उपाय
भ्रस्टाचार बहुत जादा बाढ़ चुके रिहिस । येकरे सेती देश म मँहँगई हा पदोवत रिहिस । देश के गरीब मनखे के जीना दूभर हो चुके रिहिस । सरी पार्टी के मन येला मेटाये बर बहुत जादा चिंतित रिहिन । ओमन अपन विरोधी पार्टी के भ्रस्ट मनखे ला गिन गिन के कोसे लगिन अऊ सरी जनता ला बताय लगिन के येकरे मन के सेती भ्रस्टाचार हा पनपे हे । इही मन भ्रस्टाचार बगराय के कारन आय । इनला चिन्हव अऊ जतेक जल्दी हो सके सत्ता ले वंचित करव ।
जनता काय कर सकही .. सबो जानत हे । ते पायके बपरा मन खुदे भ्रस्टाचार ला जड़ ले उखाने बर भिड़ गिन । बड़ उपाय तलाशिन । उपाय बहुत आसान रिहिस । कुछ दिन पाछू ... एक पार्टी के भ्रस्ट मन ला .. दूसर पार्टी वाले मन .. अपन म संघेर लिन या अपन मन ओकरे संग संघर गिन । भ्रस्टाचार ला मेटाये के फिकर सबो झन ला रिहिस तेकर सेती ... दूसर अऊ तीसर पार्टी वाले मन घला अइसने करिन .. अब इहीच मन ओला मेटाये के ठेका थोरेन लेहे तेमा .. तेकर सेती ... सबो पार्टी वाले मन भिड़ गिन .. । गऊकिन ... भ्रस्टाचार हा अपने अपन जड़सुद्धा मेटाके कहाँ फेंकइस ... पता नइ चलिस ।
हरिशंकर गजानंद प्रसाद देवांगन , छुरा
No comments:
Post a Comment