आज अंतर्राष्ट्रीय महिला दिवस मनाए जावत हे । बने बात आय थोरकुन पीछू

 आज अंतर्राष्ट्रीय महिला दिवस मनाए जावत हे । बने बात आय थोरकुन पीछू 

डहर जाए के मन होइस त सुरता आइस ...। 

    सन् 1900 के पहिली संसार के कोनो देश राज मं महिला मन ल बरोबरी करे के अधिकार नइ रहिस न सामाजिक न राजनैतिक न पारिवारिक स्तर मं फेर का ? महिला मन मं जागृति आए बर सुरु होइस त सन् 1909 के 28 फरवरी के बिहनिया बेरा अमेरिका मं महिला मन छोटकुन बैठक करीन । 

 1910 मं ए बैठक मं अंतर्राष्ट्रीय महिला जागरण के बात चिटिक जोरहा उठिस । 

1911 मं अमेरिकन महिला मन के संग अउ कई देश के महिला मन संगठन बनाये बर सुरू कर दिहिन ...बरोबरी के चर्चा जोर पकड़े लगिस । 

    आवागमन के असुविधा , सम्पर्क के अभाव के संग पोट्ठ नेतृत्व के कमी के चलते ए आंदोलन हर अपन अपन देश , राज , समाज तक रुंधा गिस तभो गुंगुआत तो रहिबे करिस । समय जात देरी तो लगय नहीं ...60 साल ले ऊपर होगिस ...चिंव चांव कभू काल सुना जावय फेर कोनो देश मं जबरदस्त आंदोलन नइ होइस ..। 

    सन् 1975 मं महिला मन फेर जागिन एदारी अमेरिका के महिला मन यूरोपीय देश के संगे संग भारत के जागरुक महिला मन से सम्पर्क , बातचीत , चिट्ठी पत्री के माध्यम से संगठन के उद्देश्य ल बगराइन सुरता राखे लाइक बात एहर आय के तब तक दूनों विश्व युद्ध खतम हो गए रहिस भारत असन कई देश मं नारी शिक्षा बगर गए रहिस । एतरह यूनाइटेड नेशंस हर 8 मार्च ल अंतर्राष्टीय महिला दिवस मनाए के घोषणा करिस । 

  सबले जरुरी बात जेला सुरता करत हन के 1909 के पहिली महिला मन ल ..

1 वोट देहे के अधिकार नइ रहिस 

2 पुरुष मन के बरोबर तनखा नइ मिलत रहिस । 

3 महत्पूर्ण पद मं महिला मन के स्थापना नइ होवत रहिस । 

4 महिला मन ल सामाजिक , राजनीतिक समानता नइ मिलत रहिस । 

        आज 8 मार्च 2026 आय प्रश्न हे अतका साल बाद जब महिला मन ल राष्ट्रपति असन पद मिलत हे , सेना , मेडिकल , इंजीनियरिंग मं जगह मिले बर शुरु हो गए हे त अंतर्राष्ट्रीय महिला दिवस के जरुरत काबर हे ? दूसर बात अगर जरुरत हे त कोन क्षेत्र मं हे , ओ क्षेत्र मं कोन तरह से उदिम करना चाही ? 

      संगवारी मन ! चिटिक थिरा के सबो झन गुनव न ? एला आदेश नहीं अनुरोध समझिहव । 

       सरला शर्मा