*मोर गाँव पूछत हे*-हेम साहू

*मोर गाँव पूछत हे*-हेम साहू


           आज 20 बछर होंगे हमर छत्तीसगढ़ ला बने, तभो ले मोर गाँव रोवत हावय। आज आधुनिक युग मा मोर गाँव सबले पिछवागे। गाँव के जम्मो हरियाली गँवागे, जम्मो परिया अब लुकागे हावय। गाँव गली मा चिखला के संग पानी बोहावत हावय। कौन जनि का होंगे कोनो आरो नई लेवत हावय। मँय काला दोष लगाव सरकार ला या ओकर सरकारी तंत्र ला जेन कभू गाँव ला झाँके बर नई आवय या मंत्री ला जेला वोट से मतलब हावय या गाँव के सरपंच अउ पंच ला, फेर मन मा गुंथव त ये गाँव के मनखे ले बड़का दोषी अपने आप ला पाथव। मोला बढ़िया पढ़इस लिखइस अउ गाँव हा एक नवा सपना देखिस अब जरूर सुराज  गाँव मा आही, जम्मो मोर दुःख पीड़ा ला हरही। मोर गाँव पूछत हे अउ कहिथे कस बेटा ये गाँव मा नवा सुराज कब आही। कब इहाँ के लइका, सियान अउ युवा मन ला नशा ले मुक्ति हो पाही। कब मनखे मन मा भाई चारा आही अउ कब इहाँ के मनखे मन परमार्थी बन पाही। कब इहाँ नवा हरिवाली आही अउ कब गाँव हा सरग जस बन पाही। फेर मोर मेर एक्को सवाल के जवाब नई हावय, सोचत अउ गुनत बस हव। ककरो मेर सवाल के जवाब होही त मोर गाँव तक संदेसा पहुँचा देहू।

-हेमलाल साहू
ग्राम गिधवा, पोस्ट नगधा
तहसील नवागढ़, जिला बेमेतरा