देवारी म अमीरी, सर्वे म गरीबी " (छत्तीसगढ़ी हास्य व्यंग्य)

 " देवारी म अमीरी, सर्वे म गरीबी "

              (छत्तीसगढ़ी हास्य व्यंग्य)  

           सरकार गरीबी रेखा सर्वे करथे, घर-घर जाके पूछथे - तुँहर घर टीवी, कूलर, फ्रिज हे? मोटर साइकल,कार हे? कतेक जोड़ी कपड़ा-लत्ता हे? खवई- पियई ल घलो। फेर ए सब छोड़व! देवारी म जाके देखव, असली अमीर-गरीब पता चल जाही! त सबले पहिली पटाखा- जेकर घर दस हजार के पटाखा फूटत हे, वो गरीब हरे का?  बिहनिया लइका कहिथे - "पापा दस हजार के पटाखा ला दे!"बाप -"ले बेटा!" फेर गरीबी रेखा म नाम हे! राशन कार्ड में गरीब! अरे भई, मध्यान्ह भोजन रंधईया मन ल घलो दस हजार पाये बर पाँच महीना आँच खाये ल परथे। अउ इहाँ दस हजार के पटाखा छिन भर म भुर्र के बरथे!

       दूसरईया मिठाई-गरीबी रेखा परिवार राशन कार्ड धर के दुकान जावत हें । फेर राशन धर के नइ, सोझे पइसा धर के घर आवत हें। त दिवाली में पाँच किलो काजू-कतली पाँच हजार के! कहूँ पूछ परेस - "रिश्तेदार-पड़ोसी, समधी-सजन, जान-पहिचान वाले मन के खातिर हे जी!" त देवारी म ट्रक-ट्रक खोवा कहाँ ले परगट होथे? काय ये बात ल नइ जानत हें? जानत हें। हमर सोनऊ कका नवरात्र ले हर रोज शहर म बीस -बीस किलो खोवा बेचे बर जाथे। उँखर घर एके ठन गाय हावे। एके समे दुहाथे। ले-लबेद के चाय भर बन पाथे। मँय पूछेंव - "कका, खोवा कहाँ ले लाथस! कइसे बनाथस?" कहिस- "बेटा, गाय रखे के जरूरत नइये। बस बाजार ले पाउडर, एसेंस ला ले अउ अपन नीयत ल खराब कर ले! मँय नइ करहूँ त कोनो दूसर करहीं ?" स्विस बैंक म खाता अइसने थोड़े खुल जाही?  नीयत खराब करई नानकुन बात नोहे। त मिठाई वाला ल पूछबे - "कस भइया! ये खोवा गाय दूध के आय कि मैदा आलू के?" वोहर ही-ही, ही-ही करत बात ल हवा म उड़ा दिही। फेर का करबे देवारी म मिठाई जरूरी हे। नइते तिर-तखार वाले मन का कही? खातिरदारी म पाँच हजार के मिठाई! अउ सरकार ले पैंतीस किलो चावल फ्री! लगथे गरीबी के लेवल ऊँचा होवत जावत हे।

         बात करबे रंगाई-पुताई के। त घर बने हे आवास योजना म। चार कमरा दू मंजिला। फेर दिवाली में एशियन पेंट, डुलक्स, नेरोलेक के तीस हजार के पोताई! "पड़ोसी की जले जान, आपकी बढ़े शान।" भीतर कोती प्लास्टर उखड़े हे, बाहिर चमक ! सर्वे वाला पूछे-"घर कच्चा हे? कहिथे - "हव जी, गरीब हन!"फेर देख के तो लगत हे बंगला हे! सिगबिग-सिगबिग झालर के जगमग-जगमग अंजोर। लक्ष्मी जी कन्फ्यूज नइ हो जाही? येमन ऑल रेडी अमीर हें त इहाँ मोर का जरूरत। त लक्ष्मी जी ल खुश करे बर चद्दर ले जादा पाँव पसरई! मानो लक्ष्मी दाई नोहे नेता होगे? लायसेंस, टेंडर, टिकिट के जुगाड़ बर ताम-झाम, स्वागत- सत्कार जरूरी हे! 

         सोना-चांदी के बात! राम-राम, झन पूछ रे ददा! येकर महिमा अड़बड़ भारी। सबो चैनल म शुभ मुहूर्त के स्लाइड अउ चर्चा। दुकान म बोर्ड - "देवारी म सोना खरीदना शुभ हे! लक्ष्मी आथे!" सोना के भाव तो मार्केट तय करथे, फेर मेकिंग चार्ज? वोहा ईंकर हाथ म! दस हजार के सोना म तीन हजार मेकिंग चार्ज! दस ग्राम के जुन्ना अंगूठी म तीन ग्राम मैल। राम जाने ये मैल ज्वेलर्स भर ल दिखथे। दिव्य दृष्टि के व्यवसायिक संस्करण। हिसाब बेरा कैलकुलेटर म खटपिट- खटपिट अंगुरी चलई। तँय चाय पी। दिमाग झन खपा। दस ग्राम सोना म तीस हजार फायदा। ऑफर इनाम स्क्रेचिंग के मायाजाल। घरवाली के स्माइल ले बढ़के अउ का हे ? साल भर के रोजी-मजदूरी, एक्के दिन सोना म फूंका जथे! सोंच हावय - "लक्ष्मी आईस!" लक्ष्मी तो ज्वेलर्स के तिजोरी म गिस! बी पी एल काकी दू तोला सोना खरीदथे तीन लाख के! कहिथे- "लक्ष्मी आय बाबू! लिस्ट में कम लक्ष्मी, गला म सोन के लक्ष्मी! 

        अउ जेकर बिना बात अधूरा रइही जुआ के। त देवारी रात बी पी एल सदन म ताश के महफिल, बीस हजार हार-जीत! बिहनिया -"सरकार,पइसा नइहे, बी पी एल कार्ड बना दे!" रात बीस हजार जुआ म, दिन बी पी एल के लाइन म!

          जेकर जेब भारी तेकर देवारी। फेर अब तो मिलथे पाँव-पुट उधारी। मोटरसाइकिल के टायर गायटर ले चलत हे। फोन ऊपर फोन- "सर जी कार लोन चाही! आवव ले जावव।" त घर आघू कार खड़े करई कोन ल नइ भाही? इंस्टालमेंट म लोन पटावत रहिबे त पेट्रोल बर पइसा कहाँ ले पाबे? देवारी म ड्राई फ्रूट्स के डिब्बा अउ लिफाफा पाये के सौभाग्य सबो के भाग्य म थोड़े हे? पुण्यात्मा मन ल ये मौका मिलथे।

                अब तो बड़े-बड़े चीज ल काय कहिबे कपड़ा-लत्ता बर घलो इंस्टालमेंट किश्त फेसलिटी। "घर म नई हे दाना, अउ देवारी मनाए ल जाना।" त तिहार एक दिन, उधारी तीन सौ पैंसठ दिन! घर म बनाय नारियल बेसन के लड्डू खाय ले काय लक्ष्मी दाई मना करे हवय ? कि सपना आये हे- "मोला काजू- कतली खाना हे।" दैविक जगत बर हिरदे के पबरित भाव चाही कि मिलावटी नकली मिठाई? खराब नीयत ले बनाये मिठाई-पेड़ा ल देंवता भोग-प्रसाद पाही!  दीवाल के रंग बड़े कि दिल के रंग? दिल ले होरी अउ दिल ले देवारी। करजा बोड़ी म गहना-जेवर खरीदे ले बने तो घरवाली ल घुमाए बर ले जा, जादा खुश होही! फेर जनम ले मुँहफूलवी होही त तँय काय कर लेबे? कोनो ल बताबे त उहू काय कर लिही? तोर भाग्य!  कर ले उधारी, मना ले देवारी। साल भर किश्त पटा, फेर घरवाली के टेंशन घटा। वोकरो स्टेटस हे। मेंटेन करना जरूरी। तोरो टेंशन घटाये बर कोनो जघा ठौर होहिच्च का? तहूँ जा " बुद्धि विकास केंद्र "। कोन मना करे हे? अउ मना करईया के कब माने हस? जे अब मानबे। दू घूँट अंदर जाही ताहने ज्ञान बाँटबे। येकर ले कोनो परब-तिहार बाँचे हे भला?

      रोशन साहू 'मोखला' (राजनांदगांव)

                7999840942