माता के अंगना म जोत जंवारा वो लहर-लहर लहराये हो - डुमन लाल ध्रुव

 माता के अंगना म जोत जंवारा वो लहर-लहर लहराये हो

                          - डुमन लाल ध्रुव 

      गांव के बीचोंबीच एक छोटे से मंदिर रिहिस  जिहां गांव के जम्मो मनखे मन श्रद्धा अउ विश्वास के संग माता के पूजा करे बर आवय।

ओ मंदिर म विराजे रिहिस माता महामाया। माता के चेहरा म अइसन मया झलकत रिहिस जइसे कोनो दाई अपन लइका  ला अपन अंचरा म समेट के रखे हवय। नवरात्रि के दिन नजदीक आवत रिहिस। गांव के गली-गली म सफाई होवत रिहिस, घर-घर म लिपाई-पोताई चलत रिहिस अउ मंदिर म जोत जलाय के तइयारी होवत रिहिस।

एही गांव म रहय एक गरीब किसान मनबहल। ओखर घर म ओखर घरवाली मंजूबाला, बेटा मनोज अउ बेटी मनोरमा रहय। मनबहल के जिनगी खेती-किसानी म बीतत रिहिस। कभू पानी के कमी, त कभू फसल म कीरा, कभू बाजार म धान के कम दाम ये सबो ओखर जिनगी के हिस्सा बनगे रिहिस।

फेर मनबहल के एक बात खास रिहिस। वो चाहे कतको दुख म रहय, माता के ऊपर ओखर विश्वास कभू कम नइ होवत रिहिस।

हर साल नवरात्रि आवय  त मनबहल के घर म माता के जोत जगाय के तइयारी शुरु हो जाय। मंजूबाला घर के अंगना ला गोबर-माटी ले लीपे, मनोरमा रंग-बिरंगा फूल अउ पाना ल संजोय, अउ मनोज गांव के तालाब ले साफ पानी लाय।

एक दिन मनोरमा अपन दाई ले पूछिस, “दाई, हमर घर म गरीबी हे, हमर घर म बड़े-बड़े मंदिर कस सजावट नइ होवय, फेर माता हमर घर काबर आथे?”

मंजूबाला मुस्कुरावत ओखर माथा म हाथ फेरिस अउ किहिस, “बेटी, माता ला बड़े महल अउ सोना-चांदी के जरुरत नइ होवय। माता त साफ मन, सच्चा मया अउ श्रद्धा देखथें। जिहां दया हे, जिहां सेवा हे, जिहां  दूसर मन के दुख ला समझे के भाव हे, ओही जघा माता के असली दरबार हे।”

मनोरमा  के मन म दाई के बात गड़गे।

नवरात्रि के पहिली बिहनिया गांव म मुरगा के बांग के संग जिनगी जाग उठिस। कोनो घर म घंटी बाजत रिहिस, कोनो घर म माता के जसगीत गूंजत रिहिस। मंदिर के आगू नारियल, फूल, अगरबत्ती अउ पूजा के समान रखाय रिहिस।

मनबहल घलो बिहनिया उठिस। नहा-धोके माता के मंदिर गिस अउ हाथ जोड़ के अरजी लगाइस।

“हे दाई महामाया! मोर घर म सुख-शांति बनाय रखबे। मोर लइका मन ला सच्चा रद्दा देखाबे। खेती म मेहनत करे के ताकत देबे अउ सबके पेट भरय अइसन किरपा करबे।”

ओ दिन मनबहल अपन घर के अंगना म जंवारा बोये के तइयारी करिस। एक साफ माटी के पात्र म पवित्र माटी भरिस। ओमा जंवारा के बीज डारिस अउ श्रद्धा के संग पानी छिड़किस।

मंजूबाला माता के आगू जोत जलाइस। दीया के लौ धीरे-धीरे चमके लगिस। ओ लौ ला देखके मनोरमा के मन म अइसे लगिस  जइसे अंधियारी रात म कोनो नवा बिहान के किरन फूटत हवय।

मंजूबाला धीरे-धीरे जसगीत गाये लगिस - 

“माता के अंगना म जोत जंवारा वो लहर-लहर लहराये हो,

दाई के दुवारी म भक्त मन के मेला लगाये हो।

लाल चुनरिया ओढ़े माता, रुप तोर सुहाये हो,

जय-जयकार करे संसार, तोर महिमा गाये हो।”

माता सेवा गीत के आवाज सुनके पड़ोस के मनखे मन घलो आगे। धीरे-धीरे अंगना म भक्त मन के भीड़ लगगे। कोनो फूल चढ़ाइस, कोनो नारियल, त कोनो अपन दुख-दरद  माता के आगू रख दिस।

जंवारा के बीज माटी के भीतर चुपचाप अपन जिनगी के सुरुआत करत रिहिस। कोनो ला पता नइ रिहिस के ओ नान्हें-नान्हें बीज मन म कतका सुंदर हरियाली छिपे हे।

माई के दरबार म सब्बो बराबर

गांव म एक बूढ़ी महतारी रहय जेखर नाव रिहिस मंजरी। 

ओखर कोनो बेटा-बेटी पास म नइ रहय। उमर बढ़गे रिहिस अउ शरीर घलो कमजोर होगे रिहिस। वो रोज मंदिर जाय के इच्छा रखय फेर अब ओखर गोड़ म ओतका ताकत नइ रहिगे रिहिस।

नवरात्रि के दूसर दिन मनोरमा पानी भरे बर निकले रिहिस। रद्दा म ओखर भेंट दुलारी बाई ले होइस। दुलारी बाई लाठी के सहारा ले धीरे-धीरे चलत रिहिस।

मनोरमा पूछिस, “काकी, तंय कहां जात हस?”

मंजरी किहिस, “बेटी, आज माता के मंदिर म जोत देखे के मन हे। फेर मोर गोड़ अब साथ नइ देवत हे।”

मनोरमा कुछू सोचे बिना किहिस, “चल काकी, मंय तोला मंदिर ले जाथंव।”

वो मंजरी के हाथ धरके मंदिर ले गिस। उहां पहुंचके ओखर बइठे के व्यवस्था करिस, पानी पियाइस अउ माता के दर्शन करवाइस।

मंजरी के आंखी म आंसू आगे।

“बेटी, आज मोला लगत हे कि माता खुद तोर रुप म मोर हाथ धरे हे।”

मनोरमा मुसकुराइस अउ किहिस, “काकी, दाई तो सबके मन म रहिथे। हमन एक-दूसर के मदद करबो, त माता घलो खुश होही।”

ओ दिन मंजूबाला अपन बेटी के काम देखके गदगद होगे। वो मनबहल ले किहिस, “सुनत हवव, हमर बेटी के मन म माता के सच्चा मया बस गेहे।”

मनबहल किहिस, “हां मंजूबाला, पूजा के दीया तो तेल ले जलथे, फेर मनखे के भीतर के दीया दूसर के दुख बांटे ले जलथे।”

तीसर दिन बिहनिया जब मनोरमा अंगना म आइस  त वो देखिस के जंवारा के बीज ले नान्हें-नान्हें हरियर पाती निकलना शुरु होगे हे।

ओ खुशी ले चिल्लाइस, “दाई! दाई! देख तो, हमर जंवारा निकल गे!”

मंजूबाला दउड़त अंगना म आइस। ओखर चेहरा म खुशी छलकत रिहिस। वो दुनों हाथ जोड़के माता ला परनाम करिस।

“जय हो दाई! तोर किरपा ले हमर अंगना हरियर होवत हे।”

मनोज घलो जंवारा ल देखके खुश होइस। वो अपन बहिनी ले किहिस, “देख चंदा, ए हरियर पाती मन कतका सुंदर लगत हे!”

मनोरमा किहिस, “भइया, जइसे ए जंवारा धीरे-धीरे बढ़ही, वइसने हमन अपन मन म दया, मया अउ सच्चाई के बीज बोबो  त हमर जिनगी घलो सुंदर बनही।”

मनबहल दूरिहा ले सब सुनत रिहिस। ओखर मन गरब ले भरगे।

दिन बीतत गिस। रोज बिहने जंवारा म पानी डारे जाय। माता के जोत जलाय जाय। जसगीत गाये जाय। अंगना म हरियर जंवारा लहराय लगिस। ओखर हरियर पाती मन देखके अइसन लगय, जइसे धरती खुद माता के स्वागत म अपन हरियर अंचरा लहरावत होय।

गांव के लइका मन घलो रोज आवंय अउ जंवारा देखके खुश होवंय।

गांव के एक बूजुर  मनखे किहिस, “जंवारा के हरियर पाती हमन ला सिखाथे कि जिनगी म कतको कठिनाई आ जाय, फेर उम्मीद के बीज ला कभू नइ छोड़ना चाही।”

नवरात्रि के पांचवां दिन मनबहल के जिनगी म एक नवा संकट आगे। ओखर खेत म पानी के कमी होगे। धान के पौधा सूखे लगिन। आसमान म बादर रहय फेर पानी बरसत नइ रिहिस।

मनबहल खेत के मेड़ म बइठके सूखत फसल ला देखत रहय। ओखर आंख म चिंता साफ दिखत रिहिस।

“हे दाई, अब का होही? इही फसल के भरोसा म घर चलथे। लइका मन के पढ़ई, घर के खरचा, सब इंहीचे ले होथे।”

संझा के बेरा वो उदास मन ले घर लहुटिस। मंजूबाला ओखर चेहरा देखके समझगे के कुछु गड़बड़ हे।

वो पूछिस, “का होइस जी?”

मनबहल किहिस, “खेत सूखत हे। अगर पानी नइ गिरिस त फसल बरबाद हो जाही।”

मंजूबाला ओखर हाथ धरके किहिस, “चिंता झन करव। मेहनत हमन करबो अउ माता ऊपर भरोसा रखबो। दुख के बेरा म मन ला मजबूत रखना घलो पूजा के एक रुप आय।”

ओ रात मनबहल माता के जोत के आगू बइठिस। दीया के लौ हवा म हिलत रिहिस फेर बुतावत नइ रिहिस।

मनबहू के मन म विचार आइस- “जइसने हवा के झोंका के बाद घलो जोत जलत रहिथे, वइसने मनखे ला घलो कठिन बेरा म हार नइ मानना चाही।”

दूसर दिन वो गांव के कुछ किसान मन ला संग म लिस। सबो मिलके पुराना नाला के सफाई करिन, खेत तक पानी पहुंचाय के रद्दा बनाइन अउ तालाब के पानी ला सही तरीका ले उपयोग करे के उपाय सोचिन।

गांव के मुखिया घलो मदद करिस। सबो झन मिलके काम करिन।

मनबहल समझगे के माता ऊपर भरोसा रखे के मतलब हाथ म हाथ धरके बइठे रहना नइ आय। भरोसा के संग मेहनत करना घलो जरुरी हे।

नवरात्रि के सातवां दिन गांव म एक गरीब परिवार के घर आग लगगे। घर के कुछ सामान जरगे। परिवार के मनखे मन रोवत-रोवत मंदिर के तरफ आइन।

गांव के मनखे मन ओ परिवार के मदद करे बर जुटगे। कोनो कपड़ा दिस, कोनो चाउर, कोनो दाल, त कोनो घर बनाय बर बांस अउ लकड़ी के व्यवस्था करिस।

मंजूबाला अपन घर म रखे चाउर-दाल के एक हिस्सा निकालिस। मनोरमा अपन नवा कपड़ा घलो ओ परिवार के नान्हें बेटी ला दे दिस।

मनोज पूछिस, “बहिनी, तंय अपन नवा कपड़ा काबर दे देस?”

मनोरमा किहिस, “भइया, मोर त पहिरे के कपड़ा अउ हे। फेर ओ लड़की के घर जर गेहे। माता के आगू हमन रोज दीप जलाथन, अगर ओही माता के संतान भूख अउ दुख म रहिही  त हमर पूजा के का मतलब?”

चंदा के बात सुनके सबो झन चुप होगे।

मंदिर के पुजारी जी कहिन, “बेटी, आज तंय माता के पूजा के असली मतलब समझा देस। भगवान के आगू फूल चढ़ाना सुंदर बात आय, फेर दूसर के जिनगी म खुशी के फूल खिलाना ओतकेच जरुरी आय।”

ओ दिन मंदिर म आरती के बेरा सबो झन एक सुर म गाइन - 

“माता के अंगना म जोत जंवारा वो लहर-लहर लहराये हो,

दुखिया मन के दुख हरइया, दाई तोर महिमा गाये हो।

भूखहा ला भोजन देबे, रोवत मन ला हंसाये हो,

ममता के अंचरा ओढ़ाके, सबला गले लगाये हो।”

आरती के आवाज गांव के कोना-कोना तक गूंजे लगिस।

अष्टमी के दिन गांव म विशेष पूजा रखाय गे। मंदिर ल फूल, पाना, आम के डारा अउ रंग-बिरंगा कपड़ा ले सजाय गिस। चारों कोती भक्ति के माहौल रिहिस।

मनबहल के घर के जंवारा अब खूब हरियर होगे रिहिस। ओखर पाती मन हवा के संग धीरे-धीरे लहरावत रहंय।

मनोरमा रोज जंवारा के आगू बइठके माता ले बात करत रिहिस।

“दाई, मोला अइसन मन देबे के मंय कभू दूसर के दुख ला अनदेखा झन करंव। मोला अइसन ताकत देबे के मंय सच के रद्दा म चल सकंव। मोर गांव म कोनो लइका भूख के मारे झन रोवय, कोनो बूजुर सियान मन अकेल्ला झन रहय, अउ कोनो गरीब ला अपन गरीबी के कारण छोटा झन समझे जाय।”

मंजूबाला ओखर बात सुनत रिहिस। ओखर आंखी म मया के आंसू आगे।

ओखर मन म विचार आइस के माता के किरपा खाली धन-दौलत पाना नइ आय। माता के किरपा तो सही सोच, नेक मन अउ दूसर के सेवा करे के भावना घलो आय।

उही दिन गांव के कुछ मनखे मन माता के भंडारा करे के फइसला करिन। हर घर ले जेन जइसन सहयोग कर सकिस ओइसने सहयोग मिलिस। कोनो चाउर लइस, कोनो सब्जी, कोनो लकड़ी, त कोनो अपन समय दिस।

भंडारा म गांव के गरीब, अमीर, छोटे, बड़े सबो झन एक संग बइठके प्रसाद खाइन। कोनो के बीच भेदभाव नइ रिहिस।

मनबहल अपन हाथ ले सबला भोजन परोसत रिहिस। ओखर चेहरा म संतोष के चमक रिहिस ।

ओहर किहिस, “आज मोला लगत हे के माता हमर अंगना म सचमुच बिराजे हे।”

नवमी के दिन बिहनिया ले मंदिर म भक्त मन के भीड़ लगगे। ढोलक बाजत रिहिस, मंजीरा के आवाज गूंजत रिहिस अउ माता के जयकारा लगत रिहिस।

“जय माता दी!”

“जय महामाया दाई!”

“जय मां दुरगा!”

मनबहल के घर म घलो पूजा के तइयारी होइस। मंजूबाला नहा-धोके पूजा के थारी सजाइस। चंदा जंवारा के हरियर पाती मन ला देखके भावुक होगे।

नौ दिन पहिली जेन बीज माटी के भीतर चुपचाप परे रिहिस, आज वो हरियर जिनगी के रुप म लहरावत रिहिस।

मनोरमा अपन दाई ले किहिस, “दाई, ए जंवारा ला देखके मोला लगथे कि हमन घलो एखर ले कुछु सीख सकथन।”

मंजूबाला पूछिस, “का सीख सकथन बेटी?”

मंजूबाला किहिस, “दाई, बीज ला माटी म गड़ना पड़थे  तब जाके वो अंकुर बनथे। ओला रोज पानी देना पड़थे, तब वो बढ़थे। वइसनेच मनखे के भीतर के अच्छाई ला घलो मेहनत, मया अउ संस्कार के पानी चाही। तबे वो बढ़ही।”

मनबहल बेटी के बात सुनके मुसकुराइस।

वो कहिस, “बेटी, तोर बात म बहुत गहिराई हे। मनखे के जिनगी घलो जंवारा कस आय। जेन मनखे अपन मन म प्रेम, दया अउ सच्चाई के बीज बोथे  ओखर जिनगी दूसर मन बर छांव बन जाथे।”

पूजा-पाठ के बाद जंवारा विसर्जन बर गांव के मनखे मन एक संग निकलिन। माता के जसगीत गावत, ढोल-मंजीरा बजावत, सबो झन श्रद्धा के संग आगू बढ़त गिस।

हरियर जंवारा हवा म लहरावत रिहिस। लइका मन खुशी ले नाचत रहय। महतारी मन के चेहरा म भक्ति के चमक रिहिस। बूजुर मनखे मन के हाथ माता के परनाम म जुड़े रिहिस।

मनबहल के मन म अब पहिली कस चिंता नइ रिहिस। ओखर खेत के समस्या पूरा नइ सुलझे रिहिस, फेर गांव के एकता ले नवा उम्मीद जरुर जागगे रिहिस।

माता के सच्चा आशीर्वाद

कुछ दिन बाद गांव म झमाझम पानी बरसिस। खेत के सूखत पौधा मन ला नवा जीवन मिलिस। मनबहल के मन म खुशी के लहर दउड़गे। वो आसमान कोती देखके हाथ जोड़िस।

“दाई, तोर किरपा ले हमर खेत म फेर हरियाली आगे।”

फेर अब मनबहल के सोच बदलगे रिहिस। वो समझगे रिहिस के माता के किरपा के संग मनखे के मेहनत, एकता अउ सही काम घलो जरुरी हे।

ओखर परिवार अब हर तीज-तिहार म गरीब मन के मदद करे के संकल्प ले लिस। मनोरमा गांव के लइका मन ला पढ़ाय म मदद करे लगिस। मनोज अपन संगी-साथी मन संग तालाब अउ मंदिर के सफाई करे लगिस। मंजूबाला घलो अकेल्ला रहइया बूजुर सियान मन के हालचाल पूछे लगिस।

धीरे-धीरे गांव म एक नवा बदलाव दिखे लगिस। मनखे मन एक-दूसर के दुख ला अपन दुख समझे लगिन।

एक दिन गांव के मंदिर के पुजारी जी किहिन, “माता के दरबार म जलइया जोत हमन ला रद्दा दिखाथे। फेर ओ रद्दा म चलना हमर काम आय। जंवारा के हरियर पाती हमन ला जिनगी के संदेश देथे - जइसे ए पाती लहराथे, वइसने हमर मन म दया अउ मया के भावना लहरावत रहना चाही।”

मनोरमा मंदिर के अंगना म बइठे जंवारा के पुराना हरियर पाती मन ला देखत रिहिस। ओखर मन म माता के प्रति असीम श्रद्धा उमड़त रिहिस।

वो धीरे-धीरे गुनगुनाय लगिस -

“माता के अंगना म जोत जंवारा वो लहर-लहर लहराये हो,

लाल चुनरिया ओढ़े दाई, सबके भाग जगाये हो।

कोनो के घर म सुख बरसाये, कोनो के दुख हराये हो,

ममता के छांव म रखके, सबला गले लगाये हो।

जय हो दाई महामाया, जय हो शेरावाली,

तोर दरबार म आके दाई, भर जाथे झोली खाली।

तोर मया के जोत जगाके, मन के अंधियारी मिटाये हो,

माता के अंगना म जोत जंवारा वो लहर-लहर लहराये हो।”

        - डुमन लाल ध्रुव 

      मुजगहन, धमतरी (छ.ग.)

          पिन - 493773