गणेश चतुर्थी तिहार - श्री महेन्द्र देवांगन "माटी"

पहिली पूजा गणेश जी के

हिन्दू धर्म में कोनों भी काम के शुरुवात गणेश जी के पूजा पाठ ले करे जाथे । काबर गणेश जी हा सबके मंगलकारी अउ विघ्न विनाशक देवता हरे। एकर पूजा करे बिना कोनों भी काम सफल नइ हो पाय ।

गणेश जी के अन्य नाम  ----
गणेश जी के अउ बहुत अकन नाम हे । जइसे  -- गणपति,  गजानन, लंबोदर, विघ्नहर्ता , गणनायक, विनायक , एकदंत ये प्रकार ले 108 नाम हे ।

गणेश उत्सव  -------
भादो महीना के अंजोरी पाख (शुक्ल पक्ष) चौथ ( चतुर्थी) से ले के चौदस (चतुर्दशी ) तक दस दिन ले पूरा भारत भर में  गणेश उत्सव धूमधाम से मनाय जाथे ।

गणेश स्थापना  --------
गणेश उत्सव मनाय के पहिली गणेश बइठारे बर ओकर आसन बनाय जाथे । बड़े - बड़े पंडाल लगाये जाथे । लाइट माइक के बेवस्था करे जाथे , ओकर बाद पंडित जी के द्वारा पूजा - पाठ करके माटी के गणेश के स्थापना करे जाथे ।
विधि विधान से पूजा करे के बाद आरती गाये जाथे अउ परसाद बाँटे जाथे ।

गणेश जी के वाहन -----
गणेश जी के वाहन मुसवा (चूहा ) हरे । कहीं भी  आना जाना हे त मुसवा में चढ़ के जाथे ।

अराध्य देव ---- गणेश भगवान ह हिन्दू मन के अराध्य देव हरे । कोई भी काम करे के पहिली एकरे पूजा करे जाथे ।
पुराण में एक कथा आथे के एक दिन माता पार्वती ह अपन शरीर के मइल ला निकाल के एक बालक बनाइस , ओकर नाम वोहा गणेश रखीस । जब माता पार्वती ह नहाये (स्नान)  करे बर गीस त गणेश जी ला पहरेदारी करे बर दरवाजा में खड़ा करा दीस , अउ बोलीस के - कोनों ला भी भीतर खुसरन झन देबे ।
माता के आज्ञा पा के गणेश जी ह दरवाजा में खड़ा होगे ।
थोकिन बाद में शंकर जी ह आ गे अउ भीतरी में खुसरे ला धरीस । त गणेश जी ह वोला रोक दीस । गणेश जी अउ शंकर जी दूनों झन में बहुत बहस चलीस । शंकर भगवान ह गुस्सा में  आ गे अउ अपन त्रिशुल से बालक के सिर ला काट दीस ।
जब माता पार्वती ला ए बात ह पता चलीस त वोहा बहुत नराज होगे अउ वोला जिंदा करे के जिद्द कर दीस ।
माता पार्वती के घुस्सा ला देख के सबो देवता मन डर्रागे । देवर्षि नारद के सलाह से माता जगदंबा के स्तुति करके पार्वती ला शांत कराये गीस ।
शिव जी के आदेश से विष्णु जी ह उत्तर दिशा में गिस अउ सबले पहिली मिले जीव हाथी के मुड़ ला काट के लाइस ।
हाथी के मुड़ ला गणेश जी के धड़ मा लगाइस , ताहन गणेश जी जिंदा होगे ।
गणेश जी के जिंदा होय के बाद सब देवी - देवता खुश होगे अउ सबझन आशीर्वाद दे के वोला गणनायक घोषित करीस ।
वोला सबले पहिली पूजा करे के वरदान मिलिस । तब ले गणेश जी के पहिली पूजा करे जाथे ।
गणेश जी के पूजा करे ले सब प्रकार के कष्ट  अउ बाधा दूर हो जाथे। घर में सुख शांति अउ समृद्धि आथे ।

महाभारत महाकाव्य के लेखक  ------------
जब महर्षि वेदब्यास जी ह महाभारत महाकाव्य रचना के तैयारी करत रिहिसे तब वोला एक अइसे लेखक के तलाश रिहिसे जेहा ओकर सोच के गति के साथ ताल मिला के उही गति में लिख सके । बीच में रुकना नइहे । अइसे प्रतिभावान लेखक के तलाश में वेदब्यास जी बहुत जगा घुमीस , फेर कोनों नइ मिलिस । अंत मे वोहा गणेश जी के पास गीस अउ सब बात ला बताइस । गणेश जी हा तैयार होगे ।
गणेश जी हा घलो शर्त रखीस के मेंहा लिखे के शुरु करहूं ते रुकंव नहीं,। बीच में तहूँ अटकबे झन । जब तक पूरा नइ हो जाय । मोर कलम एक बार रुकही ते आघू नइ बढय ।
महर्षि वेदव्यास जी ह घलो वोकर शर्त ला मान लीस ।
महर्षि वेदव्यास जी ह बोलत गीस अउ गणेश जी ह उत्ता धुर्रा लिखत गीस । ये प्रकार ले महाभारत  महाकाव्य के रचना होइस ।
बोलो गणेश भगवान की जय ।

लेखक - श्री महेन्द्र देवांगन "माटी"
पंडरिया  (कवर्धा)
छत्तीसगढ़
8602407353