करजा के प्रकार
यू पी एस सी के परीक्षा म करजा के प्रकार के उपर प्रश्न पूछे गे रिहीस । जम्मो किसिम के स्मार्ट अऊ योग्य लइका मन ..... फाइनल इक्जाम बर सलेक्ट होय रिहीन । ओमन अपन अपन जानकरी के हिसाब से अपन अपन तरीका ले जवाब लिखिन ।
मेंनेजमेंट ले जुड़े कुछ मन घला परीक्षा म बइठे रिहीन । ओमन लिखे रहय ...... करजा तीन किसिम के होथे । पहिली किसिम के करजा ओ आय जेला केवल लेना हे पटाना निये , पटाये के जुम्मेदारी ओकर उत्तराधिकारी के आय । जइसे सरकार लेथे । जे लेथे तेला पटाये के कोई आवसकता निये , पटाये बर दूसर ला मेहनत करे बर परही । करजा लेवइया हा जीते जियत सरग पा जथे । ये करजा खाके भागे म ..... धराये पकड़ाये के झंझट घला नइ रहय ।
दूसर किसिम के करजा ओ आय जेला ब्यापारी अऊ उद्योगपति मन लेथे । येहा अइसे करजा आय जेला कभू पटानाच नइ रहय । पटाये के बेर जादा दबाव अइगे त ....... बिदेस म शरण के रसता खुल जथे ........ तहन पटाये के कोई आवसकता निये । अइसन करजा ला ... नइ पटाये ले .... पहिली इँहे सरग मिल जथे अऊ दबाव परे के पाछू बिदेश म सरग मिलथे ।
तीसर करजा कुछ अलगेच किसिम के उत्तम करजा आय .... जेहा लेवइया ला सुख नइ देवय बलकी ..... नइ पटाये बर कहवइया ला .... सुख देथे । येला सिर्फ लेके समे झंझट हे पटाये के झंझट निये । ये करजा ला लेना भर मुश्किल हे फेर पटाना न मुश्किल न जरूरी ......... । मन चाहे तो पटा सकत हस ..... नइ पटाबे तभो कन्हो बात निये । करजा ले छुटकारा पाये बर चुनाव तक अगोरे ला परथे । ये करजा म ....... लेवइया ला केवल माफी भर नइ मिलय .... बलकी अऊ करजा लेके ..... चार बछर कलेचुप बइठे के प्रेरणा घला मिलथे । फेर ये करजा के कमी सिर्फ इही आय के ....... करजा लेवइया कभू न सरग पाय न नरक ....... बलकी माफी देवइया मन ....... जियत जियत अपन संग अपन पूरा परिवार अऊ कुनबा ला सरग के मजा देवा देथे । मेंनेजमेंट ले जुड़े जम्मो लइका मन पास होके ......... कलेक्टर बनगे ।
हरिशंकर गजानंद देवांगन
बहुत सुग्घर सर जी करजा के प्रकार
ReplyDelete