अगोरा हे राजभाषा के सियान के-*

 *अगोरा हे राजभाषा के सियान के-*

        नवम्बर महीना छत्तीसगढ़ी राजभाषा दिवस के सुरता देवाथे। अभी समाचार पत्र, सोसल मीडिया के माध्यम मन ले चारों मुड़ा ले राजभाषा दिवस मनाये के शोर देखे सुने ल मिलत हे। छत्तीसगढ़ी भाखा के प्रेमी चेतलग रखवार मन के ये उदीम ह सहुंराय के लाइक हे। अउ अइसन करना घलो जरूरी हे।

        हमर छत्तीसगढ़ राज ल बने 24 बछर पूरा होगे। छत्तीसगढ़ी राजभाषा आयोग बनगे हे। येकर बर 28 नवम्बर 2007 के विधेयक पास होगे हे। अउ 11 जुलाई 2008 के राजपत्र म प्रकाशन घलो होगे। तब ले हमन हर साल 28 नवम्बर ला छत्तीसगढ़ी राजभाषा दिवस मनात आवत हन। हमर छत्तीसगढ़ी भाखा हा लगभग दू करोड़ मन के महतारी भाखा आय।

        छत्तीसगढ़ी जइसे समृद्ध भाखा बर ये चिंता के बात आय कि पिछले छः बछर ले हमर राजभाषा आयोग ला सियान नइ मिल पाना। इहाँ राजभाषा आयोग के लाइक कतको गुणी छत्तीसगढ़ी भाखा के पोठ साहित्यकार, कवि  लेखक मन हवे। जेमन आयोग के मुखिया बनके भाषा के बढ़वार बर ठोसहा बुता कर सकत हे। ऐमे कोई शंका के बात नइ हे। अब 66 प्रतिशत ले ज्यादा छत्तीसगढ़ी बोलइया, समझइया मन ला नवा सरकार डहन ले आस हे। छत्तीसगढ़ी राजभाषा दिवस मा आयोग के अध्यक्ष के चयन कर जनमन के कामना ल पूरा करँय। का ये बखत राजभाषा आयोग के सियान मिलही? 28 नवम्बर के नवा सियान के अगोरा रही।

  

                  हेमलाल सहारे

        मोहगाँव(छुरिया)राजनांदगाँव