राष्ट्रीय अनुवाद दिवस विशेष ) *मैं गाँव के गुड़ी अवँ -निबंध संग्रह ले*)

 (राष्ट्रीय अनुवाद दिवस विशेष )

*मैं गाँव के गुड़ी अवँ -निबंध संग्रह ले*)

छत्तीसगढ़ी अउ अनुवाद के उपयोगिता

मूर्धन्य आचार्य मन मोटी मोटा 16 ठन कला बताय हें। एला अउ फइला दे जाथे त 64 ठन कला हो जाथे। ए कला मन म चित्र कला, नृत्यकला, संगीतकला, स्थापत्य कला , लेखन कला(काव्य कला) --आदि शामिल हें।

        काव्यकला ह मौखिक या लिखित ढंग ले दू रूप म पद्य नहीं ते गद्य रूप म दिखथे। ये काव्यकला ह बहुत कस विधा म दिखथे जइसे--महाकाव्य, खण्डकाव्य ,चम्पू काव्य, कहानी , उपन्यास नाटक, एकांकी,निबंध, आत्मकथा,जीवनी, अनुवाद आदि।

      ए विधा मन म कोनो बहुते पुराना त कोनो नवाँ नवाँ हें। कोनो विधा अबड़ेच प्रसिद्ध हे त कोनो ह अपन सहीं मान सम्मान के बेरा जोहत हें।

  जहाँ तक अनुवाद विधा के बात करन जेला आजकल विद्वान मन अनुवाद शिल्प , अनुवाद विज्ञान तको कहिथें कोनो न कोनो रूप म पुराना विधा आय तो फेर लेखन कला वाले मन वोला जादा नइ अपनाइन। अनुवाद ल बने पौष्टिक आहार नइ मिलिच तेकर सेती  बनेच दुब्बर-पातर होगे।

दुब्बर पातर भले हे फेर जइसे सेतू बनाये म नानचुक गिलहरी के योगदान बड़े हे ओइसने साहित्य के भंडार भरे म, ज्ञान के अँजोर बगराये म अनुवाद विधा कमतर नइये।

        छत्तीसगढ़ी साहित्य म अनुवाद विधा के का स्थिति हे ,वोकर योगदान कतका हे ,अउ छत्तीसगढ़ी भाखा म अनुवाद करे बर का उदिम चलत हे तेला जाने समझे के पहिली अनुवाद के काया माया ल समझना जरूरी लागत हे।

अनुवाद आय का---अनुवाद म वाद हाबय । वाद ह संस्कृत के वद धातु  ले बने हे जेकर मतलब होइच बोलना।एमा अनु उपसर्ग लगगे त अर्थ होगे  आन बोलिच तेला कोनो आन भाषा म बोलना।जेन ल दूभाषिया कहिथन तेन मन इही काम करथें।

    अनुवाद ह बोलइ तक सिमित नइये ।त एला अइसे भी कहि सकथन कि आन भाषा म बोले या लिखे ल आन भाषा म बोलना या लिखना अनुवाद आय।

      अनुवाद ल हिंदी म उल्थी तको कहिंथे जेकर मतलब उलटना होथे।

शब्दार्थ चिंतामणि ग्रंथ म उल्लेख हे--- प्राप्तस्य पुनः कथने$नुवाद:। मतलब ककरो कहे/लिखे ल दुबारा आन भाषा म कहना/लिखना अनुवाद आय।

जैमिनी न्यायमाला ग्रंथ ह कहिथे-- ज्ञातस्य कथनंनुवाद:। पहिली ले मालूम हे तेला फेर (आन भाषा म) कहना/लिखना अनुवाद आय।

अनुवाद के जरूरत काबर-- अनुवाद के जरूरत दू कारण ले हे ---

1स्वरूचि---अपन ज्ञान ल बढ़ाय बर।स्वांत:सुखाय(खुशी)बर। 

आधुनिक काल के प्रसिद्ध अनुवादक, जेला कई विद्वान आधुनिक काल के पहिली अनुवादक मानथे- रोम के दार्शनिक सिसरो ह कहे हे--अपन वकृत्वकता( अभिव्यक्ति क्षमता) ल बढ़ाये बर ग्रीक भाषा के लैटिन भाषा म अनुवाद करे हँव।

2 सामाजिक आवश्यकता---अनुवाद करे के ये मुख्य जरूरत आय। आन भाषा मन के ज्ञान ल, साहित्य ल आन भाषा म समझे बर अनुवाद जरूरी हे।

       आजकल पढ़े लिखे बर, रोजी मजदूरी बर ,व्यापार बर ,राजनीतिक, साहित्यिक ,सामाजिक सभा समाज म जुरियाय बर एक जगा ले दूसर जगा ,आय जाय ल परत हे त विचार विनमय बर अनुवाद जरूरी होगे हे।

आधुनिक युग म विज्ञान, प्रौद्योगिकी के भाषा के पुस्तक मन आन भाषा म हे त वोला समझे बर तको अनुवाद जरूरी हे।

          ओइसने विश्व के निवासी मन के, एक दूसर के संस्कृति ल समझे बर अनुवाद जरूरी हे।

अनुवाद के प्रकार-- अनुवाद ल अलग अलग आधार ले के कई प्रकार ले बाँटे गे हे जइसे--

गद्यानुवाद--गद्य के गद्य म अनुवाद(भाषा बदल के)

महाकवि नागार्जुन द्वारा मेघदूतम(संस्कृत)के अनुवाद।

पद्यानुवाद--पद्य के पद्य म अनुवाद(भाषा बदल के)

मेघदूत, ऋतुसंहार, कुमार संभव,गीतांजलि आदि के कई भाषा म पद्यानुवाद होये हे।

नाट्यानुवाद-- संस्कृत भाषा के नाटक मन के या शेक्सपियर के नाटक मन के आन भाषा म नाटक रूप म।

कथानुवाद--उपन्यास या कहानी मन के अनुवाद।

आधुनिक युग म कहानी के पिता मोपासाँ अउ कथा सम्राट मुंशी प्रेमचंद जी के कहानी मन के अनुवाद।

शब्दानुवाद---लिपि भर ल बदल के शब्दस: लिख देना। जइसे हिन्दी ल रोमन लिपि म।

ए अनुवाद ह साहित्य के दृष्टि ले ऊँचा नइ माने जाय।

भावानुवाद--मूल भाषा(स्रोत भाषा) के कृति म व्यक्त भाव /विचार ल बिना बदले आन भाषा( के वाक्य म ढाल के अनुवाद। एमा शब्द अउ भाव ल ओइसने रखे जाथे।

छायानुवाद-- एमा स्रोत भाषा के शब्द, भाव के संग अनुवादक ह मूल वक्ता/लेखक के कल्पना के तीर पहुँचके अपनो कल्पना करत अनुवाद करथे।

सारानुवाद--सार सार बात के अनुवाद। समाचार पत्र,छत्तीसगढ़ी म समाचार आदि

व्याख्यानुवाद-- ए अनुवाद म मूल स्रोत म व्यक्त विचार ल अनुवादक अपन अनुसार(लक्ष्य भाषा म) समझावत लिखते। कभू कभू अनुवादक के विचार हावी हो जथे।

पं बाल गंगाधर तिलक जी के गीता भास्य एकर उदाहरण रूप म समझे जा सकथे।

आशु अनुवाद--तुरते ताही अनुवाद।जइसे दुभाषिया मन करथें।

आदर्श अनुवाद--एमा अनुवादक तटस्थ रहिथे।

रूपांतरणअनुवाद---भाषा के संगे संग विधा बदल के अनुवाद। जइसे कोनो पद्य कृति ल नाटक म बदल देना।

अच्छा अनुवाद बर विद्वान मन अनुवादक म ये तरह के गुण बताये हें--

अच्छा अनुवादक म भाषा ज्ञान(व्याकरण आदि के), विषय ज्ञान, अभिव्यक्ति क्षमता के संग प्रमाणिकता अउ मौलिकता के गुण होना चाही।

हमर देश म अनुवाद विधा तो हे फेर जादा जोर नइये।अब हैदराबाद के दू ठन केन्द्रीय विश्वविद्यालय म एकर पढ़ाई तको होथे।

अनुवाद के परम्परा-----

अनुवाद के परम्परा बहुत पुराना हे।एकर खोजबीन करे म सबले पुराना अनुवाद ईसा ले 3000 हजार साल पहिली मिश्र के द्विभाषिक शिला लेख म मिलथे।

वोकर पाछू 300 ईसापूर्व ग्रीक अउ रोमन भाषा म अनुवाद मिलथे।12वीं सदी म स्पेन म बहुत अनुवाद होइच जब अरबी भाषा के साहित्य मन के यूरोपीय भाषा मन में अनुवाद होइच।

ओइसनहे संस्कृत के रामायण अउ महाभारत के संसार के अन्य भाषा मन में अनुवाद होइच।

प्लेटो अउ अन्य दार्शनिक मन के संवाद के तको तइहा समे म अनुवाद होये रहिसे।

   अनुवाद कला के  विकास धारा ह आधुनिक युग म 19वीं सदी म गति पकड़े हे जेकर श्रेय यूरोपीय मन ल दिये जा सकथे जेन मन आन भाषा म लबालब भरे ज्ञान ,साहित्य ल अपन यूरोपीय भाषा म अनुदित करिन हें।

हमर महतारी भाखा छत्तीसगढ़ी सजोर होवय तेकर बर एमा आन भाषा के कृति मन के छत्तीसगढ़ी म अउ छत्तीसगढ़ी साहित्य के दूसर भाषा मन म अनुवाद के बीड़ा उठाये ल परही।

चोवा राम वर्मा 'बादल '