिला पंचायत अध्यक्ष बने के सपना मन म संजोय रहिस।जिला पंचायत अध्यक्ष बने के पाछू एकठन कारन घलो रहिस कि अवइया विधानसभा चुनाव म पार्टी तरफ ले टिकट मिल जाही कहिके के तियारी करत रहिस।
ओहर जइसन सोचे रहिस तइसन जिला पंचायत के अध्यक्ष पद घलो अनारक्षित होय रहिस,ते पाय के ओकर मन म *आसरा के अँजोर* जगमगावत रहिस।पार्टी मोला समर्थित प्रत्याशी बनाबेच करही।मोला नि दिही त अऊ कोन ल दिही मन म सोचे लागिस।पार्टी संगठन के बड़का-बड़का नेता मन संग ओकर चिन्हारी रहय ते पाय के समर्थित प्रत्याशी बनाही कहिके पूरा आसरा रहिस।
उही क्षेत्र म पार्टी के कतको झन कार्यकर्ता रहंय।पार्टी के समर्थित अऊ जमीनी कार्यकर्ता के डांड़ म बैसाखू के नांव घलो चिन्हारी रहिस।पार्टी के जिला अध्यक्ष अऊ बैशाखू लइकुसहापन के जून्ना संगवारी घलो रहय।जिला अध्यक्ष बनाय म बैशाखू के हाथ रहिस।पार्टी के बड़का-बड़का नेता मन संग ओकरो उठना-बइठना रहय ते पाय के ओकरो मन म *आसरा के जोत* जगमगावत रहय।जिला पंचायत के चुनाव म समर्थित प्रत्याशी बनाबेच करहीं अइसे मन *आसा के डोरी* बंधाय रहिस।
मनराखन अऊ बैसाखू दूनोंझन पार्टी के जमीनी कार्यकर्ता रहंय।दूनोंझन म कोनों एक दूसर ले एको रंच कम नि रहंय।क्षेत्र म दूनोंं के कारज कोनों किसिम के कमी नि रहिस।दूनोंझन के गुन ल आकब करे म कम नि जनावय।दूनों के दूनोंं बरोबरी रहय।पार्टी घलो असमंजस म पर गिस कोन ल समर्थित प्रत्याशी बनाईन।येती दूनोंझन चुनाव लड़े बर जोमियाय रहिन।एकोझन पाछू घूंचे के नांव नि लेवत रहिन।
एती नामांकन भरे के आखरी दिन लकठियावत रहे।सबो संसय म परे रहे कि पार्टी के अधिकृत प्रत्याशी कोन रही।सहीच म दूनोंझन के बीच म कोनों किसिम के कमी नि रहिस तेकर ले पार्टी घलो असमंजस म परगे।पार्टी मनराखन ल प्रत्याशी बनाही त बैशाखू के जीव दुख पाही अऊ बैशाखू ल प्रत्याशी बनावत हे त मनराखन के आत्मा करलाही।पार्टी तो एकेझन अधिकृत प्रत्याशी बनाही।
समारु घलो पार्टी के बड़का कार्यकर्ता रहिस।ओहर दूनोंझन के फारम भरे म पार्टी के वोट बंटनिया हो जाही अऊ हमर पार्टी के प्रत्याशी हार जाही.....जिलाध्यक्ष ल चेतावत रहिस।तैं ठीकेच कहत हावस समारु.....जिलाध्यक्ष कहिस।तहुं तो जबर गुनिक हावस अब काय करिन तेन बता?.....सलाव पूछत जिलाध्यक्ष कहिस।नामांकन भरे के आखरी,दू दिन बाद आइच गिस.......कुछू उपाय बता समारु....जिलाध्यक्ष फेरेच कहिस।फारम भरे के ठीक पहिली दिन एक बड़का बइठक करवाय परही....उदीम बतावत कहिस।
दूनोंझन के समझउता करवाय बर एक बड़का बइठक करवाय गिस जेमा ओ क्षेत्र के सबो छोटे-बड़े कार्यकर्ता मन सकलाइन।मनराखन अऊ बैशाखू अपन-अपन समर्थक धर के संगे-संग लाने रहिन।एकठन बड़का हाल म सभा करे गिस।जिहां मनखे मन खचाखच भरे रहिस।खैमो-खैमो मनखे मन जुरियाय रहिन।ओमन आपस म खुसुर-फुसुर करे धर लिन।कोनों मनराखन बर सहमति देवत रहिन, कोनों बैशाखू कोती होवत रहिन।जिलाध्यक्ष घलो बैशाखू के खासम-खास हावे.....भुखउ कहिस।
ठउका बेरा म पार्टी पदाधिकारी मन के आय के आरो मिलिस।थोरिक बेरा म आके ओहूमन संघरिन।आघू मंच म पदाधिकारी मन बइठ गिन।बइठका शुरू करे गिस,मनराखन अऊ बैसाखू ल आघू म आय बर कहिन दूनोंझन आघू आके बइठगिन।पार्टी के अध्यक्ष दूनोंझन ल पूछे लागिस।एकबार दूनोंझन फेर सोच विचार लेवौ....अध्यक्ष समझावत कहिस।बैशाखू के एकझन समर्थक मुरली तेन ह खड़े होके गोठियाइस कि बैशाखू चुनाव लड़बेच करही।दूनोंझन के नांव लेके लाखा निकल देवा जेकर नांव निकलही तेन ह फारम भरही....समझावत किशन कहिस।किशन ठीकेच कहत हावे .....जवाहिर हं म हं मिलावत रहिस।लाखा म निकले के झन निकले बैशाखू चुनाव लड़बेच करही...मुरली अकड़त कहिस।
पार्टी जेन फइसला करहि तेन ल दूनोंझन ल माने बर परही.....अध्यक्ष समझावत कहिस।कस ग बैशाखू तैं बता कि पार्टी जेन फइसला करही तेन ल मानबे कि नहीं...... अध्यक्ष कहिस।तुमन कुछू करव मैं चुनाव लड़बेच करहूं...... बैशाखू कहिस।तैं बता मनराखन पार्टी जेन फइसला करही तेन ल मानबे कि नहीं...... अध्यक्ष कहिस।पार्टी जेन कहि देही तेन ल मैं माने बर तियार हंव......अध्यक्ष के पांव तरी गिर के मनराखन कहिस।मनराखन के सुभाव ह *अँजोरी रात के चन्दा अँजोर* कस फकफक ले ओग्गर दिख गिस।आखरी बार अऊ पूछत हंव बैशाखू पार्टी जेन फइसला करही तेन ल मानबे.......अधयक्ष समझावत फेरेच कहिस।मैं चुनाव लड़बेच करहूं मोर सबो समर्थक मन कहत हें......बैशाखू जवाब देवत कहिस।ओला पूरा आसरा रहिस कि जिला अध्यक्ष बनाय म मोर हाथ रहिस ते पाय के ओहर मोला जरुर प्रत्याशी बनाही।
बैशाखू पार्टी के फइसला ल नि मानत हे अऊ मनराखन पार्टी के फइसला मानहूं कहत हावे।येहर पार्टी के संग म हावे त मनराखन के नांव म पार्टी अपन सहमति दे देवत हावे।येहू बात घलो कहे गिस के जेन ह पार्टी के अधिकृत प्रत्याशी के विरोध म कारज करही तेन ल पार्टी कोती ले बाहिर के डाहर छै बछर बर देखा दिये जाही....अध्यक्ष फइसला सुनावत कहिस।
✍️ *डोरेलाल कैवर्त " हरसिंगार "*
*तिलकेजा, कोरबा (छ.ग.)*
****************************************
No comments:
Post a Comment