लघु कथा " पुतला दहन के बाद "

 लघु कथा 

   " पुतला दहन के बाद "

मंगलू  पूछत रहिस -" रावण जलिस ग  l "

टेचरू के टेचरही गोठ चलिस -" काबर जलही जी, पुतला के दहन होइस हे जइसे काली एक मंत्री के होइस हे l ओकर पुतला बना के चौक म जला दीस l अंड बंड बोल दीस समाज के ऊपर l कोन छोड़ही l ओइसने कसरहा करे हे दसहरा मनाये बर गड़िया दीस पुतला लान के रावण जलाबों कहिके l 

का? आतिस बाजी होथे कइथे न ओइसने फूट गे फटाका फड़ फड़ फड़ l"

" तोला तो मजा आइस होही बने रंगरेलिहा हस l देखे ला मिलिस होही सब बने बने ला l" 

     " त का l मजा ले ए बर तो मनाथे l रावण मरही त रोये ल जाथे सब? मजा ले बर  सब जाथे l

भारी भीड़, भीड़ के मजा अलग रहिथे l गोड़ खुनदावत हे वो चिल्लावत हे देखत नई हस अंधरा होगे हस चपकत हस गोड़ ला l"

मंगलू कइथे -"एखरे सेती मय धुरिहा ले देखेंव ,आगेव l बिगर चस्मा के धुरिहा के बने दिखय नहीं l"

टेचरु कहिस -" तीर के ला बने देखतस, है ना l 

राम दरबार तो धुरिहा म रहिस मंच म रावण सरकार तीर म रहिस l लील्ला करय्या मन खेल खेलथे l सकलाये भीड़ लील्ला नई देखय l"

मंगलू -" त काला देखथे? "

टेचरु -"सीता ला चोराये रहिस रावण ला l तेन ला देखथे lदस मुड़ी कइसे हे?

कइसे हाँसत हे?

मंगलू -"हमर इहाँ के गभरु अस उहू चोराये के लाये रहिस l ओला तो उही बाई कूट कूट ले कूट डरिस l लाने हस दे सोन के पुतरी,खिनवा l"

टेचरु -" एती ला कान धर या ओती ले कान धर l सोन के मिरगा नई दिखतीस त होतिस नहीं l सोना के लंका वाले  देखत रहिथे मौका ला l"

मंगलू कहिस -" सुने हँव ओकर टुरी कोन ला धर के भगागे? "

" काकर, पलटू के टुरी ल कहत हस?

" नाम लेना पाप हे भइया बिन जाने बिन देखे l"

"अरे साले तोतवा के टुरा हरे l 

तपत हे साले ह बाप के कमाई म बुगबुगी डांटे हे l पीछू साल जेल घलो गे रहिस l पैसा कौड़ी दीस होही जल्दी छूट के आगे 

निर्दोस बरी l आदत परगे हे चोट्टा साले के l"

मंगलू चुल्की मारत कइथे -" ओला कोन जलाही देखबो l बात तो आज नहीं तो कल खुलबे करही l" 

फेर दशहरा मनाबो गाँव म l

टेचरु हाँसत हाँसत  धरिस अपन साइकिल निकल गे l

रावण जल गे फेर ओकर गुन घर गाँव गली समाज देस राज म फैले हे l अवगुन  नई होवय दूर पुतला जलाये भर मl 

मुरारी लाल साव 

कुम्हारी