भोकवा

 भोकवा 

बात ल जउन समझथें उन सम्हल के चलथें। जउन नइ समझॅंय उन रहि जथें भोकवा। मनखे अपन काम निकाले बर कतेक चतुरा होथे, कोनो चीज के महत्तम ल कइसे गिरा के अपन स्वारथ साधथे एकर बढ़िया उदाहरण देखौ;

दू झन राहगीर अपन अपन गॉंव जात रहॅंय।एक झन अपन बइलागाड़ी म धान  लादे रहय।

फेर खुद रेंगत गाड़ी म फॅंदाए बइला ल हॉंकत जाय। रद्दा म खाए पिए के समान नइ धरे रहिस काय। दूसर मनखे तिरन धान पान नइ रहिस। हॉं सॅंग म एक झोला धरे रहिस जेमा सेतुआ रहय। भूख मिटाए के बढ़िया चीज। तुरते घोरव अउ पी लव। 

          ए बात ल ओ धान ले जइया जान डरिस। अब ओकर दिमाग कुलबुलाय लगिस के कइसे मैं एकर सेतुआ ल पावॅंव कहिके। यहू सोंचिस के फोकट म नइ लॅंव एकर बदला म धान दे देहूॅं कहिके। बड़ चतुरा। बाते बात म सेतुआ वाले ल कहत हे... भाई! तॅंय भूख मिटाए बर ए का पिचकाट वाले समान धर के रेंगत हस जी...ओला समझावत कहत हे 

सेतुआ मन मेतुआ 

जब घोरब जब घारब 

तब खाब तब जाब---अउ

धान--- 

धान बिचारी भली 

कूटी खाई चली

सेतुआ वाले भाई रहय भोकवा, ए बात ल सुन के अपन सेतुआ ल धान वाले ल देके ओकर तिर ले धान ले लिस.....बाकी जउन हे तउन हवयच

जोहारत 🙏🙏🙏🌹🌹

सूर्यकांत गुप्ता, जुनवानी, भिलाई (छत्तीसगढ़)