-
* दु छत्तीसगढ़ी लघु कथा*
(1)
*देवी-देवता*
-------------------------------
*"आन भाखा म गोठ करईया मनखे मन बर, हम छत्तीसगढिया मन के मन म बड़ आदर भाव उपजथे। वोमन ल हमन देवी देवता मन ल कम तो समझबे नई करन..."*
*--*
हमन रेलगाड़ी के टेशन में आके बइठे रहेन। असल म हम सब झन गिरौदपुरी के मेला देख के फिरत रहेंन । हमन कोरी- ख़इरखा तो नइ रहेन, तब कम भी नइ रहेन ।
गाड़ी आए बर लेट रहिस । कतक चलबे रे जाँगर अउ कतेक चलबे रे रेल...! अउ का न का रकम- रकम के गोठ चलत रहिन । कनहुँ कनहुँ बादर- पानी के गोठ करें, तब कनहुँ- कनहुँ मन खेत- खेतवाही के गोठ म माते रहिन ।कर्जा -बोड़ी लेये-छूटे के बात भी होवत रहिस ,फेर फुसुर -फ़िया म । एक- दु झन तो थकासी मिटाय बर संझाती के कार्यक्रम के भी बात करत रहिन ।
वोतकी बेरा एक झन हमी मन असन हाथ गोड़ अउ हमी मन असन साधारण पिंधना -ओढ़ना वाले मई लोग अइस अउ हम मन के मंझ म आके बइठ गय । बइठ गय तब बइठ गय ! रेलवाही प्लेटफॉरम हर हमीच मन के थोरहे ये? गाड़ी आही अउ ये बपुरी घलव चढ़ही जी ! का करे बर हे हमन ल...
वो नारी परानी हर बड़ बेर ल चुप रहिस हे । वोकर कोती काकरो ध्यान नइ रहिस । फेर गाड़ी बैरी ! लेट उपर लेट होत जात रहिस । अब वो मई लोग हर, हमर एक- दु झन मई लोग मन करा बातचीत करे के शुरू कर दिस ।
अब तो हमर सबो नारी- परानी मन वोला घेर डारिन, वोकर गोठ ल सुने बर ।सब तीर म आवत जाँय अउ वोला जोहार -बन्दगी करें । अउ वोकर मुख ल देखत तीर म बइठत जाँय । धीरे -धीरे हम सबो बाबू पिला मन घलव ठुला गयेंन वोकर तोर म । फेर सबो के हाथ हर जुरे रहिस ।
ट्रेन आइस तब पहिली सीट म वोला बइठारेंन अउ उतरे के बेरा एक पइत फेर सबो झन पाँ परेंन । अब घर हमावत ल डहर भर भर ,वोकरेच बात करत रहेंन ।
वो मई लोग के पीछू म देवी -देवता असन औरा -जोत-प्रभामंडल चमकत हावे अइसन लागत रहिस ।
वोहर हमर भाखा के छोड़, कनहु आन भाखा म गोठियाय भर रहिस ।
***
(2)
*जाड़ के दिन*
------------------------
जाड़ के दिन आ गय रहय । अंगनु हर अपन करिया कमरा ल खोज के फेर झर्रात- पीटत हे । कंबल ल झर्रात वो गुनत हे । आज जइसन मौसम रथे, तइसन के लइक पिंधे -ओढ़े के कपड़ा -ओनहा परिवार के सबो मनखे मन बर हांवे ।
ददा हर सुरता करे...वोमन के परिया म अइसन जाड़ - जड़कल्ला मन बिन ओनहा -कपड़ा के निकल घलव जाय । कमरा -कंबल बिसाय बर तो गुने बर लागे । दु चार टेपरी खेत रहिन । बरछा -बारी रहिन । वोमन ल जोगे जाय बर लागे ।
फेर आज न ददा ये , न वोकर खेत मन यें । हां ! सब मनखे मन बर कमरा- कंबल जरूर हे ।
*रामनाथ साहू*
***
No comments:
Post a Comment