गांव अभी दूरिहा हे
- डुमन लाल ध्रुव
गांव के आखिरी छोर मा पीपर रुख के पाना मन आज कुछ जादा ही खड़खड़ात रिहिन। हवा मा अइसन कुछु रिहिस के जइसे कोनो अनजाने दुख के खबर ल लेके आय होही। पीपर के नीचे बइठे सुदरशन अपन चिरहा गमछा ले माथा के पसीना पोछत रहय। ओखर आंखी मा दूरिहा रद्दा के धुर्रा तउंरत रहय। गांव के कच्चा रद्दा मा बिहने ले ही लोगन के आना-जाना लगे रहय। कोनो अपन घर के समान बांधत रहय, त कोनो अपन लइका मन ला समझावत रहय।
सुदरशन के उमर पचपन बछर के होगे रिहिस। देह हा सूख के कांटा होगे रिहिस फेर हाथ-पांव मा अभी घलो मेहनत करे के ताकत बाकी रिहिस। ओखर जिनगी के आधा हिस्सा दूसर के खेत मा धान रोपत, निंदाई करत अउ कटाई करत बीते रिहिस। ओखर दू एकड़ जमीन रिहिस फेर वो जमीन मा पानी के कोनो ठिकाना नइ रिहिस। बरसात बने हो जाय त धान के फसल, नइ त घर म भूख के दिन।
पिछले तीन साल ले गांव मा पानी के अकाल परत रिहिस। कुआं मन सूखागे रिहिन। तरिया के पानी हा गरमी मा चिखला मातगे रिहिस। खेत मन मा दररा हन दे रिहिस। किसान मन के चेहरा मा चिंता के लकीर मन गहिरा होगे रिहिस।
सुदरशन के बेटा सुकाल चार महीना पहिली कमाय बर रायपुर गे रिहिस। गांव के अउ दस-पंद्रह जवान मन घलो ओखर संग गे रिहिन। सबके मन मा एके सपना रिहिस - कुछ पइसा कमाबो, घर के हालत सुधारबो अउ फेर गांव लौट आहूं।
सुकाल के संग ओखर संगी परदेशी घलो गे रिहिस। परदेशी के घर मा बूढ़ी दाई अउ दू छोटे बहिनी रिहिन। ओखर बाप हा कुछ साल पहिली बीमारी मा मरगे रिहिस। घर के पूरा जिम्मेदारी परदेशी के ऊपर रिहिस।
गांव मा जब-जब कोनो मजदूरी के काम निकलय, परदेशी सबले पहिली पहुंचय। फेर गांव मा काम कतका दिन मिलय? धान के सीजन मा कुछ दिन, त बाकी समय खाली हाथ। इहीचे ले ओहू परदेश जाए के फइसला करिस।
गांव मा लोगन के पलायन अब नवा बात नइ रहिगे रिहिस। हर साल फागुन-चइत के महीना मा गांव के जवान मन अपन घर-दुवार छोड़ के शहर के रद्दा पकड़ लेवत रिहिन। कोनो ईंटा भट्ठा मा काम करे बर जावत रिहिस, त कोनो सड़क बनाय बर। कोनो कारखाना मा मजदूरी करत रिहिस, त कोनो बड़े-बड़े मकान के निर्माण मा।
गांव के बुजूर सियान मन कहत रिहिन, "हमर बेरा मा अइसन दिन नइ रगहिस। गांव मा खेती-बारी रिहिस, जंगल रिहिस, नदिया-नरवा रिहिस। पेट भरे के जुगाड़ हो जावत रिहिस। अब तो सब बदल गेहे।"
फेर गांव के जवान मन के लगे इन बात के जवाब नइ रिहिस। भूख अउ मजबूरी के आगू पुरखौती के कहानी कतेक दिन तक काम आही?
एक दिन बिहान के बेरा सुकाल के चिट्ठी आइस। चिट्ठी डाकिया हा सुदरशन के हाथ मा दे दिस। सुदरशन पढ़े-लिखे नइ रिहिस। ओहा चिट्ठी ला अपन छाती मा रखिस अउ गांव के इसकूल के मासटर के घर पहुंचगे।
मासटर हा चिट्ठी पढ़ के सुनाइस।
"ददा, इहां काम तो मिलत हे, फेर कमई कम हे। ठेकेदार हा दू महीना के पइसा नइ देहे। रहय के जगा मा बहुत दिक्कत हे। फेर चिंता झन करबे। मंय जलदीच पइसा भेजहूं।"
चिट्ठी सुन के सुदरशन चुप होगे। ओखर मन मा एक अजीब किसिम के डर समागे। ओला अपन बेटा के चिंता सताय लगिस। परदेश मा कइसन रहत होही? का खात होही? रात मा कहां सुतत होही?
घर आके ओहा अपन घरवाली सुशीला ला चिट्ठी के बात बताइस। सुशीला के आंखी मा आंसू आगे।
"कब तक अइसने चलही जी? लइका मन ला परदेश भेजे बर परथे। हमर घर मा तो अब कोनो नइहे।"
सुदरशन कुछु नइ बोलिस। ओहा घर के कोना मा रखे पुराना नांगर के मूठ ला देखत रहय। ओखर मन मा बीते दिन के याद आगे, जब सुकाल छोटे रिहिस। खेत मा धान के रोपा लगाय के बेरा ओहा अपन बाप के पाछू-पाछू चलय। चिखला मा खेलय अउ धान के पौधा ला उखाड़ के फेंक देवय। सुदरशन हा हंसत-हंसत ओला डांटय।
आज ओही लइका दूसर के शहर मा दूसर के ईंटा ढोवत होही।
गांव मा अब करमा के दिन नजदीक आवत रिहिस। गांव के चंउक मा रात मा नाचा होवत रिहिस। ढोलक के थाप अउ मांदर के आवाज दूर-दूर तक सुनाय देत रिहिस। फेर ए साल गांव मा पहिली जइसन रौनक नइ रिहिस। गांव के आधा जवान मन परदेश चल दे रिहिन। नाचा मा नचइया कम पड़गे रिहिन।
एक दिन गांव के लोक गायक नारायण दाऊ अपन घर के आगू बइठे रिहिस। ओखर उमर सत्तर के पार होगे रिहिस। गांव के लोगन के बीच ओहा अपन गीत अउ लोकधुन के कारण प्रसिद्ध रिहिस। जब ओहा गावत रिहिस त गांव के दुख-सुख सब ओखर आवाज मा समा जावत रिहिस।
ओ दिन ओहा अपन पुराना सारंगी ला निकालिस अउ धीरे-धीरे गुनगुनाय लगिस -
"तिपे चाहे भोंभरा झन बिलमो छांव मा, जाना हे हमला त गांव अभी दूरिहा हे..."
गीत के आवाज सुनके सुदरशन घलो आगे। ओहा पीपर के नीचे बइठगे। नारायण दाऊ गीत गावत रिहिस। गीत मा गांव के माटी के महक रिहिस। ओमा बिछोह के पीरा रिहिस, संघर्ष के आवाज रिहिस अउ गांव लहुटे के उम्मीद रिहिस।
सुदरशन हा धिरलगहा पूछिस, "दाऊ, ए गीत मा का कहे गेहे?"
नारायण दाऊ मुसकुराइस।
"ए गीत हमर जिनगी के बात कहिथे रे सुदरशन। मनखे कतको दूर चल दे, कतको परदेश मा कमाय बर भटकय, फेर ओखर मन मा अपन गांव के माटी बसे रहिथे। रद्दा मा कतको छांव मिलय, कतको सुख मिलय फेर अपन गांव के रद्दा अभी बाकी रहिथे।"
सुदरशन गीत के अरथ समझगे। ओखर मन मा सुकाल के चेहरा उभरगे। ओला लगिस के गीत हा ओखर बेटा के मन के बात कहत हे।
नारायण दाऊ फेर गाइस -
"तिपे चाहे भोंभरा झन बिलमो छांव मा..."
गीत के आवाज रात के अंधियारी मा दूर तक फइलगे। पीपर के पाना मन फेर खड़खड़ाय लगिन।
दू महीना अउ बीतगे। सुकाल के कोनो खबर नइ आइस। सुदरशन रोज डाकिया के रद्दा देखय। सुशीला रोज बिहनिया उठके तुलसी चौरा मा दिया बारय अउ भगवान ले अपन बेटा के कुशल-मंगल मांगय।
एक दिन गांव के बजार मा खबर आइस कि रायपुर के एक निर्माण इसथल मा मजदूर मन के ऊपर दीवार गिरगे हे। दू मजदूर के मउत होगे हे अउ कई झन घायल होगे हे।
खबर सुनते ही सुदरशन के कलेजा कांपगे। ओहा तुरंत सुकाल के मोबाइल नंबर मा फोन लगाइस। फेर फोन बंद बताइस।
सुदरशन हा पूरा रात करवट बदलत रिहिस। सुशीला घलो जागत रिहिस। दुनों के मन मा एके डर समाय रिहिस।
दूसर दिन सुदरशन गांव के सरपंच के घर गिस। सरपंच हा किहिस, "तोर बेटा के नंबर दे। मंय अपन जान-पहचान के आदमी ले पता करवाथों।"
तीन दिन बाद खबर मिलिस के सुकाल सुरक्षित हे फेर ओखर संगी परदेशी घायल होगे हे। ओला अस्पताल मा भर्ती करे गेहे।
ए खबर सुनके सुदरशन के मन मा थोड़ी राहत आइस। फेर परदेशी के दाई के दुख ओला भीतर ले हिला रख दिस। परदेशी के घर मा अब कमाय वाला कोनो नइ रहि गे रहिस।
गांव के लोगन हा चंदा करके परदेशी के दाई ला कुछ पइसा देइन। सुदरशन घलो अपन घर मा रखे धान के दू बोरा बेच के कुछ पइसा दे दिस।
सुशीला हा पूछिस, "हमर घर मा खुदे अनाज नइ हे, फेर दूसर के घर बर काबर देत हव?"
सुदरशन हा धीरे ले किहिस, "आज ओखर बेटा अस्पताल मा हे। काल हमर बेटा घलो अइसने हालत मा हो सकथे।"
सुशीला चुप होगे।
कुछ दिन बाद सुकाल गांव लहुटिस। ओखर देह हा दुबला होगे रिहिस। चेहरा मा थकान साफ दिखत रिहिस। ओखर हाथ मा एक झोला रिहिस अउ झोला मा कुछ कपड़ा।
सुदरशन हा बेटा ला देखते ही ओखर कंधा पकड़ लिस। सुशीला हा ओला छाती ले लगा लिस। दुनो के आंखी मा आंसू छलकगे।
सुकाल हा किहिस, "ददा, अब मंय परदेश नइ जांव।"
सुदरशन हा ओखर चेहरा देखिस। ओला लगिस के ओखर बेटा हा अचानक बड़का होगे हे। चार महीना के परदेश हा ओखर उमर मा कई बरस जोड़ दिस रिहिस।
"का होइस बेटा?"
सुकाल हा बताय लगिस के ठेकेदार हाइ मजदूरी के पइसा नइ दिस। कई दिन तक सब मजदूर मन भूखा रिहिन। जिहां रहत रहेन उहां पानी अउ बिजली के सुविधा घलो नइ रिहिस। रात मा सब मजदूर एके कमरा मा सुतत रेहेन। बीमारी होय मा दवाई के जुगाड़ नइ रिहिस।
"ददा, हमन शहर मा मकान बनाथन फेर हमर खुद के रहय बर ठिकाना नइ हे। दूसर मन के घर मा रंग-रोगन करथन, फेर हमर घर के छानी हा आज घलो टपकत हे।"
सुदरशन हा कुछु नइ बोलिस।
सुकाल हा फेर किहिस, "परदेशी के हालत देख के मोर मन घलो टूटगे। ओखर इलाज बर पइसा नइ रिहिस। हमन सब मिलके चंदा करेन। अब ओहा गांव लहुटगे हे।"
सुदरशन हा बेटा के पीठ थपथपाइस।
"बेटा, गांव मा गरीबी हे, दुख हे, फेर अपन मनखे मन घलो हे।"
सुकाल के लहुटे के बाद गांव के कतको जवान मन घलो वापस आगे। फेर गांव मा काम के समसया जइसन के तइसन रिहिस। खेत सुखाय रिहिन। तरिया मा पानी कम रिहिस। वीबी - जी रामजी के काम के मांग करे बर लोगन पंचायत मा जावत रेहेन फेर काम के इंतजार लंबा हो जावत रिहिस।
एक दिन गांव के चंउक मा बइठक रखे गिस। गांव के लोगन मन एकट्ठा होइन। सुदरशन, नारायण दाऊ, सरपंच, मासटर अउ गांव के जवान मन घलो आइन।
सुकाल हा किहिस, "हमन परदेश मा बहुत दुख झेलेन। अब गांव मा कुछू काम करे के उपाय खोजे बर परही।"
एक झन बुजुर सियान हा किहिस, "बेटा, गांव मा काम कहां हे? खेत मा पानी नइहे। जंगल कटगे हे।"
मासटर हा किहिस, "गांव के तालाब ला गहिरा करे जा सकथे। खेत तक पानी पहुंचाय के उपाय करे जा सकथे। वीबी - जी रामजी मा काम के मांग करे जा सकथे।"
सरपंच हा घलो सहमति जताइस। फेर काम के बात कागज मा रहि जाय, ए डर सबके मन मा रिहिस।
नारायण दाऊ हा अपन लाठी टेकत उठिस।
"तुमन सब जानथव, गांव के माटी हा कभू धोखा नइ देय। फेर माटी ला जिंदा रखे बर मेहनत करे ला परथे। हमन सब मिलके तालाब के काम शुरु करवाबो।"
गांव के लोगन मन सहमति देइन। अवइया हफ्ता ले तालाब के सफाई अउ गहरीकरण के काम शुरु करे के फइसला होइस।
काम शुरु होइस। बिहनिया होतेच गांव के लोगन मन रापा, कुदारी अउ टोकनी लेके तरिया पहुंच जावत रिहिन। सुकाल अउ ओखर संगी मन सबले आगू रिहिन। सुदरशन घलो अपन उमर के परवाह नइ करके काम मा हाथ बंटावत रिहिस।
सुशीला अउ गांव के दूसर महतारी मन मजदूर मन बर पानी अउ भात लेके आवत रिहिन।
धीरे-धीरे तरिया के माटी निकले लगिस। बछर भर ले सूकखा तरिया के पेट हा फेर खुले लगिस। लोगन के चेहरा मा उममीद के चमक दिखे लगिस।
काम करत-करत सुकाल हा एक दिन अपन ददा ल किहिस, "ददा, अगर गांव मा अइसने काम मिलत रहितिस त हमन परदेश काबर जातेन?"
सुदरशन हा मुसकुराइस।
"बेटा, ए सवाल के जवाब अब हमन ला मिलके खोजे बर परही।"
तरिया के काम पूरा होइस त गांव के लोगन मन एक-दूसर ला बधाई देइन। बरसात के पहिली पानी भराय के उममीद जागगे।
नारायण दाऊ हा तरिया के तीर बइठके अपन सारंगी निकालिस। ओहा धीरे-धीरे उही गीत ला गुनगुनाय लगिस -
"तिपे चाहे भोंभरा झन बिलमो छांव मा, जाना हे हमला त गांव अभी दूरिहा हे..."
सुकाल हा गीत सुनत रिहिस। ओखर मन मा शहर के ऊंचा-ऊंचा मकान, धूल भरे सड़क अउ मजदूर मन के भीड़ के दृश्य घूमगे। फेर अब ओखर आंखी के आगू अपन गांव के तरिया, पीपर के छांव अउ अपन ददा के चेहरा रिहिस।
बरसात के पहिली झड़ी गिरिस। सूकखा धरती मा पानी के बूंद मन गिरत माटी के सोंधापन चारों ओर फइलगे। खेत के मेड़ मन मा हरियाली दिखे लगिस। तरिया मा पानी भराय लगिस। गांव के लइका मन खुशी मा तरिया के तीर दउड़त रिहिन।
सुदरशन अपन खेत के मेड़ मा खड़े होके पानी ला देखत रिहिस। ओखर आंखी मा संतोष के चमक रिहिस। सुशीला हा घर के अंगना मा धान के बीज सुखावत रिहिस। सुकाल हा खेत मा नांगर जोते बर बइला ला तइयार करत रिहिस।
कई महीना बाद गांव मा फेर खेती के चहल-पहल शुरु होगे। लोगन मन अपन खेत मा काम करे लगिन। कुछ जवान मन अब घलो परदेश जाए के तइयारी करत रिहिन, काबर के गांव मा सबो मनखे बर पहिली जइसे काम नइ रिहिस। फेर ए बखत गांव के लोगन मन अपन गांव मा रोजगार के साधन बढ़ाय के बात करे लगिन।
नारायण दाऊ हा पीपर के खालहे बइठे-बइठे सब देखत रिहिस। ओखर चेहरा मा एक अजीब संतोष रिहिस। ओला लगत रिहिस के ओखर गीत के अरथ आज गांव के लोगन मन समझत हे।
एक दिन सुकाल हा अपन ददा ले किहिस, "ददा, मंय शहर के काम सीखे हंव। अगर गांव मा कुछ नवा काम शुरु होय त मंहू मदद कर सकथंव।"
सुदरशन हा किहिस, "बेटा, गांव के भलाई मा जेन काम होही ओमा हमन सब मिलके हाथ बंटाबो।"
सुकाल हा अपन ददा के चेहरा देखिस। ओखर मन मा अब परदेश जाए के डर कम होगे रिहिस। ओला लगत रिहिस के गांव मा रहिके घलो जिनगी के रद्दा खोजे जा सकथे।
एक दिन संझा के बेरा नारायण दाऊ हा फेर गीत गाइस। गांव के लइका मन ओखर चारों मुड़ा बइठगे रिहिन। सुदरशन, सुकाल अउ सुशीला घलो उहां आगे रिहिन।
नारायण दाऊ के आवाज मा अब पहिली जइसे दम नइ रहिगे रिहिस, फेर गीत के भाव अउ गहिरा होगे रिहिस।
"तिपे चाहे भोंभरा झन बिलमो छांव मा, जाना हे हमला त गांव अभी दूरिहा हे..."
सुकाल हा धिरलगहा गीत के आखिरी पंक्ति ला दोहराइस। ओखर आंखी मा अपन गांव के सपना चमकत रिहिस।
ओला अब समझ मा आगे रिहिस के गांव छोड़ना मजबूरी हो सकथे, फेर गांव के दुख-दर्द ला छोड़ देना मनखे के बस मा नइहे। गांव के माटी, गांव के मनखे अउ गांव के अपनापन हा मनखे के जिनगी के असली पूंजी आय।
पीपर के पाना मन हवा मा फेर खड़खड़ाय लगिन। दूरिहा खेत मा मेचका मन टर्राय लगिन। तरिया के पानी मा बुड़ती सूरुज के लालिमा चमकत रिहिस।
गांव मा अभी घलो गरीबी रिहिस, बेरोजगारी रिहिस अउ कई समसया मन बाकी रिहिन। अब पहिली जइसे सब कुछ बदलगे रिहिस। फेर गांव के लोगन मन के मन मा एक नवा उम्मीद जागगे रिहिस।
नारायण दाऊ हाइ अपन सारंगी ला समेटिस अउ मुसकुरात किहिस, "रद्दा लंबा हे रे बेटा, फेर चलना बंद नइ करना हे।"
सुकाल हा अपन ददा के हाथ पकड़ लिस। दुनों के नजर खेत के पार गांव के आखिरी छोर मा खड़े पीपर ऊपर टिकगे।
सूरुज नरायन बुड़गे रिहिस। अंधियारी हा धीरे-धीरे गांव ला अपन आगोश मा लेवत रिहिस। फेर गांव के घर मन मा दिया बरत रिहिन। अउ वो दिया हा जइसे एक नवा उममीद के संकेत देवत रिहिस।
गांव अभी दूरिहा हे। मंजिल अभी बाकी हे।
- डुमन लाल ध्रुव
मुजगहन, धमतरी (छ.ग.)
पिन - 493773
No comments:
Post a Comment