सुरता* सरल ,सहज अउ अद्भुत प्रतिभा के धनी रिहीस स्वर्गीय किशोर मिश्रा जी...

 

*सुरता*

सरल ,सहज अउ अद्भुत प्रतिभा के धनी रिहीस स्वर्गीय किशोर मिश्रा जी...

कवि ,साहित्यकार ,भागवताचार्य,मंच संचालक स्वर्गीय किशोर मिश्रा जी के जनम 5 मई1966 के मध्य प्रदेश के जिला बालाघाट मा होय रिहिस। उंखर  पिताजी के नाम श्री रविशंकर मिश्रा रहीस  वोहर शासकीय नेहरू महाविद्यालय डोंगरगढ़ मा सहायक प्राध्यापक के पद मा कार्यरत रिहिस उंखर पिताजी के लगाव घलो साहित्य के क्षेत्र मा रिहिस वहु मन अपन जमाना मा अपन घर मा काव्य गोष्ठी के आयोजन करवावंय। ऊँखर माताजी के नाम श्रीमती रमा देवी मिश्रा रहीस। स्वर्गीय मिश्रा जी के बचपन से लेकर पूरा जीवन राजनादगांव जिला के डोंगरगढ़ म बितिस।

शिक्षा--स्वर्गीय मिश्रा जी अपन पूरा पढ़ाई डोंगरगढ़ मा करिन एमफिल  के पढ़ई रायपुर छत्तीसगढ़ म पूरा करिन। पढ़ाई पूरा होय के बाद नौकरी  पाए खातिर संघर्ष जारी रखिन अउ सफलता घलो मिलिस शिक्षक के पद मा मानपुर ब्लॉक के औंधी म  उंखर नियुक्ति होइस,फेर उंखर पिताजी के सपना रिहिस के वहू हा अपन असन सहायक प्राध्यापक बनय, उंखर पिताजी मिश्रा जी ला नौकरी छोंड़वा के घर ले आईन,समय बितत गिस अपन पिताजी के सपना पूरा करे खातिर मिश्रा जी के संघर्ष निरंतर जारी रिहिस,कुछ दिन बर मिश्रा जी हा कवर्धा के शिशु मंदिर म आचार्य के पद मा घलो काम करिन, उंखर पिताजी के स्वास्थ्यगत समस्या खातिर आचार्य के पद ला त्याग के अपन पिताजी के सेवा करे खातिर वापिस घर  डोंगरगढ़ आगे,ओकर बाद सन 1991में साक्षरता कार्यक्रम के तहत ब्लाक समन्वयक के कारज भी करिन,7दिसम्बर सन् 1996के वोहर राजनांदगांव निवासी वीणा मिश्रा जी के साथ जनम -जनम बर वैवाहिक बंधन मा बंधगे। ओकर बाद कुछ बछर ओमन एन जी ओ के माध्यम ले 4 ठन बाल श्रमिक स्कूल के संचालन घलो बहुत बढ़िया ढंग ले करिन ,इही दौरान ओमन राजनीतिक क्षेत्र मा अपन कदम आगू बढ़ाइन तत्कालीन ऊर्जा मंत्री श्री धनेश पाटिला जी के साथ ऊंकर घनिष्ठ संबंध रिहिस, ब्लॉक कांग्रेस कमेटी डोंगरगढ़ के पद मा भी कार्य करिन, उंकर पिताजी अउ मोर पिताजी के घनिष्ठ संबंध घलो रिहिस वो समय मोर पिताजी (श्री ध्यान दास साहू कलकसा निवासी )घलो सरपंच अउ जनपद सदस्य रहिन अउ कांग्रेस के वरिष्ठ कार्यकर्ता रहिन,मोर पिताजी अउ तत्कालीन ऊर्जा मंत्री श्री धनेश पाटिला जी संग घलो घनिष्ठ संबंध रहिस ते पाय के स्वर्गीय मिश्रा जी ल मंय ननपन के जानथंव ।इही दौरान सन 1999-2000के लगभग मिश्रा जी साहित्य के क्षेत्र मा कदम रखिन अउ डोंगरगढ़ मा संचालित साहित्य मंच मा जुड़िन जेन समय साहित्य मंच के अध्यक्ष श्रीमती शुभदा मिश्र जी रहिन संग मां वरिष्ठ पत्रकार साहित्यकार श्री हरजिंदर सिंह भाटिया 'आजाद',राज कुमारी जैन, तजिंदर सिंह भाटिया, सहायक प्राध्यापक कोशरिया जी,के संग साहित्य के क्षेत्र मा उत्कृष्ट कार्य करिन, साहित्य मंच के गोष्ठी मा छत्तीसगढ़ के वरिष्ठ साहित्यकार मन सम्मिलित होवंय, तजिंदर सिंह भाटिया जी के बताय अनुसार श्री मुकुन्द कौशल, अब्दुसलाम कौसर,रवि श्रीवास्तव, चितरंजन कर, गुरमीत सिंह'खामोश', तजिंदर सिंह भाटिया, शशिकांत द्विवेदी, विनोद शुक्ल शहडोल मध्य प्रदेश, ‌राज मोहन चौहान, कुलदीप सिंह'दीप',मोहर्रम अली, दुर्गेश पांडे, चंद्र शेखर देवांगन, प्रहलाद निषाद छोटे कुसमी, माजिद अली'काविस' जी मन इहां के गोष्ठी मा सम्मिलित होवंय, एक दू गोष्ठी मा अइसन वरिष्ठ साहित्यकार मन के आशीर्वाद महुं ला मिलिस हावै। स्थानीय स्तर मा कवि सम्मेलन अउ गोष्ठी के आयोजन बर घलो मिश्रा जी हा बड़ जोर देवय अउ सफलता घलो मिलिस, स्वर्गीय मिश्रा जी ला शासकीय नेहरू महाविद्यालय डोंगरगढ़ मा परिचर्चा /गोष्ठी मा मुख्य अतिथि के रूप मा कइ बार सम्मिलित होय के सौभाग्य घलो मिलिस। स्वर्गीय मिश्रा जी हा छत्तीसगढ़ी अउ हिंदी मा रचना करंय उनला देखते सांथ उंखर कविता के मुखड़ा - 'ना बर है ना पीपल ना अमरईया छाँव रे जाने किस गली में खोया मेरा गाँव रे' सुरता आ जाथे।

 उंखर जीवन मा सबले बड़े खुशहाली 12जून2016के आइस जेन दिन उंखर बिटिया आर्या मिश्रा'आरू'जनम होइस । साहित्य मंच के तत्वावधान मा डोंगरगढ़ के वरिष्ठ व्यक्तिय मन तिहार अउ विशेष तिथि मा अपन घर मा गोष्ठी के आयोजन करवावंय, स्वर्गीय मिश्रा जी के प्रयास ले  ही 2अगस्त 2002के डोंगरगढ़ के मारवाड़ी धर्मशाला मा एक गोष्ठी के आयोजन होय रिहिस जेमा छत्तीसगढ़ के वरिष्ठ साहित्यकार संतोष झांझी,जे.पी.साव,श्री जीवन यदु' राही'  जइसे साहित्यकार मन शामिल होय रिहिंन।

कुछ दिन बाद अर्थात सन् 2017 में श्री नंद किशोर गुप्ता अउ किशोर मिश्रा जी के प्रयास ले साहित्य प्रवाह समिति के गठन करिन जेमे अध्यक्ष गुप्ता जी, संयोजक श्री तजिंदर सिंह भाटिया अउ सचिव मिश्रा जी हा बनिस महु ला प्रचार प्रसार सचिव के जिम्मेदारी मिलिस, स्वर्गीय मिश्रा जी अउ गुप्ता जी के बीच प्रगाढ़ मित्रता रिहिस। साहित्य प्रवाह समिति के तत्वावधान में इन दूनो के प्रयास ले डोंगरगढ़ मा कइ ठन विराट कवि सम्मेलन के आयोजन घलो होइस जेमा छत्तीसगढ़ के वरिष्ठ साहित्यकार, कवयित्री विभा सिंह उत्तर प्रदेश, विरेंद्र तिवारी, शशिकांत द्विवेदी, अशोक आकाश, तजिंदर सिंह भाटिया, नंद किशोर गुप्ता, अमृत दास साहू,राज कुमारी जैन, शैल शर्मा काव्य पाठ करिन, भगवान विश्वकर्मा जयंती के अवसर मा रेलवे हा हर साल विराट कवि सम्मेलन के आयोजन करय,वहू मा मिश्रा जी हा मंच संचालन करय,जेमा छत्तीसगढ़ के जाने-माने हास्य कवि पैरोडी किंग पद्म लोचन शर्मा 'मुंहफट',हबीब खान'समर' तजिंदर सिंग भाटिया, नंद किशोर गुप्ता, निखिलेश्वर यादव गोंदिया महाराष्ट्र,गुलशन बालाघाटी, राजकुमारी जैन, मुकेश हाड़गे, अमृत दास साहू, विजय गुप्ता,शैल शर्मा जइसन कवि मन काव्य पाठ करिन।  स्वर्गीय मिश्रा जी भागवताचार्य घलो रिहिंन जेल रोड डोंगरगढ़ मा आयोजित भागवत ज्ञान यज्ञ सप्ताह मा उन कथा वाचक के रूप मा व्यास गद्दी मा विराजमान होके भागवत कथा सम्पन्न करिन उही पंडाल मा भागवत कथा के अंतिम दिन उंखर संयोजन मा एक विशाल कवि सम्मेलन के आयोजन होइस जेमा ‌छत्तीसगढ़ के ख्यातिलब्ध कवि मन काव्य पाठ करिन जेमा पद्म लोचन शर्मा 'मुंहफट' , वीरेंद्र तिवारी'वीरू', तजिंदर सिंह भाटिया,शैल शर्मा, राजकुमारी जैन, ओमप्रकाश साहू' अंकुर', अखिलेश्वर मिश्रा, महेन्द्र वैष्णव, गजेन्द्र हरिहारनो , अमृत दास साहू ,देवकी तिवारी मन आमंत्रित रिहिस। स्वर्गीय मिश्रा जी जिला के साहित्य समिति जइसे साकेत साहित्य परिषद सुरगी, शिवनाथ साहित्य धारा डोंगरगांव,पुरवाही साहित्य समिति पाटेकोहरा छुरिया, भोरमदेव साहित्य समिति कवर्धा सहित

 प्रदेश अउ जिला स्तर के काव्य गोष्ठी अउ वार्षिक/सम्मान समारोह मन मा घलो बड़ उत्साह पूर्वक सम्मिलित होवंय, स्वर्गीय मिश्रा जी के संयोजन मा साहित्य प्रवाह समिति डोंगरगढ़ के तत्वावधान में माँ बम्लेश्वरी प्राँगण डोंगरगढ़ में वर्तमान विधायक श्री भुवनेश्वर बघेल के पिता श्री शोभा राम बघेल के मुख्य आतिथ्य मा जिला स्तरीय काव्य गोष्ठी के आयोजन घलो होय रिहिस जेमा जिला के वरिष्ठ साहित्यकार लखन लाल साहू'लहर', नंद कुमार साहू'साकेत' मन के आगमन होय रिहिस , कइ ठन आयोजन मा मंय खुद उंखर संग जांवव, स्वर्गीय मिश्रा जी मोला अपन छोटे भाई जइसे मानय,मोला ये क्षेत्र मा लाय के पूरा- पूरा श्रेय मिश्रा जी ला जाथे।

स्वर्गीय मिश्रा जी निडर,बेबाक,सरल अउ सहज व्यक्तित्व के धनी रिहिन।

कोरोना काल म कृतिकला साहित्य परिषद सीपत बिलासपुर के आनलाईन काव्य गोष्ठी मा ओमन ला अध्यक्षता करे के घलो सौभाग्य प्राप्त होय रिहिस, मिश्रा जी ला डोंगरगढ़ के आसपास के ग्रामीण क्षेत्र के कवि सम्मेलन मन मा घलो आमंत्रित करय, स्वर्गीय मिश्रा जी राष्ट्रीय कवि संगम जिला इकाई राजनांदगांव के उपाध्यक्ष पद ला भी सुशोभित  करत रिहिंन, छत्तीसगढ़ी राजभाषा आयोग के कार्यक्रम मा घलो ओमन शामिल होवंय।कोरोना काल म उनला दिल के दौरा पड़िस तिही समय ले उंखर स्वास्थ्य मा खराबी आइस अउ कमजोर पड़गे अउ 1अक्टूबर2020के होत बिहनिया खबर मिलिस कि स्वर्गीय मिश्रा जी ला दिल के दौरा पड़गे अउ ओमन ये दुनिया ला छोंड़ के चलदिन, उंखर देहावसान के खबर मिलते ही डोंगरगढ़ अउ जिला के साहित्य जगत मा सन्नाटा पसरगे। स्वर्गीय मिश्रा के परिवार मा उंखर पुत्री आर्या मिश्रा अउ पत्नी श्रीमती वीणा मिश्रा जी हावय जेन सहायक शिक्षिका के पद मा कार्यरत हावंय।

लेखक- अमृत दास साहू

ग्राम- कलकसा, डोंगरगढ़

जिला राजनांदगांव(छ.ग.)

मो.नं.9399725588