सुरुज के कवयित्री - डा. सत्यभामा आडिल

 सुरुज के कवयित्री - डा. सत्यभामा आडिल 

शिक्षा ले मानव समाज के चारो कोति विकास होथे। शिक्षा ले मनखे पोठ बनथे। शिक्षा ले जिहां मनखे अपन अधिकार के बात ल समझथे त दूसर कोति वोला अपन कर्तव्य के ज्ञान कराथे। शिक्षा के क्षेत्र म उच्च शिक्षा के अब्बड़ महत्तम हे। उच्च शिक्षा प्राप्त करे ले 

सोच ह बड़का  होथे।  कुछ मन बड़का पद पाय के बाद बड़का कारज करथे जेकर लाभ उंकर परिवार के संगे संग समाज अउ प्रदेश/ देश ल मिलथे। अइसने उच्च शिक्षा प्राप्त करके शिक्षा, साहित्य अउ समाज सेवा के क्षेत्र म सुघ्घर कारज करिन  डा.सत्यभामा आडिल ह। वोहा बहुमुखी प्रतिभा के धनी रिहिन।

   सत्यभामा आडिल के जनम आजादी के तीन बछर पहिली 1 जनवरी 1944 म गांव पंदर ( पाटन) जिला दुर्ग म होइस। बाबूजी के नांव खम्हन लाल वर्मा अउ महतारी के नांव जमुना वर्मा रिहिन। वर्मा जी ह डोंगरगढ़ जिला राजनांदगांव म शिक्षक रिहिन। जब नोनी सत्यभामा ह दू बछर के रिहिन त वर्मा जी के ट्रांसफर व्याख्याता म जगदलपुर होगे अउ बाद म प्राचार्य बनिस। येकर ले नोनी सत्यभामा ल एक कोति धर्मनगरी डोंगरगढ़ के संस्कृति के दर्शन होइस त दूसर कोति बस्तर क्षेत्र के रहन सहन अउ संस्कृति ल गहराई ले जाने के मउका मिलिस। सत्यभामा ह जगदलपुर म 9 वीं तक पढ़ाई करिस बाद के पढ़ाई रायपुर म होइस।बछर 1956 म छत्तीसगढ़ी कहानी "रमिया अउ केकती" लिखिस। ये कहानी ल लोक कथा ल आधार बनाके लिखे हे जेमा अपन संस्कृति, संस्कार के महत्तम बताय गेहे। पेड़ - पौधा के पूजा अउ संरक्षण करे बर प्रेरित करे गे हावय। 

जब वोहा बछर 1957 म तेरह बछर के रिहिन तब ले उंकर कविता नवभारत म प्रकाशित होय के शुरू होइस।

   उच्च शिक्षा के सफर 

   वो समय हमर प्रदेश म साक्षरता के प्रतिशत कम राहय अउ नोनी मन के शिक्षा कोति कम ध्यान दे जाय। नोनी मन ल बहुत कम पढ़ाय जाय।बाल बिहाव के घलो चलन राहय।अइसन समय म घलो सत्यभामा के पढ़ई-लिखई म कोनो प्रकार ले कमी नइ होइस काबर कि उंकर परिवार उच्च शिक्षित रिहिन। जब वर्मा जी ल "नोनी मन ल कत्तिक पढ़ाहू "कहिके कोनो मन टोके तब वोहा देश के पहिली महिला प्रधानमंत्री इंदिरा गांधी के उदाहरण देके सत्यभामा अउ सुधा ल खूब पढ़ाईस - लिखाइस।

वर्मा जी अउ उंकर परिवार ह परिवार म "बेटा -बेटी एक समान "के भाव ल पालन करत कोनो प्रकार के भेदभाव नइ करिस ।बेटा रवि वर्मा के संगे -संग बेटी सत्यभामा अउ सुधा ल बने उच्च शिक्षा पढ़े बर  उछाह बढ़ाइस। सत्यभामा अउ सुधा मन लगाके पढ़िस अउ दूनों बहिनी शिक्षा, साहित्य अउ समाज सेवा के क्षेत्र म अपन एक अलग पहचान बनाइस। सत्यभामा ल आगू बढ़े बर बाबू जी के संगे संग उंकर चाचा ह अब्बड़ प्रोत्साहन दिस।

 हमर देश के राजभाषा हिंदी होय के कारण सत्यभामा ल घर म हिंदी बोले बर ही जादा प्रेरित करे जाय ताकि हिंदी म झन पछवाय । वर्मा जी के सोच राहय कि सत्यभामा शिक्षा म ठाहिल राहय  राहय अउ येकर बर हिंदी सजोर रहना जरूरी हे।हालांकि घर म छत्तीसगढ़िया वातावरण शुरू ले रिहिस अउ  छत्तीसगढ़ी बोले जाय। पढ़ाई जिनगी म पढ़ाई के संगे संग भाषण,नाटक म घलो भाग लेके अपन प्रतिभा दिखाइस।

संत धर्मदास उपर पीएचडी 

उच्च शिक्षा प्राप्त करके सत्यभामा ह प्राध्यापक बनगे।उंकर बिहाव मनहरण लाल आडिल ले होइस ।वोहा कृषि वैज्ञानिक रिहिन।गोसइंया ह घलो वोला शिक्षा, साहित्य अउ समाज सेवा म आगू बढ़े बर प्रोत्साहित करिन। बछर 1965 म हिंदी म एम.ए.करे के बाद बछर 1967 म पीएचडी करे बर रजिस्ट्रेशन करवाइस।मानस मर्मज्ञ अउ साहित्यकार डा. बल्देव प्रसाद मिश्रा के मार्गदर्शन म छत्तीसगढ़ी के पहिली कवि अउ कबीर के शिष्य धनी धर्मदास के व्यक्तित्व अउ कृतित्व उपर बछर 1972 म पीएचडी के उपाधि मिलिस।वोहा रविशंकर विश्वविद्यालय म पीएचडी के उपाधि प्राप्त करइया पहली शोद्धार्थी रिहिन।

सत्यभामा ह अपन मिहनत ले कालेज म प्राध्यापक बनगे। शासकीय दूधाधारी बजरंग महिला महाविद्यालय रायपुर म हिंदी अध्यापिका अउ विभागाध्यक्ष के रूप म काम करिन।

 अब वोहा हिंदी के संगे संग छत्तीसगढ़ी म  लिखे बर  ध्यान दिस।

रविशंकर विश्वविद्यालय  रायपुर म जब वोहा हिंदी अध्ययन मंडल के अध्यक्ष अउ कला संकाय के अधिष्ठाता रिहिन त यूजीसी ले निर्देश आइस कि विश्व विद्यालय मन म जनपदीय भाषा ल घलो एक विषय के रूप म शामिल करे जाय।

 

  उच्च शिक्षा म छत्तीसगढ़ी ल शामिल करे बर  सुघ्घर उदिम 

यूजीसी के नियम ल पालन कराय बर सत्यभामा आडिल ह छत्तीसगढ़ी के एक अलग पाठ्यक्रम रखे बर सुघ्घर उदिम करिन। शुरू म गैर छत्तीसगढ़िया प्राध्यापक मन विरोध करिस पर सत्यभामा आडिल ह हार नइ मानिस। गैर छत्तीसगढ़िया प्राध्यापक मन बछर 2003-04 म तत्कालीन राज्यपाल अउ तत्कालीन मुख्यमंत्री अजीत जोगी जी ले भेंट करिस कि छत्तीसगढ़ी म हमन नइ पढ़ावन तब राज्यपाल अउ जोगी जी ह साफ किहिन कि जउन प्रदेश के स्थानीय भाषा हे वोकर हीनमान नइ होना चाही। छत्तीसगढ़ म छत्तीसगढ़ी के सम्मान जरूरी हे। छत्तीसगढ़ी म एक पाठ्यक्रम जरूर होना चाही। ये प्रकार ले गैर छत्तीसगढ़िया प्राध्यापक मन के योजना सफल नइ होइस।

ये प्रकार ले देखथन कि डॉ .सत्यभामा आडिल ह छत्तीसगढ़ी ल बढ़वार करे बर सुघ्घर कारज करिन।वोकर प्रयास ले हिंदी के अंतर्गत "जनपदीय भाषा अउ साहित्य (छत्तीसगढ़ी)"एक अलग पाठ्यक्रम के रूप म चालू करे गिस। ये कारज ह छत्तीसगढ़ी भाषा बर" मील के पथरा" साबित होइस। बाद म छत्तीसगढ़ी म एम.ए. चालू करे गिस जेमा कतको छात्र मन पढ़ाई करत हे।

छत्तीसगढ़ी म एम. ए. के पाठ्यक्रम संचालित हे तेकर पाछु उंकर बड़का योगदान हे।बाद म छत्तीसगढ़ राजभाषा आयोग घलो बनगे।  छत्तीसगढ़ी छत्तीसगढ़ के राजभाषा बनगे।हालांकि छत्तीसगढ़ी आजो संविधान के आठवीं अनुसूची म शामिल होय बर बाट जोहत हे। सरकारी काम काज छत्तीसगढ़ी म नइ होवत हे।

डा. सत्यभामा आडिल के मार्गदर्शन म चालीस शोधार्थी मन पीएचडी के डिग्री प्राप्त करिस। वोहा शोधार्थी मन ल छत्तीसगढ़ी भाषा, संस्कृति उपर शोध करे बर प्रेरित करिस जेला छत्तीसगढ़िया शोधार्थी मन सहज रूप ले स्वीकार करिस।

वोकर शोधार्थी मन छत्तीसगढ़,भारत के प्रमुख शहर मन के संगे संग विदेश म घलो अपन प्रतिभा के लोहा मनवाथे ‌।

हिंदी अउ छत्तीसगढ़ी म साहित्य लेखन

डा. सत्यभामा आडिल ह बहुमुखी प्रतिभा के धनी रिहिन। हिंदी अउ छत्तीसगढ़ी दूनों म लेखनी करिस। पद्य अउ गद्य दूनों म कलम चलाइस।कविता, उपन्यास,नाटक, कहानी,यात्रा वृत्तांत, रेडियो नाटक, जीवनी लिखिस।

आडिल के हिंदी रचना मन म 

नर्मदा की भोर (काव्य संग्रह),

निःशब्द सृजन (काव्य संग्रह),

क्वांर की दुपहरी (काव्य संग्रह),

काला सूरज (काव्य संग्रह),

दस्तक देता सूरज (काव्य संग्रह),

प्रेरणा बिंदु से निर्वेद तट तक (उपन्यास),

एक पुरुष (उपन्यास),

अभिशक्ता (रेडियो नाटक),

वंशनाम (रेडियो नाटक),

बुतखाना (नाटक),

पहाड़ की ढलान से समुद्र की सतह पर (यात्रा वृतांत),

मेरी बस्तर यात्रा (यात्रा वृतांत),

अपना सा लगता है घर (कहानी संग्रह), पांच दशकों से मैं और मेरी कविता ( कविता संग्रह),

लॉकडाउन में बाबू मोशाय (कहानी संग्रह),

आलेख संग्रह व शोध ग्रंथ (हिन्दी),

लोकचेतना के स्वर (आलेख संग्रह),

सन्त धर्मदास : कबीरपंथ के प्रवर्तक (शोध ग्रंथ),

छत्तीसगढ़ी भाषा, व्याकरण और साहित्य,

छत्तीसगढ़ी लोकसाहित्य और नवजागरण,

महाकवि खंडेराव भोंसले का महाकाव्य: राधा विनोद, आत्म चरित " अम्मा की हीरकनी"शामिल हे।

 अइसने छत्तीसगढ़ी रचना मन म 

रमिया अउ केकती ( कहानी),

गोठ (गद्य),

सउत कथा,

रतिहा पहागे( काव्य संग्रह),

सुरुज के तसमई (काव्य संग्रह),

ठीहा ( काव्य संग्रह)

जनपदीय भाषा - साहित्य छत्तीसगढ़ी,

छत्तीसगढ़ के महापुरूष (गद्य),

छत्तीसगढ़ी बाल कहिनी अउ बाल कविता,

वेद कहिन (चारों वेदों के चयनित 64 ऋचा मन के छत्तीसगढ़ी म भावानुवाद),

छत्तीसगढ़ म विवेकानन्द भावधारा के प्रवर्तक : स्वामी आत्मानन्द (संस्मरण),

छत्तीसगढ़ की कूर्मि विभूतियाँ (सामाजिक) लिखे हे।

आप मन के लिखित अउ संपादित कतको पाठ्य पुस्तक मन 

विश्वविद्यालय के एम.ए. एवं बी.ए. (हिन्दी साहित्य) के पाठ्यक्रम म शामिल हे।

    सम्मान 

आडिल ह 'क्वार की दुपहरी' काव्य संकलन बर बछर 1976 म मध्यप्रदेश शासन ले पुरस्कृत होइस। आंचलिक हिंदी साहित्य म सुघ्घर योगदान खातिर पं. सुंदर लाल शर्मा राज्य अलंकरण 2024 ले सम्मानित होइस।

आडिल ह अपन हिंदी अउ छत्तीसगढ़ी साहित्य के माध्यम ले समाज म जनजागरण के सुघ्घर कारज करिस। नारी शक्ति मन म जनजागरण फैलाइस। छत्तीसगढ़ी भाषा, संस्कृति, संस्कार के बढ़वार खातिर अब्बड़ उदिम करिस।वोहा छत्तीसगढ़ी भाषा अउ साहित्य के मुखर स्वर रिहिन। छत्तीसगढ़ राजभाषा आयोग के सम्मेल म वक्ता के रूप म छत्तीसगढ़ी भाषा के विकास बर सुघ्घर संदेश देवय।वोहा छत्तीसगढ़ी म देवनागरी के 52 वर्ण ल बउरे के समर्थन करिस। छत्तीसगढ़ी भाषा म अपभ्रंश ले बचे बर सुझाव दिस। छत्तीसगढ़ी लोकाक्षर व्हाट्सएप्प के माध्यम ले मोला दीदी जी के अब्बड़ स्नेह अउ सुझाव मिलिस। छत्तीसगढ़ राजभाषा आयोग के प्रांतीय सम्मेलन अउ आने साहित्यक आयोजन म दीदी जी ले भेंट होय त आत्मिक खुशी मिलय।

समाज सेवा 

आडिल ल शिक्षा, साहित्य के संगे संग समाज सेवा म घलो अव्वल रिहिन। अखिल भारतीय कुर्मी समाज के केंद्रीय महिला अध्मक्ष अउ मनवा कुर्मी महिला समाज के संस्थापक के रूप म नारी शक्ति मन ल संगठित करिन। सामाजिक उत्थान म सुघ्घर योगदान दिस। समाज म वोला अब्बड़ मान- सम्मान मिलिस ‌

हिंदी अउ छत्तीसगढ़ी साहित्य ल सजोर करइया दीदी डा.सत्यभामा आडिल के देहावसान 20 अक्टूबर 2026 म होइस। वोकर निधन साहित्य अउ शिक्षा जगत के संगे संग समाज बर एक बड़का नुकसान हे।  आडिल के बेटा के विवेक,मनीष अउ बेटी के नांव निवेदिता हे।  सत्यभामा दीदी ल सादर नमन हे।

संदर्भ - 1. मोर भुइयां कार्यक्रम ( आकाशवाणी रायपुर) म डा. सत्यभामा आडिल संग संपादक श्री महेंद्र साहू के गोठबात।

2. छत्तीसगढ़ी का सम्पूर्ण व्याकरण ( डा. विनय कुमार पाठक,डा . विनोद कुमार वर्मा) , पृष्ठ क्रमांक 232

       -ओमप्रकाश साहू "अंकुर"

     सुरगी, राजनांदगांव (छत्तीसगढ़)