गरहन*

 *गरहन*

कखरो देखा-देखी करे ले जिनगी म दुख के बादर घपटे लगथे। मनखे अपन दुख ले कमती, परोसी के सुख ले जादा दुखी रहिथे। परोसी के सुख हजम नइ कर सकय। फेर जे मनखे परोसी के सुख चाहथे, ओकर ले सुखी अउ कोनो नइ हो सके।

जिनगी तो अपन आय, अपन ढंग ले जीना चाही। यहू हे कि मनमाने ढंग ले मनमानी घलव नइ करना चाही। ए जिनगी म घर-परिवार अउ समाज के घलव हक होथे। घर-परिवार जउन जन्म देहे के संग ननपन ले पाल-पोस के बड़े करे हे। खाय-पीए बर दाना-पानी, ओढ़े-बिछाय अउ पहिने बर ओनहा अउ कपड़ा-लत्ता जइसन जरूरी सरी बेवस्था करथे। समाज ह तइहा ले चले आवत हे। जब संविधान घलव नइ रहिस हे। इही समाज के बनाय कानून-कायदा याने नियम सब ल माने परथे। समाज जउन ल मनखे डर्राथें, लोगन झेंपथें। काबर कि समाज के बिगन मनखे के गुजारा नइ हो सकय। तभे तो अरस्तू बबा ह कहे हे, ' मनुख सामाजिक प्राणी हरे, जे मनुख समाज म नइ रहय ओ ह देवता ए नइ ते जानवर आय। ' 

ए अलग बात आय कि चतुरा मनखे मन अप्पड़ मनखे ऊपर धाक जमाय बइठे रहिन। शिक्षा ल पोटारे रखे रहिन। सुरुज देव ल बादर ह भला कतेक दिन ले छेंके पाथे। रतिहा के अँधियारी ह फुलफुलावत बिहना के अँजोर के परछो पात्तेच पल्ला भागे लगथे। वइसने शिक्षा के अँजोर ल कपटी मन कतेक दिन ले रोके पातिन। शिक्षा के अँजोर बगरे लगिस। धीरलगहा शिक्षा के उजियारी ले सबो अपन हक ल जाने लगिन हें। 

अशिक्षा जिहाँ-जिहाँ रहिथे, उहें-उहें शोषण करइया मन पाँव जमाथें। तरा-तरा के भय-भूत ले डरवावत लूट मचाय रहिथें। आजो चतुरा मन गरीब अउ अप्पड़ मन के शोषण करे म नइ डर्रावत हें। 

इही अशिक्षा अउ अज्ञानता के अँधियारी ल चीर के श्यामू ह समाज ल अँजोर बाँटत हाँसी-खुशी अपन जिनगी जियत रहिस हे। 

        

श्यामू जेन बीस-बाइस बछर के उमर म सरकारी नउकरी पागे रहिस। ओहर पढ़ई-लिखई म बड़ हुशियार रहिस हे। एकर प्रमाण ओकर पढ़ते-पढ़त नउकरी लगना हर आय। समे आगू बढ़त गिस। 

नउकरी करत चार बछर बीतगे। ओकर बिहाव के जोखा होइस। अक्ति के शुभ मुहुरत के दिन। गोधुलि बेला। सिलियारी गाॅंव के किसना संग सात भाॅंवर परगे। पुन्नी के चंदा जस घात सुग्घर गोल चेहरा के किसना। फकफक ले उज्जर रंग। 

सुख के छाॅंव म दिन बीते के आरो नइ लगय। सुख के छाॅंव म खुशी के दिन घलो अमरगे। श्यामू अउ किसना के मया के नान्हें फूल ॲंगना म ममहाय लगिस।

घर म उछाह मंगल मनाय गिस। पारा-परोस के मन छट्ठी चहा के संग छट्ठी भात घलव खाइन। बनेच सगा-पहुना सकलाइन हें। पारा-परोस के साहमत ले सगा-पहुना के स्वागत म कोनो किसम के कमी नइ होइस। 

श्यामू के ससुराली पहुना अउ ममा-फुफू के जुरियाये सगा मन बड़ उछाह मनाइन। रतिहा घात बेरा ले रमायन होइस अउ जुरमिल के सबो झन श्यामू के बाबू ला अशीष देवत सोहर गाइन अउ नाचिन कुदिन। आजे रमायण के छेवर म लइका के नाँव धरिन - महेश।

          

जिनगी म सुख के दिन रहिथे त दिन कइसे पहाथे गम नइ मिलय। समे फुर्र के उड़ जथे। कोनो गोठबात ला लहुट के सुरता करबे त काली च के बात लागथे। 

फेर देखते-देखत दिन महिना करत कतको बछर गुजर गे रहिथे।... श्यामू के बेटा बने बाढ़गे रहिस। लिखई-पढ़ई घलव बने कर डरे रहिस। स्कूल म अपन सँगवारी मन म अव्वल राहय अउ कक्षा म चौथा पाँचवाँ आतेच राहय।

        

एती श्यामू ह नउकरी के बुता संग समाजिक कारज म भिंड़े राहय। अतराब भर म ओकर समाज सेवा अउ सहयोग के भावना के शोर फइले रहिस। गरीब मनखे अउ रुचि लेके पढ़इया लइका मन बर ओहर दूनो हाथ ले सहयोग करँय। ए बुता करत ओहर घर म अपन जिम्मेदारी ल घलव पूरा करत रहिस। कभू कोनो ला शिकायत करे के मउका नइ दिस। समाज म फइले कतकोन बुराई अउ कुरीति ला मेटे बर घलव बाना धरे रहिस। 

नशाखोरी, दहेज, बाल बिहाव, बालश्रम, जइसन समाजिक समस्या बर समाजिक चेतना लाय के सरलग उदिम करय। अपन ए बुता करत श्यामू कभू ए नइ सोचिन कि लोगन मोर नाँव लय। एकर आड़ म ओहर कभू राजनीति करना चाहबे नइ करिस। अइसे तो कतकोन मन समाज सेवा ले राजनीति म जाय के रस्ता चतवारथें। चार महीना बरोबर समाज सेवा करे नइ राहय अउ राजनीति म बड़का पद पाय के सपना सँजोय लगथे।

        

पढ़ई-लिखई पूरा करे के पाछू महेश मनचाहा बुता नइ मिले ले बइठांगुर होगे। ठलहा रेहे ले दिनभर लठंग-लठंग घूमई होइस। संगति म बिगड़े धर लिस। ...सबो किसम के नशा पानी, जुआ, सट्टा अब ओकर आदत बनगिस। 

श्यामू बर दीया तरी ॲंधियार सहीं होगे। ओहर बड़ उदिम करिस। अपन मनपसंद के दुकान चलावय। नउकरी तो अब प्रतियोगिता परीक्षा पास करे के पाछू लगथे। ए श्यामू ला पता हे। फेर महेश एती बर चेत नइ करिस। अउ ओकर जोंगे कोनो बुता ला पसंद नइ करिस। 

उल्टा कहे लगय- "मैं दूकान खोलके दिनभर बइठे नइ राहँव। मैं दूकान म बइठ के पिंजरा के मिट्ठू सहीं नइ धँधावँव।" श्यामू अब करतिस त करतिस का? पइसा तो हे, ...फेर पानी बरोबर बोहाय नइ जा सकँय। 

         

श्यामू सोचे नइ रहिस कि कभू अइसन नौबत घलव आही। हमरे लइका हमरे बात नइ मानही। बदलत हवा के रुख ले अनजान रहिस श्यामू ह।  "महेश बेटा! नशा करथच ठीक हे, फेर जतका पीना-खाना हे घर म कलेचुप ले आन के पी ले कर। घर म कलेचुप रेहे कर।" अइसने कहिके बरजय, फेर महेश एको आना नइ गुनय। 

उल्टा कहे ला धर लय, मोर पियई-खवई ले तैं जलथस। 

संसार म अइसन कोनो दाई-ददा नइ हें जेन अपन लइका के बिगाड़ चाहीं। ए बात शायद महेश ला पता नइ हे। या फेर नशा ह ओकर मति ला हर लेहे। 

            

महेश ददा श्यामू के जम्मो मान-सम्मान ला माटी म मिलाय धर लिस। मंद-मउहा पीके गली म गिरे-परे राहय। जन-जन मेर उधारी कर के जुआ अउ सट्टा म पइसा ल हार जवय। श्यामू के भलमनसाहत ला देख के लोगन महेश ला पइसा दे म आना-कानी नइ करिन। 

श्यामू महेश के ननपन म लोगन ला कहि तो दे रहिस हे, महेश ह जब कभू तुॅंहर मन ले कुछु माॅंगही दे दे करहू। ओकर इही गलती आज ओला भारी परत हावे। 

बेटा के करे करजा छुटत ले श्यामू हलाकान हो जावत हे। अब ओकर नउकरी के पइसा घलव पूर नइ परत हे। सातवां वेतन के पइसा कमती परत हावे। 

करजा छुटय त जेब खाली हो जात रहिस। अउ करजा चुकता नइ करँय त जगा-जगा बदनामी के डर सताय लगय। श्यामू संसो के अरझट म अरहजगे। चार झिन तिर बइठइया मनखे लाज म मुॅंह लुकाय धर लिस।

बात-बात म एक दिन महेश संग एक झन के झगरा बाढ़ गे। दूसर मनखे ककरो ला कतेक दिन ले सुन ही अउ सइही। 

 

पता चले म श्यामू गिस अउ बिनती करे लागिस। 

“बात बढ़ाव झन भाई। मैं देख लेहूॅं।”

फेर ओहर काला देखही?

जेकर आगू रोज नवा-नवा अड़चन अउ दृश्य खड़ा हो जथे।

वो आदमी जे गाँव के लोगन ला नशा ले बाॅंचे रहे के संदेश देवय। अपने बेटा ला नशा ले उबार नइ पावत हावे।

इही विरोधाभास ओला भीतरे-भीतर खाए लगिस। 

सच आय दुख ल गोठियाय ले मन के बोझा थोरिक कमती हो जथे। फेर श्यामू गोठियाय त  गोठियाय काखर तिर? घर म बेटा ह रोजेच झगरा मतावय। 

परोसी मन ला घलव गारी देवय। परोसी मन श्यामू के हियाव करत कलेचुप रहि जावँय। कोनो दूसर के लइका रहितिच त थाना कछेरी के नौबत घलव आ जतिस। बात श्यामू के बेवहार ले सकलागे। थाना कछेरी के मुंहाटी नइ गिस।

एकर बाद श्यामू एकदम बदलगे।

स्कूल ले घर।

घर ले स्कूल।

ओकर दुनिया समेटागे रहिस।

घर ले स्कूल अउ स्कूल ले घर अतकी रहिगे ओकर दुनिया।

सामाजिक बैठक मन म जवई बंद कर दिस। लोगन मन घर अवई-जवई बंद कर दिस। ककरो ले जादा बातचीत करई घलो बंद होगे।

ओकर घर म अब पहली जइसे चहल-पहल नइ रहिगे हे।

रातकुन कई पइत ओहर ॲंगना म अकेल्ला बइठे अगास ला  देखत राहय। ओला लगय, जइसे ओकर जिनगी के उज्जर अगास म कोनो उदुप ले करिया चद्दर ढाॅंक दिस हे।

ओकर मन काकरो मेर बइठ के गोठियाय के नइ होवत रहिस। मन टूट गे राहय।

सियान मन कहे हें- 'अपन हितवा करा दुख गोठियाय ले अधिया जथे।' 

दूसर दिन महेश पैसा माँगिस।

श्यामू मना करिस।

महेश घर के जम्मो बर्तन भाड़ा मन ला पटके लगिस

“पैसा दे!”

“नइ हे।”

“झूठ बोलत हावस।”

“अब नहीं दे सकॅंव।”

“तो मैं मर जहूॅं।”

श्यामू हाथ-पाँव जुड़ाए लगिस।

महेश कपाट ला जोर से धकेलिस अउ घर ले बाहिर निकल गे।

श्यामू बहुतेच बेरा ले कपाट ला देखते रहिगे।

ओकर आँखी के आगू महेश के बचपन घूमे लगिस।

पहली पइत स्कूल जाय के दिन।

पहली घउ पुरस्कार मिले के दिन।

बीमारी म अपन गोद म सोय महेश।

अउ आज के महेश—

नशा म बुड़े,  बाप ला लड़त, परिवार ला टोरत।

श्यामू मुड़ी धर लिस।

श्यामू मनेमन अपन आप ला बोधावय अउ काहय - "मनखे दुनिया ले लड़ लिही अउ जीत घलव जही, फेर अपन घर ले नइ लड़ पावय। जीतई तो दुरिहा आय। बेटा ले पार पाना तो अउ मुश्किल होथे।" 

         

श्यामू हलाकान होगे राहय। ओकर मन उचट गे। तरा-तरा के विचार ओकर मन म हिलोर मारे लगिस। सरी मान-सम्मान माटी म मिलत जात रहिस। 

एक दिन श्यामू स्कूल जाय बर घर ले निकलिस।

महेश ओ बखत घर म नइ रहिस।

“स्कूल ले झटकुन लहुट जहूॅं,” ओहर किसना ले कहिस अउ निकल गिस।

फेर वह स्कूल नइ पहुँचिस।

संझा होगे।

रतिहा होगे।

मोबाइल बंद।

स्कूल वाले मन ले पता करे गिस। उहाॅं ओहर गेच नइ रहिस।

घरवाला मन तिरतखार म खोजिन।

बस-स्टैंड, बाजार, तालाब, खेत—जिहाँ-जिहाँ संभव रहिस, लोगन खोजत रहिन।

कोई सुराग नइ मिलिस।

एक दिन बीतगे।

दूसर दिन।

तीसर दिन।

अउ चउथइया।

श्यामू के कहूॅं कोनो पता नइ चलिस।

गाँव के चौक म अब इही चर्चा होय लगिस—

“श्यामू कहाँ चले गिस?”

“कहूॅं बाहर चल दिस होही।”

“बिना बताए?”

“शायद परेशान होके चल दिस होही।”

कोनो कुछ पक्का नइ कह पावत हे। 

---

पचवइया दिन महेश अकेला घर के ॲंगना म बैठे हावेथा।

आगू म माढ़े ददा के खाली खटिया।

ओहर बिक्कट बेरा ले उही खटिया ला देखत रहिस।

पहली घउ आय जब ओकर हाथ म न शराब हे, न जुए के पत्ता।

 धिरलगहा आरो करत हावे—

“ददा...”

ओकर आवाज नरी म अटक गे।

कोनो उत्तर नइ आइस।

ॲंगना म सिरीफ सन्नाटा हावे। भयंकर सन्नाटा।

अउ कोठ म लटके घड़ी सरलग टिक-टिक करत हावे।

महेश के आँखी के कोर ले आँसू बह निकले लगिस।

शायद बहुत देर म ओहर समझ म पाइस कि ओ का गॅंवा डरे हे।

---

गाँव के चउक म इही बात के शोर हावय कि समाज म फइले बुराई मन के गरहन कभू भी कोनो ल धर सकत हे। हम सब ला अइसन राहू ले बाॅंचे के उदिम करे ला परही।

बुराई मन के गरहन अचानक नइ लगय। ओहर धीरे-धीरे जिनगी म चढ़थे। पहली एक आदत आथे, फेर दूसर। फेर उही आदत मन पूरा घर ला घेर लेथें।

नशा, जुआ, सट्टा अउ गलत संगति सिरीफ एक मनखे ला नइ लीलॅंय, ओकर ॲंधियार पूरा परिवार ला दबोच लेथें।

श्यामू ला गम नइ लगिस कि कब ए राहू ह ओला घेर लिस। 

— पोखन लाल जायसवाल

पठारीडीह (पलारी)

जिला बलौदाबाजार-भाटापारा, छत्तीसगढ़