अभी घलो छत्तीसगढ़ी राजभाषा दिवस मनाय के आदेश निकाले जा सकथे"

 "अभी घलो छत्तीसगढ़ी राजभाषा दिवस मनाय के आदेश निकाले जा सकथे"

छत्तीसगढ़ राज्य तेइस बछर पूरा करके चोबीसवाँ बछर म पाँव धर दे हवे। छत्तीसगढ़ी इहाँ के प्रमुख महतारी भाखा आय। छत्तीसगढ़ी ल राज्य के राजभाषा घोषित करे जा चुके हे। छत्तीसगढ़ी ल राजभाषा बनाय बर 28 नवंबर 2007 के विधानसभा म प्रताव पारित होय रिहिस तिही पाय के 28 नवंबर के दिन छत्तीसगढ़ी राजभाषा दिवस मनाय जाथे। सन् 2012 म 28 नवंबर  के दिन तब के मुख्यमंत्री डॉक्टर रमन सिंह ह घोषणा करे रिहिन के हर बछर 28 नवंबर के दिन ल छत्तीसगढ़ी राजभाषा दिवस के रूप म मनाय जाही।

कोन-कोन मनाथे छत्तीसगढ़ी राजभाषा दिवस?

एला तो पूरा प्रदेश वासी ल मनाना चाही। फेर का मनाथे? मोर जानती म एकात दू ल छोड़ के कोनो इसकुल-कालेज तक म छत्तीसगढ़ी राजभाषा दिवस मनाय के जानकारी नइ मिले हे। साहित्यकार अउ साहित्यिक संस्था भर म छत्तीसगढ़ी राजभाषा दिवस मनाय के आरो मिलथे। यदि मैं ये काहँव ते गलत नइ होही के इस्कुल कालेज वाले मन ल तो जानकारिच नई हे के छत्तीसगढ़ी राजभाषा दिवस कोन दिन मनाय जाथे। 

सरकारी आदेश के अपेक्षा

यदि कोनो जानकार मास्टर छत्तीसगढ़ी राजभाषा दिवस मनाय के बात करही तौ स्टाफ के बहुत झन मन जेन छत्तीसगढ़ी ल हीन भावना ले देखथे अउ छत्तीसगढ़ी ल भाषा नहीं बोली मानथे तेन मन बिरोध म खड़े हो जाथे। अइसन हालत म छत्तीसगढ़ी  राजभाषा दिवस मनाय के सरकारी आदेश के बड़ जरूरत महसूस होथे। तौ सरकार आज तक अइसन आदेश काबर नइ निकाल सकिस? सुरता करव सरकार कई पइत आने-आने भाषा बर आदेश निकाल चुके हे। कभू गुजराती बर, कभू उड़िया बर तो कभू बंगला भाषा पढ़ाय बर आदेश निकाले गे हे। तौ का छत्तीसगढ़ी भाषा बर अइसन आदेश नइ निकाले जा सकय?

जरूर निकाले जा सकथे। आजकल वाट्सऐप मैसेज के जमाना हे। सरकार अपन काम करवाय बर रातोंरात मैसेज वाट्सऐप कर देथे। अउ सरकारी अमला ओखर पालन म जुट जाथे। सरकार के मुखिया चाहे तो 28 नवंबर  के दिन जम्मो शैक्षणिक संस्थान म छत्तीसगढ़ी राजभाषा दिवस मनाय के आदेश वाट्सऐप अभी करे जा सकथे। हिंदी सप्ताह अउ हिंदी पखवाड़ा कस छत्तीसगढ़ी सप्ताह अउ छत्तीसगढ़ी पखवाड़ा घलो मनाय जा सकथे।

इस्कुल-कालेज के मास्टर मन ले बिनती हे के सरकारी आदेश के रद्दा देखे बिना काली 28 नवंबर के छत्तीसगढ़ी राजभाषा दिवस धूमधाम ले मनावँय।

जय जोहार! जय छत्तीसगढ़ी!! जय छत्तीसगढ़ महतारी!!!

-दिनेश चौहान

  छत्तीसगढ़ी भाषा मयारुक