डॉ. सत्यभामा आड़िल: छत्तीसगढ़ी अउ हिंदी साहित्य के सशक्त चिन्हारी

 डॉ. सत्यभामा आड़िल: छत्तीसगढ़ी अउ हिंदी साहित्य के सशक्त चिन्हारी

    डॉ. सत्यभामा आड़िल छत्तीसगढ़ के साहित्य जगत के एक बहुतेच सम्मानित, प्रखर अउ मर्माग्रही नाम आय। ओमन अइसन विदुषी, शिक्षाविद अउ साहित्य-साधिका रहिन, जेमन अपन लेखनी ले हिंदी अउ छत्तीसगढ़ी दूनों भाखा के भंडार ल समृद्ध करे हें। लगातार छै दशक ले उनकर लेखनी हा मध्यप्रदेश अउ छत्तीसगढ़ के साठोत्तरी हिंदी साहित्य के संगे-संग छत्तीसगढ़ी साहित्य मा अपन अनोखा योगदान दे हे। उनकर रचना-संसार मा भुइयाँ के महक, लोक-संस्कृति, मानवीय मया-दया अउ स्त्री  चेतना के अद्भुत मेल देखाई देथे।

डॉ. सत्यभामा आड़िल के जनम 1 जनवरी 1944 के ग्राम पंदर (पाटन), जिला दुर्ग मा होय रहिस। उनकर ददा के नाव खम्हन लाल वर्मा रहिस। गोंसइया के नाम प्रोफेसर मनहर लाल आड़िल रहिस।ओमन लइकापन ले भारी होनहार अउ साहित्य मा रूचि रखइया रहिन। ये बात उनकर शिक्षा, दीक्षा अउ साहित्यिक यात्रा मा साफ झलकत रहिस। ओमन अपन शोध प्रबंध घलो "संत धर्मदास: व्यक्तित्व व कृतित्व" विषय मा पीएच.डी. करके पूरा करिन, जेकर चर्चा चहुं कोती रहिस।

शिक्षा के क्षेत्र ले जुड़े रहे के सेती डॉ. सत्यभामा आड़िल के सोच मा वैचारिक सुघरई, शोधपरक दृष्टि अउ सामाजिक सरोकार गहिर ले समाय रहिस। ओमन कविता, गीत, उपन्यास, निबंध, शोध अउ समीक्षा जइसन  विधा मन मा लगातार सिरजन करिन। उनकर रचना मन सिरिफ हिरदे ल भावुक नइ करंय, भलुक सामाजिक जिम्मेदारी अउ जिनगी के मूल-मरम के बोध घलो कराथें।

प्रमुख कृति अउ उनकर साहित्यिक मोल:-

डॉ. सत्यभामा आड़िल हा हिंदी अउ छत्तीसगढ़ी मा कतकोन  कृति मन के सिरजन करे हें। उनकर प्रमुख कृति अउ रचना-संसार के रूप-रंग अइसन हे:

  'निःशब्द सृजन', 'क्वांर की दुपहरी', 'काला सूरज' उनकर कविता संग्रह आय।

  'प्रेरणा बिंदु से निर्वेद तट तक एक पुरुष' उनकर उपन्यास आय।

  'गोठ', 'रतिहा पहागे राजा', 'सउत कथा', 'तपत्कुरु' उनकर छत्तीसगढ़ी कहानी आय।

  'संत धर्मदास: व्यक्तित्व एवं कृतित्व' उनकर शोध ग्रंथ आय। उनकर संपादित ग्रंथ 'छत्तीसगढ़ी भाषा और साहित्य' आय।

 उनकर  वृत्तांत यात्रा संस्मरण 'पहाड़ की ढलान से समुद्र की सतह पर' अउ 'मेरी बस्तर यात्रा' आय। 'अपना सा लगता है घर' अउ 'लॉक डाउन में बाबूमोशाय' कहानी संग्रह आय। आलेख संग्रह 'लोक चेतना के स्वर' हे।

    ये जम्मो संग्रह डॉ. आड़िल के भीतरी चिंतन, मनखे-मनखे के नाता-गोता के ताना-बाना अउ जमाना के कुरीति मन ऊपर तीखा चोट ल देखाथें। उनकर उपन्यास, कहिनी अउ कविता मन मा भाखा मँजे-सँवरे अउ विचार जगाने वाला हे।

   डॉ. आड़िल के नारी विमर्श फोकट के नारा-बाजी ऊपर आधारित नइ हे, भलुक घरोइया अउ समाजी धरातल मा माई लोगन के मान-मरियादा, त्याग अउ भीतरी ताकत के पहिचान कराथे।

वरिष्ठ साहित्यकार सत्यभामा आड़िल जी के रचना ‘महू हँवव चंडी’ मा माई लोगन के शक्ति के बात कहे गे हे:

 "झन समझव मोला दबे कुचले, महू हँवव दुर्गा महू हँवव चंडी।

जेन हाथ ले रांधथव भात, ओही हाथ ले उठा सकथों तलवार।।"

माई लोगन सिरिफ सहइया के मूरत नोहे, उही हा समाज के धड़कन अउ सिरजन के नेव आय। जब तक ओकर अस्मिता ल बराबरी के अगास नइ मिलही, तब तक समाज के विकास अधूरा रहिही।

    मानवीय मोल अउ सामाजिक समरसता—जात-पात, वर्ग अउ लिंग के भेद ले परे एक बरोबर समाज के निर्माण उनकर कविता मन के मूल संदेश रहिस। ओमन सहज अउ मिलनसार सुभाव के धनी रहिन। डॉ. सत्यभामा आड़िल जी  सीधा-सादा अउ सहज सुभाव के रहिन। उनकर बोली मा मिसरी जइसन मिठास अउ अपनापन झलकत रहिस। उनकर कहानी-कविता मन ल त हमन पाठयक्रम मा पढ़ेच रहेन, फेर जब मैं हा उनकर ले आकाशवाणी केंद्र रायपुर मा "छत्तीसगढ़ी साहित्य, संस्कृति, अउ गीत मा नारी के दशा अउ दिशा" घर-अंगना गोठ-बात के बेरा मा साक्षात मिलेंव, तब उनकर अंतस के सुभाव के पता चलिस। गोठ-बात के बीच मा जब मैं दीदी ल कहेंव कि "दीदी, तुम्हर मइके पंदर अउ मोर मइके अरसनारा एक-दूसर ले लगे हे," त दीदी अउ मय दूनों भारी खुश होगेंन। दूनों झन मा अपन-अपन मइके ल लेके बनेच बेर तक गोठ-बात चलत रहिस अउ हमर बीच एक गहिर नाता बंध गे। ये गोठ-बात ले मोला दीदी के संग अपनपन के अनुभव होइस, अइसन लागिस जइसन ओमन मोर अपन बड़े दीदी या दाई समान आवंय। उनकर भीतरी घमंड तनिक भर घलो नइ रहिस। उनकर बेवहार एकदम सीधा अउ सहज रहिस। ओही बेरा असीस के रूप मा ओमन मोला अपन संपादित पोथी "छत्तीसगढ़ी भाषा और साहित्य" भेंट करिन अउ मय घलो अपन किताब मन ल ओमन ला सौंपेंव।

गोठ-बात सिराय के पाछू दीदी जी, संगीता वर्मा अउ मोला कहत रहिन कि "तुमन ले मिलके मोला एक ठन नवा उर्जा मिलिस। अइसन लागिस जइसन मैं घलो फिर ले जवान होगेंव।" ओमन संपादक वीरभान साहू जी ल कहिन कि "तैं जब घलो मोला आकाशवाणी केंद्र बुलाहू, त संगीता अउ पद्‌मा ल मोर संग मा जरूर रखिहू।" ये बात उनकर सहजता अउ भीतरी उर्जा के चिन्हारी रहिस। मोर बर उनकर संग ये हा पहली अउ आखिरी भेंट रहिस।

मान-सम्मान:-

मध्यप्रदेश शासन पंचायत विभाग कोती ले 'क्वांर की दुपहरी' ल 1978 मा पुरस्कृत करे गे रहिस। ओमन ल पंडित शारदा प्रसाद तिवारी सम्मान, ग्राम्य भारती सम्मान, हरि ठाकुर सम्मान ले नवाजे गे हे। एकर अलावा देश अउ परदेश स्तर मा घलो कतकोन सम्मान ले ओमन सम्मानित हो चुके हें।

      डॉ. सत्यभामा आड़िल के साहित्य हा छत्तीसगढ़ के सांस्कृतिक चिन्हारी अउ मानवीय मान-मरियादा के जीवंत आरसी आय। उनकर रचना मन नवा पीढ़ी के लिखइया मन बर सिरिफ प्रेम-प्रेरणा के स्रोत नोहे, भलुक ये घलो साबित करथें कि अपन माटी ले जुड़केच साहित्य हा जुग-जुग बर अमर हो सकथे। 20 अक्टूबर 2026 के उनकर सरग सिधारना साहित्य अउ शिक्षा जगत ले उनकर जाना एक अइसन नुकसान आय, जेकर भरपाई नइ हो सके। मैं आदरणीय डॉ. सत्यभामा आड़िल दीदी जी ल हिरदे ले विनम्र श्रद्धांजलि अरपित करत हँव । भगवान ये पुण्य आत्मा ल अपन चरण मा ठाँव देवँय।

माथा के टिकली, चेहरा के मुस्काव।

गुन के बखान करत, मन मा भरत भाव।।

साहित्य-शिक्षा समाज ला रद्दा देखइया,

सत्यभामा आड़िल के अमर हे नाव।।

डॉ. पद्मा साहू 'पर्वणी'

खैरागढ़