बड़े गुरुजी के बिदाई (छत्तीसगढ़ी हास्य व्यंग्य)

 बड़े गुरुजी के बिदाई

               (छत्तीसगढ़ी हास्य व्यंग्य)

            बड़े गुरुजी आजकल बिकट बियस्त हे।रिटायर होय बर अभी दस दिन बाँचे हे।कभू सोझ मुहूँ बात नइ करइया के मुंह ले मन्दरस चूहत हे।

बमरी म ममहावत गुलाब फुले हे। त इस्कूल के कम अउ गाँव फेरा जादा लगत हे। कभू सरपंच के घर,कभू किराना दुकान त,कभू पान ठेला त सेलून घलो।उसर-पुसर के एक्के डायलॉग -"हम तो भइआ तीस तारीख के रिटायर हो जाबो। बात के मरम भव्य बिदाई के चाह।" जेकर आघू इस्कूल हाथ जोड़ के खड़े रहय,आज उहि गाँव भर के हाथ-गोड़ जोड़त हे।पैंतीस साल ले लइका के हाजिरी लेवईया आज गाँव भर के हाजिरी लेवत हे।

              दूसर गुरुजी मन स्टाफ रूम म हाँसत कहिथें -"बड़े गुरुजी ल बिदाई के नहीं,भीड़ के डर हे।"डर घलो सही हे। पैंतीस साल के नौकरी म पंदरा झन घलो नहीं कमाईस, जे खुद ले आके कहय -"गुरुजी,आप मन के बिदाई हे,हमन ल आये बर हे।"जे बिदाई ल चेला मन ल रो-रो के करना चाही,आज गुरुजी खुदे रो-रो के करवावत हे।

             फेर वो दिन तो हदेच्च होगे।बड़े गुरुजी पन्नी धरके स्टाफ रूम म आइस।सब सोचे, जावत बेरा मिठाई लाय होही। गुरुजी पन्नी खोलिस। अंदर मिठाई नहीं,धागा रहिस।कहिथे -"लेव,मोर अंगूठी के नाप ले लव।"जम्मो स्टाफ सन्न। छोटे गुरुजी -"बड़े गुरुजी,ये का हे?"बड़े गुरुजी -"अरे भुला गेव? मोर बिदाई हे। अऊ बिदाई म का देथे? सोना के अंगूठी! परम्परा हे।" त दुसर गुरुजी कहिस-"परम्परा तो अपन मर्जी ले देय के हवे, आप खुद नाप काबर देवत हव?"बड़े गुरुजी -"तुमन आजकल के अव,तुमन ल परम्परा के पता नईहे। पहिली देय गे हवे, अब तुमन देहू। नइ त परम्परा टूट जाही। अऊ सुनव,दस ग्राम ले कमती के अंगूठी मोर अंगरी म छोटे होथे।" जे स्टाफ ल पैंतीस साल म कभू एक कप चाय बर तको नइ पूछिस,तेन ल काहत हे-"चंदा कर लेव, सोना मंहगा हो गे हे, दिल बड़े रखव। "खुद के बिदाई, खुद के नाप,खुद के पसंद।अऊ पइसा स्टाफ के। स्वर्ण अलंकरण! मतलब मंगई घलो, अऊ शान घलो। स्टाफ रूम ह धागा धरे सोचँय -अंगूठी लेन कि इस्तीफा देन। 'मतलब इमोशनल ब्लैकमेल के सरकारी वर्जन।'

        येती गाँव वाले सोचथे,गुरुजी रिटायर होवत हावय,कुछू तो देच्च बर परही। कोनो नरियर रुपिया देवत हे,त कोनो देनी-लेनी के कपड़ार्पण। गुरुजी पन्नी म भर-भर के सबो ल लेवत हे। हिसाब पक्का।कोनो पुछिस -"गुरुजी,बिदाई तो इस्कूल म होना चाही,आप गाँव म काबर घुमत हव? "गुरुजी कहिस -"इस्कूल म तो स्टाफ दिही,गाँव म तुमन। इस्कूल के बिदाई सरकारी, गाँव के बिदाई मोर निजी। दुनों जरूरी हे।"कमाल देखव तीस तारीख ले पहिली बिदाई वसूली सुरु।कंजूसी, चालाकी अऊ मंगईयापन- तीनों के कॉम्बो पैक।अँगूठी के नाप दे दे हावय,अऊ अब गाँव चंदा। "गाँव वाले घलो थक गे हावय। अब दिखतेच साट कहिथें -"हाँ गुरुजी,जानत हन,आप तीस के रिटायर होवत हव। भगवान बर अब घर जाव जी।"फेर गुरुजी मानही तब? कतको मन काहतेच्च हें- तीस तारीख पहिलीच्च आ जातिस।ओकर टारगेट हे - तीस तारीख तक हर घर ले बिदाई।अऊ तीस के बाद? एक तारीख ले फेर नया डायलॉग सुरु होही -"ले जी,पेंशन बनवाना हे,थोरिक सहयोग कर दव।"

           बड़े गुरुजी ल मालूम परगे, स्टाफ ले शर्ट पेंट जैकेट मिलही।फेर साध हे थ्री पीस सूट के। त फेर अपन जुन्ना संगी,जे रोज वोला फोकट म चाय-नास्ता करावय। उहि बपुरा के मूड म शनिच्चर कस चढ़गे। बड़े गुरुजी कहिस -"ले जी,रिटायर तारीख जानतेच्च हस,अऊ देख,मोर करा थ्री पीस सूट भर नइहे। संगी -"त ले लेबे न बड़े गुरुजी।"बड़े गुरुजी -"पइसा नइहे। चार एकड़ खेती खरीदे हँव सब चल दे हे। तहिच दिला दे,तँय तो रोज चाय- नास्ता करातेच्च हस,एक ठो सूट अऊ सही।" संगी तो आय जनम ले बेवहार निभईया। मना कइसे करय, फँस गे। दुकान लेगिस आठ हजार के थ्री पीस सूट दिला दिस।फेर बड़े गुरुजी सूट लेतेच डायलॉग मार दिस-"देखे, मँय कहत रेहेंव न,बस सूट भर नइ रिहिस। भगवान ह थ्री पीस दे दिस।"येती स्टाफ गोठियावँय -"अरे,ये तो उहिच संगवारी तो आय,जेन रोज मुड़ाथे? "हाँ,उही ल चुनिस हे,काबर कि वो मना नइ कर पाय।"मतलब प्लानिंग देखव। जे पैंतीस साल तक कोनो ले सीधा मुँह बात नइ करिस, रिटायरमेंट के नाँव म गाँव ले बिदाई वसूली कर लिस,स्टाफ ले सोना के अँगूठी के नाप दे दिस,सुगर के नाम म मिठाई अपन हिसाब ले मंगवा लिस,अऊ अब जुन्ना संगवारी जे दस साल ले चाय-नास्ता कराइस,ओखर ले थ्री पीस सूट हबक लिस। फोकट के मिले रसमलाई ल चाय कॉफी म मिंझार के खवई नानकुन बात नोहे। "कंजूसी के घलो एक लेवल होथे, फेर बड़े गुरुजी ओकर रिटायरमेंट कभू नइ करिन। "अऊ वो नवा सूट पहिन के आईना म देखत कथे-"ले जी, रिटायरमेन्ट पार्टी बर सूट तो फोकट म आ गे। चल तईयार होगेस का टूरा के दाई, घर म कुछू झन खा उँहे बने झोरबो। अउ हाँ, थैली घला धर ले रहिबे।"

       रोशन साहू 'मोखला'( राजनांदगांव)

                 7999840942