मंगनी म मांगे मया नइ मिलै रे मंगनी म……
दउँड़त-भागत बिसौहा पान ठेला म तमंचा मिलगे। ये चलाए वाला तमंचा नोहय, मोर सँगवारी के बढ़उवल नाम आय। असली नाम त बने असन हे, फेर में म का रखे हे ? मोर मितान तमंचा ह राजश्री के पाऊच फाँकत रहिस। मोला देख के कहिस - कहाँ उत्ताधुर्रा जावत रहे ? आ...पान खा ले। मँय कहेंव - तुहिच्च ल खोजत रहेंव। पदमश्री बर अप्लाई कर दे, ऑनलाइन फारम भरे के चालू होगे हे, इही बात ला बताए बर तोला खोजत रहेंव। तमंचा ठठा के हाँसिस अउ कहिस - पान सिगरेट नइ चले त कोनो बात नइये, पद्मश्री-वदमश्री के बात झन कर, सोझबाय राजश्री खा ले। मँय कहेंव - तमंचा भाई, तँय छत्तीसगढ़ के अतका बड़े साहित्यकार आस, कतको किताब छप गेहे, बड़े बड़े सम्मान पाए हस। तोला पद्मश्री बर फारम भरना चाही। तमंचा कहिस - मांग - तांग के मिलिस तेन कइसन सम्मान ? देख भाई ! महूँ जानत हँव, अभी सीजन चलत हे। जइसे पानी-बादर के आरो पाके मेचका अउ भिन्दोल मन बाहिर आ जाथें वइसने फेसबुक अउ वाट्सएप मा टरर-टरर चलत हे। बेंगुआ मन घलो राग अलापत हें। साल भर के सुते कुंभकरण मन मार कोट-टाई मार के अपन सम्मान वाले फोटू ल घेरीबेरी चेंपत हें। फेसबुक म मन नइ माड़िस त वाट्सएप ग्रूप, मैसेंजर अउ निजी इनबॉक्स तको ला नइ छोड़त हें। कोनो अध्यक्ष वाले त कोनो माई पहुना वाले नेवता पाती ला घलो चिपकावत हें, भले पर साल के काबर नइ रहय। अउ तँय पतियाबे नइ कि कोनो कोनो त दूसर माई पहुना के नाम ला कटवा के अपन नाम जोड़वावत हें। संगी तँय अड़हा गतर के ! पदमश्री पदमश्री देखत हस, इहाँ आयोग के जुगाड़ बर अपन अपन गोटी फिट करे के चक्कर मा अपन अपन उपलब्धि ला नरी म लटका के जुगाड़ खोजत हें। एखर ओखर संग फोटू खिंचवा के पेपर म तको छपवावत हें। अरे बइहा, फेसबुक के हाट-बजार मा घलो किंजरे कर। तँय मोर लँगोटिया मितान आस। तोर मया के कदर करथंव फेर भइया तँय सम्मान अउ पद-कुर्सी के चक्कर ला नइ जानस। आने काम करइया ला आने बात बर सम्मान मिल जाथे। हमर बातचीत ला बिसौहा सुनत रहिस अउ कहिस - साहेब ! राजश्री लेना हे त जतिक चाही ले लेवव। मँय दुहूँ, कहाँ पदमश्री के चक्कर म अरझत हव। अरे ! इहाँ मंगनी म मया नइ मिले। तमंचा ह राजश्री के पाँच पाऊच अउ लिस फेर हमन अपन अपन घर डहर रेंग देन।
अरुण कुमार निगम
बहुत सुघ्घर सटिक व्यंग्य (गुरूजी)आपके सृजन ला सादर नमन् गुरू जी
ReplyDeleteसुग्घर व्यंग्य गुरुदेव। प्रणाम।।
ReplyDeleteउत्कृष्ट व्यंग गुरूदेव। प्रणाम।
ReplyDeleteदूनों झन भरौ अरुण जी! मिल जतिस तव मजा आ जातिस, हमूँ भरना चाहत हन, फेर हमला भरे बर नहीं आवय,तेकर सेती चुप चाप बैठे हन, का करबो?
ReplyDeleteबहुतेच सुग्घर रचना आदरणीय
ReplyDeleteवाह वाह सटीक व्यंग्य हे गुरुदेव।सादर नमन।
ReplyDeleteअब्बड़ सुग्घर व्यंग्य गुरुदेव सादर प्रणाम ।।
ReplyDeleteबहुतेच सुग्घर गद्य गुरुदेव,अनंत नमन👌👍💐💐💐
ReplyDeleteअति सुन्दर गुरुदेव जी सादर नमन
ReplyDeleteजबरदस्त व्यंग्य भैया के...एकदम सटीक
ReplyDeleteसादर प्रणाम भैया...
🙏🙏🙏🌹🌹🌹🌹
वाह लाजवाब व्यंग हे गुरुदेव सादर नमन।
ReplyDeleteएकदम जोरदारहा व्यंग हावय गुरुददा।
ReplyDeleteजमकरहा व्यंग्य
ReplyDeleteचाटुकारिता के इहाँ,चलत हवय अब राज।
ReplyDeleteजे जितना ही कर सकै,मुड़ मा ओकर ताज।।
करारा व्यंग्य गुरुदेव।
सुग्घर व्यंग्य, गुरुदेव ।सादर नमन ।
ReplyDelete