छत्तीसगढ़ी लोकाक्षर परिवार के मार्गदर्शिका सरला शर्मा, “संत कवि पवन दीवान स्मृति सम्मान” ले सम्मानित*

 

*विधा - रिपोर्ताज*

*छत्तीसगढ़ी लोकाक्षर परिवार के मार्गदर्शिका सरला शर्मा, “संत कवि पवन दीवान स्मृति सम्मान” ले सम्मानित*

तारीख 03 मार्च 2024, दिन इतवार के छत्तीसगढ़ शासन के संस्कृति विभाग अउ छत्तीसगढ़ी विप्र समाज द्वारा समता कॉलोनी रायपुर मा संत कवि पवन दीवान के सुरता मा श्रद्धांजलि सभा अउ सम्मान समारोह के सफल आयोजन करे गे रहिस। ये कार्यक्रम मा सरला शर्मा (छत्तीसगढ़ के महिला साहित्यकार, दुर्ग जिला हिन्दी साहित्य समिति, दुर्ग के अध्यक्ष, छत्तीसगढ़ी लोकाक्षर के मार्गदर्शिका) अउ छत्तीसगढ़ी भाषा बर आंदोलन करइया सियान नंद किशोर शुक्ला ला “संत कवि पवन दीवान स्मृति सम्मान” ले सम्मानित करे गिस।

श्रद्धांजलि सभा मा पूर्व मंत्री रवींद्र चौबे अपन उद्बोधन मा कहिन - “संत कवि पवन दीवान सांसद, विधायक, कवि, ब्रह्मचारी च नइ, छत्तीसगढ़ के आत्मा रहिन। उन मन राजनीतिक मंच के संगेसंग मानस, कविसम्मेलन के मंच मन मा छत्तीसगढ़ के पीरा ला परगट करँय। पवन दीवान छत्तीसगढ़ बर भगवान आँय अउ इही भाव मा हमन उन ला सुरता करत रहिबो।”

ये मंच ले कवि मीर अली मीर, संजय शर्मा, कवयित्री सुमन बाजपेयी, संध्या रानी शुक्ला आदि मन अपन कविता के माध्यम ले पवन दीवान जी ला श्रद्धा-सुमन अर्पित करिन। आयोजन मा छत्तीसगढ़ी लोकाक्षर के संस्थापक डॉ. सुधीर शर्मा सहित छत्तीसगढ़ के अनेक बुधियार विद्वान अउ नागरिक मन उपस्थित रहिन।

*अरुण कुमार निगम*