"छन्द के छ" परिवार के गौरव, बहुमुखी प्रतिभा के धनी, उत्कृष्ट शिक्षक, "छन्द के छ" के वरिष्ठ साधक श्री चोवाराम वर्मा "बादल " जी ला 05 सितम्बर 2019, शिक्षक दिवस के शुभ अवसर मा छत्तीसगढ के राजभवन मा आयोजित "राज्य शिक्षक सम्मान 2019" ले सम्मानित करे गिस। ए गरिमामयी कार्यक्रम के
मुख्यअतिथि - महामहिम (सुश्री) अनुसुइया उइके जी
(राज्यपाल छत्तीसगढ़)
अध्यक्ष- माननीय भूपेश बघेल जी
(मुख्यमंत्री, छत्तीसगढ़ शासन)
विशेष अतिथि - डाॅ. प्रेमसाय सिंह जी
(स्कूल शिक्षा मंत्री, छ.ग.) रहिन। इनमन के हाथ ले "राज्य शिक्षक सम्मान 2019" प्राप्त करना चोवाराम "बादल" जी के संगेसंग हमर छंद के छ परिवार बर अब्बड़ खुशी अउ गर्व के विषय आय। "छन्द के छ" परिवार डहर ले बादल जी ला गाड़ा-गाड़ा बधाई।
जीवन परिचय - श्री चोवाराम "बादल"
सुयोग्य शिक्षक अउ सुजानिक साहित्यकार - श्री चोवाराम "बादल"
श्री देवसिंग वर्मा अउ श्रीमती सोनकुंवर वर्मा के दुलरुवा बेटा चोवाराम "बादल" के जनम मई 1961 के ग्राम कुकराचुंदा, पो. मोहभट्ठा, तहसील सिमगा, जिला बलौदाबाजार-भाटापारा म होइस। चोवाराम बादल जी एम.ए. (हिन्दी साहित्य, अर्थशास्त्र, संस्कृत, अंग्रेजी) के शिक्षा प्राप्त करिन अउ बी टी आई करे के बाद अध्यापकीय काम ला अपन जीविका के साधन बनाइन। आप वर्तमान मा शासकीय उच्चतर विद्यालय केसदा, विकासखंड - सिमगा, जिला - बलौदाबाजार-भाटापारा
मा व्याख्याता (प्र प्राचार्य) के पद मा शिक्षा के जोत जलावत हव।
बचपन ले बादल जी के रुचि साहित्य अउ कला के प्रति रहिस। हिन्दी और छत्तीसगढ़ी भाषा मा इनकर समान अधिकार हे। ये दुनों भाषा मा कतको आलेख, कहानी, एकांकी, छन्द, गीत अउ गजल के सिरजन कर डारिन हें। बादल जी के रचना के प्रसारण आकाशवाणी व दूरदर्शन ले होते रहिथे। साहित्य सेवा मा बादल जी के अभी तक तीन किताब प्रकाशित हो चुके हे।
"रउनिया जड़काला के" छत्तीसगढ़ी कविता अउ गीत के संग्रह आय। "छन्द बिरवा" छत्तीसगढ़ी भाषा मा पचास ले अगर छंदबद्ध रचना के संग्रह आय जेमा हर छन्द के विधान तको बताए गेहे। "जुड़वा बेटी" किताब गद्य-संग्रह आय जेमा कहानी अउ निबंध के सुग्घर संकलन हे। साहित्यिक अवदान बर चोवाराम "बादल" जी ला कतको सम्मान मिल चुके हे -
मानस सम्मान (तुलसी मानस संस्थान, राजनाँदगाँव)
मधुर साहित्य सम्मान (डौंडीलोहारा) शिक्षक रत्न पुरस्कार (धमतरी) काव्यश्री सम्मान (छत्तीसगढ़ साहित्य परिषद, बिलासपुर), वदान्या सम्मान (बिलासपुर)
छत्तीसगढ़ी मा छंदबद्ध काव्य संग्रह "छन्द - बिरवा" प्रकाशित करे बर बादल जी ला साल 2019 मा "छत्तीसगढ़ी छन्द रतन" सम्मान मिलिस हे। चोवाराम "बादल" जी, छत्तीसगढ़ी भाषा के समृद्धि बर "छन्द के छ" आंदोलन म जुड़ के छत्तीसगढ़ के नवा नवा रचनाकार मन ला छत्तीसगढ़ी मा छन्द विधान सिखावत हें।
आपमन बहुमुखी प्रतिभा के धनी चोवाराम "बादल" जी ला एसो 05 सितम्बर शिक्षक दिवस मा "राज्य शिक्षक सम्मान" मिले के खुशी मा अपन बधाई अउ शुभकामना पठो सकथव। बादल जी के पता हे -
चोवाराम "बादल"
ग्राम उड़ेला, पो हथबन्द(रेल्वे स्टेशन) तहसील सिमगा, जिला बलौदाबाजार-भाटापारा, छत्तीसगढ़ 493113
बादल जी के मोबाइल नंबर - 9926195747
प्रस्तुतकर्ता - अरुण कुमार निगम
