हाईटेक जमाना, कूल-कूल सास
(छत्तीसगढ़ी हास्य-व्यंग्य)
सास गारी देवे, ननंद मुंह लेवे, देवर बाबू मोर।
सैंया गारी देवे,परोसी गम लेवे,करार गोंदा फूल।।
अरे भई! परोसी तोर दुख ल जानही भर। फेर घर के समस्या ल दूरिहा दिही का? नही। इहाँ तो आपदा म अवसर के भारी चलाकी चलत हे। ये दे शरद पुन्नी दिन के बात आय। सोनउ कका घर नान्हें बहू ह जोर-जोर से एकेच गाना बजावत राहय - "सासु जी तूने मेरी कदर न जानी, बहू को तूने बहू न समझा, समझा नौकरानी।" पारा भर के मन येकर निहितार्थ समझ गें। काकी घलो कम नइये। बिहान दिन घर के मुहाटी आगू बर्तन माँजत राहय, अउ जोर-जोर से गावत राहय - "लहू लाए हन, बहू लाए हन, हाय विधाता करम ठठाए हन।" बहू बिचारी का करय? डंडा शरण पइयाँ लागत, किलौली करत सास जी ल बड़ मुस्कुल म घर भीतरी भितराईस। पारा-मुहल्ला के लोगन मुसुर-मुसुर हाँसय - "सास के आगू बहू के चाला, जइसे अगास म बादर काला।" अनुभव जितगे फेर घर के कलेश बहिरागे।
कतको कहानी हे जेकर शुरुआत होथे- एक गांव म एक झन गरीब ब्राम्हण रिहिस। त जब रिहिस तब रिहिस। अब तो नइये रे ददा! सबो बने खावत -कमावत आगू बढ़त हें। तइसने सास मतलब खड़ूस। त सास नाव के परानी ह सदा दिन गारी-गल्ला देवईया रइही का? ओकर स्क्रिप्ट ह ललिता पवार, शोभा खोटे, बिंदु, अरुणा ईरानी, रूपल पटेल म अरझे रही का? अरे भइआ! समे के संग सास हेल्पफुल नेचर, पोलाइट कैरेक्टर म कन्वर्ट होवत जावत हे, यहू ल तो देख। जेकर ले घर के माहौल हॉट-हॉट नही, कूल-कूल होवत हे। अइसे भी अब सास बपुरी हाईटेक हो गे हावय। इंस्टा, एक्स, व्हाट्सएप, फेसबुक, यूट्यूब के लॉग-इन म बहू के हेल्प के गजब महत्त्तम हे। कहूँ वाई-फाई के पासवर्ड बदल दिही त? बहू ले टेंड़वही त सोशल मीडिया म कइसे रहि पाही?
कहे जाथे -"जइसन-जइसन घर-दुवार, तइसन-तइसन फरिका, जइसन-जइसन दाई-ददा, तइसन-तइसन लरिका।" त जइसन सास, तइसन बहू। जइसन दूध, तइसन दही। एक दिन सासु जी अपन बेटी ल सिखावत राहय - "देख बेटी, तोला सबो काम-काज आथे। फेर ससुराल म कुछु नइ आवय तइसे बेवहार करबे, नईते सबो काम तुहीं ल करे ल पर जाही।" सास के बेवहार ल देख-देख के बहू सिखथे। "बहू रांधे खावय सास, तभो कहे नई आवय रास।" बहू हाथ के बर्गर, पिज्जा, मैगी बनेच झोरत हे, तभो ले चूल्हा के रांधे दार-भात भूले नइ भुलावत हे। येमा बहू के काय दोस?
सास बिना ससुराल अधूरा, अउ बहू बिना घर सुन्ना। दूनों झन मिल जावय त, सुख बाढ़े उन्ना के दून्ना।।
फेर वाह रे सत्ता के लड़ाई। गांव-शहर, देश-परदेस कहाँ नइये? त ये लड़ाई घरो-घर दिखिच जाथे। सास ल लगथे बहू ओखर साम्राज्य ल खतम कर दिही। काबर ससुर जी के मुसवा कस दुबकई ल देखतेच हे। त मुसवा कस दुबकाय म सास के सबो अस्त्र-शस्त्र ल बहू जान भर के रइही का? इक्कीसवीं सदी के अपडेट वर्जन के बहू ह सबो फॉर्मूला ल अपन पति देव ऊपर प्रयोग करत हे। अइसन म सास ल एंटी इनकंबेंसी फैक्टर के शंका धरही कि नइ धरही? कोनो माने चाहे झन माने? मनखे मन कतको कमावय, फेर घर के शांति के रिमोट माई लोगिन के हाथ म होथे। मनखे मन अपन मेंछा ल कतको अँटियावत रेंगय, फेर घर म खुसरे के पहिली मेंछा ल नवत देखतेच हन। सास के दफड़ा के आगू ससुर के दमऊ के काय औकात? घर के बहिरी पुरुष मन के चलथे त घर भीतरी म? महिला मन के सत्ता। चरचा के जरूरत नई राहय, सीधा अध्यादेश लागू। जिहाँ ये सत्ता ल चुनौती देवई मधुमक्खी के छत्ता म हाथ डरई कस आय! पानी बूड़े नई बाँचय।
बहू घलो अब धीरे-धीरे बेटी बनत जावत हें। नौ बजे सुत के उठहीं तभो ममतामयी सासु माँ चाय धरे ठाढ़े हे। नई ते सत्ता परिवर्तन के खतरा हे, अउ बहू के दिन-भर 'क्राइम-अलर्ट' देखई म नीला ड्रम के डर तो घला। फेर आज-कल कतकोन सास-बहू इंस्टाग्राम म 'सास-बहू कॉमेडी' चैनल खोलत हें, लाखों फॉलोअर बटोरत हें। सास कैमरा के आघू नाचथे, बहू एडिट करथे, अउ कमई घला होवत हे। इही नवा कूल-कूल जमाना आय! सास कहे - मोर बरोबर कोनो नई, बहू कहे - मैं काकरो ले कम नई। त इंखर बीच बेटा बपुरा गुदेला खावत रहिथे। सास-बहू के समीकरण कब सुलझ जाही, अउ कब उलझ जाही। भला कोनो बता सकत हें?
आखिर म इही कहे जा सकथे - सास-बहू के रिश्ता अब लड़ई के नइ, जुरमिल के घर सुघरई के हे। पहिली सास बहू ला परखत रहिस, अब सास बहू ले सीखत हे - रील बनई, ऑनलाइन पेमेंट करई। अउ बहू घला सास ले सीखत हे - घर -परिवार समाज सब ले हिल-मिल के रहई। जेन सहिथे तिही लहिथे, घर टोरे ले नइ,जोरे ले बनथे।फेर बात एके जघा आके अरझ जाथे। सास चाहथे- "बहू मोर जइसे बने।" बहू चाहथे- "सास मोर मम्मी जइसे बने। " इहि सोच के चमकट्ठा होय ले समाज सुधार के धंधा फलत-फूलत हे। सुधारक बपुरा मन अपन घर-द्वार काम-धाम ल छोड़ के रात-दिन नियांव करत घूमत हें। दिनों-दिन तरक्की करत ऊंचहा पीढ़ा पावत हें।
रोशन साहू मोखला (राजनांदगाँव)
7999840942
No comments:
Post a Comment