कहिनी //*करम के फूल* //

 कहिनी

                    //*करम के फूल* //

                                  *- डोरेलाल कैवर्त*   

*************************************

                छतीसगढ़ राज सिरजन होय के पहिली के बात आय।एकठन गाँव सोनपान म करम सिंह नांव के एक किसान रहिस।ओला जादा करमू कहंय। ओकर घरवाली करमीन अउ ओकर पाँच लइका जेमा चारझन लड़की अऊ छोटे ह लड़का रहिस। उंकर जिनगी सुग्घर बीतत रहिस।

                 बड़े नोनी के नांव सोमबती,मंझली के मंगली, तीसरइया के बुधवारा, छोटे नोनी गुरबारी अऊ बाबू के नांव इतवार रखे रहिस। उंकर नांव ल ओमन जेन दिन जनम धरे रहिन तेन दिन के मुताबिक पाँचों झन के नांव रखे रहिस। पांँचोंझन करमू के अँगना के फूल जइसन ममहावत रहंय।

                  समे गुजरत गिस पाँचों लइका बाढ़ के स्कूल पढ़े जाये बर धर लिन।

" *कहे गे हावे के मनखे के सुघराई ओकर चरित्र ले होथे* "

              एक कहावत रहिस। गुनिक सियान मन कहंय - "मुंँह-माथा तो भगवान दे हावे, पर चरित्र ला मनखे अपनेच बनाथे।"

               करमू ए बात ला गांठ बांध के धरे रहिस। वो रोज बिहनिया उठके अपन पांँचो लइका ला एकेच गोठ सिखावय।

             "बेटा, वो डोंगरी देखत हव? डोंगरी के ऊपर जब बिहनिया के सुरुज के किरन परथे त डोंगरी सुग्घर दिखथे। पर डोंगरी के सुग्घरई किरन ले नइ, ओकर ऊंँचाई ले आय। वइसनेच मनखे के सुग्घरई गोर-उज्जर रंग ले नइ, ओकर चरित्र के ऊंँचाई ले होथे।"

                  सोमबती सबले बड़े 14 बछर के होगिस। गांँव के मनखे कहंय - "नोनी तो चंदैनी असन सुग्घर हावे।" पर करमू कहय - "सुघरई ले रोटी नइ बनय, चरित्र ले घर बनथे।"

                एक दिन के गोठ आय सोमबती स्कूल ले आवत रहिस। रद्दा म एक बुढ़िया गिरगे। ओकर टोकरी ले भाजी बिखरगे। दूसर लइका मन हांँसी उड़ाइन, पर सोमबती दउड़ के गिस, बुढ़िया ला उठाईस, भाजी ला बिन के टोकरी म डारिस अउ घर तक पहुंचाईस।

                 गांँव भर म गोठ बगरगे। सरपंच कहिस - "ए हावे करमू के बेटी के चरित्र। मुंँह तो सबके सुग्घर होथे, पर मन सुग्घर होना बड़ बात आय।"

*"मूड़ ऊपर करके रेंगे बर चरित्र ला सुग्घर रखे बर परथे।"*

                करमू के दूसर सीख वो कहय - "जब कोनों तरफ जाहव त मूड़ नीचे करके मत रेंगिहव। मूड़ ऊपर करके रेंगिहव। पर मूड़ ऊपर तभेच होही जब तुमन के चरित्र साफ होही। अगर चोरी करबे, झूठ बोलबे त मूड़ अपनेच नीचे हो जाही।"

                 मंगली ला गीत-गाना बड़ निक लागय। गांँव म मड़ई लगे,मंगली गीत गाइस। सबो झन ताली बजाइन। एक ठेकेदार आइस - शहर ले। कहिस - "बेटी, तैं मोर संग शहर चल, मैं तोला बड़का गवइया बना देहूं, टी.वी. म ला देहूं।"

              मंगली ,12 बछर के रहिस,मन ललचा गिस। आके ददा ले कहिस - "बाबू, मैं शहर जावव ?"

           करमू कुछू नइ कहिस। बस एक लोटा पानी लानिस अउ एक चम्मच माटी लानिस। पानी म माटी ला घोरिस,पानी मैला होगे।

                कहिस - "देख बेटी, ए हावे चरित्र,पानी असन साफ। अगर एमा लालच के माटी घोर देहू त पानी मैला हो जाही। फेर कोनों नइ पिये। ठेकेदार संग जाबे त पैसा मिल जाही, पर चरित्र म दाग लग जाही। अउ दाग लग गिस त फेर मूड़ ऊपर करके नइ चल सकबे।"

           मंगली समझ गे वो ठेकेदार ला नइ जांव कहि दिस। कहिस - "मैं अपन गांँवेच म अपन माटी के सेथी गाहूं ।"

                ओ दिन करमू ह छाती फुला के कहिस - "मोर बेटी ह मूड़ ऊपर रखिस।"

*"मनखे के चित्र के नइ, भलुक चरित्र के अभिनंदन होथे अऊ मनखे के नइ, ओकर मनखत्व के पूजा करे जाथे।"*

          तीसर सीख- सोनपान म हर बछर दशरहा म नाचा होवय - रामलीला। गांँव वाले लइका मन ला राम,लक्ष्मण,सीता,हनुमान अउ रावण के भेष बनावंय ।

           एक बछर बुधवारा - तीसर बेटी - ला सीता के भेष मिलिस। वो बड़ खुश। नवा लुगरा पहिरिस, सिंगार करिस। भेष तो सुग्घर सीता जइसन बनगे।

            पर नाचा म जब रावण सीता ला हर के लेगिस त बुधवारा ला रोना रहिस। वो रोईस नइ, हांँस दिस। सबो झन हांँस दीन। नाचा बिगड़गे।

रतिहा करमू पूछिस - "तैं हांँसे काबर ?"

             बुधवारा कहिस - "बाबू, मैं तो सुग्घर दिखत रहेंव तेकर सेती..."

            करमू कहिस - "बेटी, मनखे मन तोर लुगरा ला नइ, तोर अभिनय ला देखे आए रहिन। चित्र सुग्घर होए ले कुछु नई होवय, चरित्र सुग्घर होना चाही। सीता के चित्र नई, सीता के चरित्र पूजा करे जाथे। अगर सीता के चरित्र नइ होतिस त रामायण नि बनतिस।"

            आगू बछर बुधवारा ह फेर सीता बनिस। ए बेर वो लुगरा ला नई, सीता के दुख ला देखिस। जब रोईस त पूरा गांँव रो दिस। सबो कहिन - "वाह! ए हावे सीता।"

            तब करमू कहिस - "देखव! चित्र के नई, चरित्र के अभिनंदन होथे। मनखे के पूजा नइ, मनखत्व के पूजा होथे।"

*"चाय अऊ चरित्र गिरथे त दाग लग जाथे।"*

            ए करमू के सबले बने कहावत। वो कहय - "देखव, उज्जर कुरता पहिरे हव, एमा चाय गिर जाही त दाग लग जाथे, चाहे जेतका धो लेव, निशान रहिच जाथे। वइसनेच चरित्र आय, एक बेर गिरिस त दाग लग गिस।"

            गुरबारी - चउंथइया बेटी - 8 बछर के। एक दिन स्कूल म ओकर सहेली पेन ल कोनों जघा गिरा डारिस। मास्टर जी सबके बस्ता देखिन। गुरबारी के बस्ता म वोहिच पेन मिलिस।

            गुरबारी रोए लागिस - "मैं नई चोराए हंव, मोला रद्दा म मिले रहिस, मैं देवत रहेंव।"

पर कोनों नई मानिस। मास्टर जी कहिन - "चोर।"

            गुरबारी घर आइस, रो-रो के ददा ला बताइस। करमू स्कूल गिस। मास्टर जी ले कहिस - "गुरुजी, मोर बेटी चोर नोहय। अगर वो पेन रखे घलो होही त भूल ले। पर आपमन ओकर चरित्र म दाग लगा दे हव। चाय के दाग धुल जाथे, पर चरित्र के दाग लइकई म लग जाही त जिनगी भर नई धोवाय।"

              मास्टर जी ला अपन गलती समझ आइस। थोरिक शर्मिंदा होवत वो गुरबारी ल पूरा क्लास के सामने कहिस - "ए सबले ईमानदार लइका आय, एला पेन मिले रहिस, ए ह चोराय नइ रहिस।"

ओ दिन गुरबारी सीखिस - चरित्र ला चाय असन बचा के रखे बर परथे।

*"ते पाय के सबले बड़का धन तो चरित्र हर आय।"*

            करमू करा पांँच खांड़ी खेत रहय। पर वो कहय - "मोर सबले बड़का खेत तो मोर लइका मन के चरित्र आय। धान के खेत एक  बछर म फसल देथे, पर चरित्र के खेत जिनगी भर फसल देथे।"

            ओकर बेटा इतवार - सबले छोटे,6 बछर के सबके दुलरुआ। एक दिन वो अपन घर के पाछू कोती बारी गे रहिस, उहां एक आमा परे मिलिस। वो आमा ला लेके आ गिस, खाय लागिस।

    करमू देखिस, पूछिस - "ए आमा कहांँ ले लाने हस?"

इतवार कहिस - "बारी म परे रहिस।"

करमू कहिस - "बारी काकर ?"

"रामू कका के।"

"त पूछे काबर नई ?"

इतवार चुप।

          करमू ओकर हाथ धरके रामू कका करा लेगिस। कहिस - "कका, मोर बेटा ह तोर आमा ल बिन पूछे  ले आए हावे।"

रामू कका हांँसिस - "अरे ! एक आमेच तो आय।"

 

            करमू कहिस - "नई कका! आज एक आमा आय, बिहान दस होही। चरित्र लइकई ले बनथे। अगर आज एक आमा बिन पूछे  लिही त बड़े होके चोर बनही।"

            इतवार ह कका ले माफी मांगिस, आमा ला लहुटा दिस। कका ह वोहिच आमा ला आशीर्वाद देके लहुटा दिस - "ले बेटा, अब ए तोर, काबर कि तैं मांँगना सीखे हावस।"

इतवार ओ दिन सीखिस - सबले बड़का धन चरित्र आय,आमा नइ।

*करमू के सबो लइका मन सुघराई के संगे-संग ओमन के चरित्र अऊ सुभाव ह घलो सुग्घर रहय।*

अउ एही कारन ले पांँचो झन पचरतन कहाइन।

सुग्घर तो गांँव म बहुत लइका रहिन। पर चरित्र वाले - खाली करमू के।

सोमबती - धीरज। कभू रिस नइ।

मंगली - हिम्मत। सच बोले के हिम्मत।

बुधवारा - बुद्धि। पर बुद्धि के संग ईमानदारी।

गुरबारी - सेवा। सबके मदद।

इतवार - अंँजोर। कभू झूठ नइ।

*"चाल अऊ चरित्र सुग्घर रहे म मनखे के मान सम्मान पहार असन ऊंँच बाढ़ जाथे, जेन ह कोनों ला आगू बढ़े बर नइ रोक सके।"*

            आज जब पांँचो झन बड़े होके सरकारी नौकरी पा गिन त गांँव वाले कहंय - "करमू ह अपन लइका ला दौलत नई, चरित्र दिस,  तेकर सेती आज वो पहार असन ऊंँच हावें। पहार ला कोनों रोक नई सकय।"

*"करमू के लइका मन के सुभाव अऊ चरित्र के गोठ गांँव म होबेच करय।"*

 

            सोनपान म आज घलो जब कोनों नवा पहुना आथे त गांँव वाले ओला करमू के घर ले जाथें। कहंय - "देखव, ए हावे पचरतन के घर। इहां पांँच लइका हावें, पर पांँचो के चरित्र सोना हावे।"

अउ पहुना पूछथे - "सोना कइसे?"

गांँव वाले कहंय - "सोना तपे ले बनथे। करमू ह अपन लइका ला तपाए हावे - भूख म, गरीबी म, मेहनत म। तभे वो सोना बनिन।"

                  करमू के सबो लइका के बेवहार ,सुभाव अऊ चरित्र जइसन फूल ले ओकर अँगना महमहाय लागिस। करम के फूल छतनार होगे अउ गाँव भर ओकर महक बगरगे। करमू ल अपन पाँचों लइका मन ऊपर गरब रहय जेकर सेथी गाँव म करमू के छाती फूल जावय अऊ मूंड़ हरदम ऊँचा रहिगिस।

✍️ *डोरेलाल कैवर्त " हरसिंगार "*

         *तिलकेजा, कोरबा (छ.ग.)*

*************************************