स्मारिका - लोक मड़ई -2023 सम्पादन- वीरेन्द्र बहादुर सिंह

 लोक कलाकार मन उपर केंद्रित हे लोक मड़ई के स्मारिका 

स्मारिका - लोक मड़ई -2023

सम्पादन-  वीरेन्द्र बहादुर सिंह 

प्रकाशक - लोक मड़ई उत्सव समिति आलीवारा,जिला - राजनांदगांव 

   

  हमर छत्तीसगढ के लोक संस्कृति अब्बड़ समृद्ध हावय। इहां के नाचा,रहस, पंडवानी, भरथरी, पंथी नृत्य, करमा,सुवा,ददरिया, चंदैनी , ढोला- मारु के एक अलगेच पहिचान हे। इहां के लोक कलाकार अउ निर्देशक मन भारत के संगे संग दुनिया भर म नांव कमाय हे जेमा अंतरराष्ट्रीय पंथी नर्तक देवदास बंजारे, दुलार सिंह साव मंदराजी दाऊ, खुमान लाल साव, लक्ष्मण मस्तुरिहा, मदन निषाद, गोविंद राम निर्मलकर,झाड़ू राम देवांगन, शिव कुमार दीपक, पद्मश्री तीजन बाई,  रंगकर्मी हबीब तनवीर , महासिंह चंद्राकर, दीपक चंद्राकर,ऋतु वर्मा, चिंता दास बंजारे, सुरूज बाई खांडे, फिदा बाई,माला बाई, लक्ष्मी बंजारे, झुमुक दास बघेल, नियाईक दास मानिकपुरी, ममता चंद्राकर, अनुराग ठाकुर, कविता वासनिक, केदार यादव, डा . पीसी लाल यादव,मिथलेश साहू, रामाधार साहू सुनील सोनी , सीमा कौशिक जइसे  कतको लोक कलाकार अपन प्रतिभा ले छत्तीसगढ़ के मान बढ़ाईस हे. 

अइसने राजनांदगांव जिला के जीवट लोक कलाकार मन के बारे म किताब प्रकाशित करना एक सुघ्घर उदिम हे।अउ सुघ्घर कारज होय हे लोक मड़ई उत्सव समिति आलीवारा, डोंगरगांव द्वारा जेकर अध्यक्ष हे श्री दलेश्वर साहू विधायक, डोंगरगांव। 11,12अउ 13 फरवरी 2023 म डोंगरगांव म आयोजित लोक मड़ई -2023 के सुघ्घर बेरा म एक स्मारिका प्रकाशित करे गे हावय जेहा राजनांदगांव जिला  के तीन दर्जन लोक कलाकार मन उपर केंद्रित हावय। येमा दिवंगत लोककलाकार के संगे- संग हमर बीच म  उपलब्ध बड़का लोक कलाकार मन के संघर्ष, उंकर उपलब्धि ल सुघ्घर ढंग से पिरोय गे हावय। ये कड़ी ल जोड़े म अब्बड़ मिहनत करे हावय संस्कारधानी राजनांदगाव के वरिष्ठ पत्रकार, संस्कृतिकर्मी अउ साहित्यकार श्री वीरेन्द्र बहादुर सिंह ह। उंकर सम्पादन म ये बढ़िया काम होय हे जेकर ले नवा पीढ़ी मन ह ये वरिष्ठ लोक कलाकार मन के बारे म जान पाही। ये स्मारिका म नाचा के सियान मंदराजी दाऊ, लोक संगीत सम्राट खुमान साव, रंग मंच के कुशल अभिनेता मदन लाल निषाद,  पद्मश्री गोविंद राम निर्मलकर, गायक, अभिनेता भैया लाल हेड़ाऊ,गायिका, अभिनेत्री फिदा बाई, संगीतकार देवी लाल नाग, गिरिजा कुमार सिन्हा, गायिका दुखिया बाई,अकेडमिक कला गुरु डा. भरत पटेल, अभिनेता दीपक विराट, नाचा कलाकार सुखी राम निषाद, बांस वादक विक्रम यादव, मोहरी वादक पंच राम देवदास, बहुमुखी प्रतिभा के धनी राजेश मारू, स्वय कोकिला कविता वासनिक, गायक गौतम चंद जैन, चंदैनी गायक लतमार दास चंदनिया, रेडियो के उद्घोषक अउ गायक बरसाती भैया, पंडवानी गायक रेवा राम साहू, लोक गायक धुरूवा राम मरकाम, रेडियो के उद्घोषक लाल राम कुमार सिंह,  संगीत नाटक अकादमी पुरस्कार से सम्मानित लोक कलाकार पूनम तिवारी विराट, चंदैनी कलाकार चिंता दास बंजारे, रंग मंच के कलाकार उदेराम श्रीवास, जसगीतकार अउ गायक हर्ष कुमार बिंदु, गीतकार स्वर्ण कुमार साहू, छत्तीसगढ़ के लता माला बाई मन के जीवन परिचय, उंकर कला साधना, संघर्ष अउ उपलब्धि के बारे म एक सुघ्घर दस्तावेज हावय। संगे संग स्मारिका म रवेली नाचा पार्टी के इतिहास के बढ़िया जानकारी हावय जेकर लेखक खुमान लाल साव जी हे। येमा जउन लेखक मन के आलेख प्रकाशित होय हे वोमा खुमान लाल साव,  प्रो. जय प्रकाश साव,डा. पीसी लाल यादव , छंदविद् अरूण कुमार निगम , संजीव तिवारी, वीरेंद्र बहादुर सिंह, डा . सूर्यकांत मिश्रा,राजेन्द्र यादव, मुन्ना बाबू, विजय मिश्रा अमित, ओमप्रकाश साहू अंकुर,सुरेश यादव, अशोक चंद्राकर,डा. नत्थू तोड़े,डा. लोकेश शर्मा, डा. भगवानी निषाद, हर्ष कुमार बिंदु अउ श्रीमती उर्वशी साहू सामिल हे।ये किताब नवा पीढ़ी मन बर अब्बड़ उपयोगी हे। जउन मन ये लोक कलाकार मन के कलाकारी मन ल नइ देख पाय हे वोकर मन बर एक बढ़िया जानकारी हे। ये किताब एक अनमोल दस्तावेज हे।  ये स्मारिका हिंदी म हे अउ 116  पेज के हावय ।सुघ्घर संपादन खातिर भैया वीरेन्द्र बहादुर सिंह अउ स्मारिका म सामिल सबो बुधियार साहित्यकार मन ल गाड़ा गाड़ा बधाई अउ शुभ कामना हे।

         ओमप्रकाश साहू "अंकुर"

        सुरगी, राजनांदगांव