संपादकीय - 14(ब) 93-सुरता प्रभाकर चौबे जी

 संपादकीय - 14(ब)

93-सुरता प्रभाकर चौबे जी

प्रभाकर चौबे जी ह साहित्यकार के रूप म जाने जावत रहिन हें। ओमन साहित्यकार, पत्रकार, शिक्षाविद चिंतक, समीक्षक, प्रखर प्रतिभा के धनी रहिन हें। सुरु सरि सबल ऊर्जा देने वाला रहिन हैं। उंखर निधन 21 जून के होंगे। एक सुरुज अस्त होगे फेर ओखर ऊर्जा अड रोशनी सालों साल विद्यमान रइहि।

मैं ह सत्रह बछर ले प्रभाकर चौबे भैया ल जानत रहेंव। समय-समय म साहित्यिक कार्यक्रम म मिलत राहन। जनवरी 2003 म देशबन्धु के मड़ई अंक के संपादन बर आयेंव त मुलाकात होवत राहय। चौबेजी 25 बछर ले 'हाई वे चैनल' के संपादन करिन। ये एक इतिहास बनगे। 27-28 बहर ले स्तम्भ लिखत हें। ये भी एक इतिहास आय। एक बार बात होवत रहिस हे के, 'गिनीज बुक ऑफ रिकार्ड म नाम भेजना चाही। मोर मुलाकात प्रेस म हर सप्ताह मंगलवार के होवय। पहिली तो मैं जाके बइठतेंव त कखरो ले खबर भेजय के मिले बर आए। चार- महिना के बाद मोला समझ में आगे के आते ही मोला उंखर से बात कर लेना चाही। मैं अपन बैग रख के उंखर केबिन म चल दंव। सब ले पहिली वाक्य राहय' बने बने अउ कइसे चलत हे 'मड़ई' के पूरा जानकारी लेय के बाद सलाह देना शुरु करय। लेखक कवि मन ल पत्र लिखे कर, रचना बर विसय देय कर। मैं उंखर सलाह ल मानत मेंव।

सबले बड़े बात के लिखना अउ संपादकीय लिखना दुनों में बहुत अंतर होथे। येखर सीमा रेखा लाइन समीक्षा करके हर बार संपादकीय म का कमी हे या फेर का बात लिखे गे हे बतावय। येखर ले मोर लेखन म सुधार होवत गीस। 2006 म मोर छत्तीसगढ़ी निबंध संग्रह 'तरिया के आंसू' के भूमिका मै लिखवायेंव। संपादकीय म कोन से बात लिखना चाही अउ कोन से बात नई लिखना चाही येखर अंतर ल समीक्षा करके ही बताइन।तबियत खराब होये के कारन प्रेस में नइ जावत रहेंव त फोन करके तबियत भी पूछंय अउ पूरा पेज के समीक्षा भी करंय। बाद म चौबे भैया के भी प्रेस म जाना बंद होगे फेर फोन म बात होवत रहिस। हमेशा फोन म काहय 'लेखन करते रहना' पूरा मड़ई के बात करंय। संपादकीय के विसय बने रहितिस व बधाई जरूर देवंय। बने नई लगय त फोन म पहिली जोर से बोलतिन ओखर बाद काहयं, 'अगली बार से ध्यान रखना' डांट में भी अपनापन अउ परेम राहय। अभी कुछ समय पहिली रोटरी क्लब म एक कार्यक्रम म मिले रहेन। रायपुर के जुन्ना सुरता ऊपर कार्यक्रम रहिस हे तभे  बहुत जोश के साथ अपन सुरता मन ल सबके आगू म रखे रहिस हे। एक बार भी नई लगिस के अतेक जल्दी साथ छूट जही। 'हिन्दी साहित्य सम्मेलन' के शताब्दी समारोह में भी सक्रिय रहिन हे। 29-30 मार्च के निरंजन धर्मशाला म कार्यक्रम रहिस हे। मोर कविता सुने के बाद भी प्रतिक्रिया दिन।

देह के कमजोरी कभू मन ऊपर हावी नई होइस, सक्रिय रहिन हें। मन हमेशा जवान रहिस हे। चौबे भैया के जाना सच मन ल संवेदना ले भरत हे। फेर आज भी लगथे के हमर आस पास मौजूद हे अउ प्रेम के एक झिड़की तो मिलबे करही। भैय्या एक 'बर के रुख'रहिन हें।जेखर डारा पाना के नीचे अनगिनत मनखे बइठ के ओखर छाँव म सुख पावत रहिन हें। प्रेम से मोला 'बेटा'भी काहंय। मैं ह पितातुल्य बड़े भाई तो गंवा देंव फेर एक समीक्षक भी गंवा देंव। अतेक अपनापन दिखाने वाला बहुत कम मिलथे।

सुधावर्मा

1/7/2018 संपादकीय, मड़ई