चिट्ठी पाती

चिट्ठी पाती

 *// श्री गणेशाय नम: //*

======000======

      करगीरोड कोटा

   दिनांक-18.10.2022

मयारू संगी-मितान

     श्री जनक राम साहू जी

   (प्रसिद्ध लोकगायक)

रतनपुर

जिला बिलासपुर (छ.ग.)

मितान-  सीताराम,जोहार पांयलागी |

    

    *आप के संग मिल-भेंट होय अब्बड़ दिन हो गए हे , भले ही मोबाईल म गोठ-बात होतेच रहिथे | तभो ले संउहें मुलाकात के आनंद अलगेच होथे मितान |*

    *लगभग दू महीना पहिली मोर सुवारी के असामयिक इंतकाल हो गे ! तब मैं खूब व्याकुल अउ असामान्य हो गए रहेंव ! अइसे लागत रहिस -अत्तेक महान सती नारी अउ हुकूम के हाजिर जीवन जोड़ी के विछोह म कईसे जीए सकहूं ? फेर आप जम्मो हितू-पिरीतू संगी-साथी मन मोर दु:ख के बेरा म आ के  मोर दु:ख ल बांटेंव,मोला खूब ढाढस बंधायेव, मोर व्याकुल मन ल  समझायेव-बोधेव | तब मोला जीए के थोकुन थेघा मिलीस!*

    *एसों  हमर घर का दसहरा ? का देवारी ? कुछु तीज-तिहार  उछाह सब दुलुम अउ पराय हो गए हे !*

     *तभो ले दू-चार ठन दीया लक्ष्मी दाई के अगवानी म बार देबो!*

     *एसों कार्तिक महीना म घलो मेघ देवता खूब पानी बरसावत हवय, अइसे भान होवत हवय -जाना "सावन-भादो फेर लहुट के आ गे !" रोज संझा-मुंधियार के बेरा मूसलाधार बारीस हो जाथे ! अत्तेक पानी बरसा म अंगना-द्वार गली-खोर ल लीप-पोत के का करबो? सब बिरथा हो जाही !*

     

    *देवारी तिहार म राऊत मन गाय-बछरू ला सुहई बांधे आथैं अउ राऊत नाचे के बेरा अशीष देथें-" अरे हो $$$ घर लीपे चकचंदन, तुलसी चौरा लीपे, लीपे-पोते घर-अंगना देख लक्ष्मी दाई रीझे"*

      *एसों लगथे राऊत मन के  ए अशीष ह अधूरा हो जाही का ? काबर के रोज झोर -झोर के पानी बरसाई म कोनो मनसे अपन अंगना गली -खोर ल लीपेच नइ पावत हवंय!*

   *मितान एसों देवारी तिहार के दिन तुंहर घर रतनपुर आहूं, सुरहुत्ती दीया बारे के बाद तुंहरे घर गाबो -बजाबो, मोर लिखे कई ठन लोकगीत हवंय,तऊन ल धीरे-धीरे तुंहरे घर म संगीतबद्ध करबो | अच्छा-अच्छा तबला वादक,बासुरी-बेंजो वादक अउ कोकिल कंठी गायिका ल बुलाबो | ठीक हे ? तुंहर मंसूबा का हवय ? खच्चित चिट्ठी लिखिहा आंय |*

   

   *बेटी-बेटा मन ल मया-दुलार अउ आशीर्वाद देवत हौं*

     *बाकी सब गोठबात ल तुंहरे घर आ के गोठियाबो*

   

     *लक्ष्मी दाई अउ भगवान श्री हरि से कामना करत हौं-सब ल कुशल-मंगल राखैं*

     *चिट्ठी पाते ही तुहूं मन चिट्ठी लिखिहा भाई,भुलाहा झन |*

       सादर मया-दुलार

         तुंहरेच मितान

       

    *गया प्रसाद साहू*

  "रतनपुरिहा"

मुकाम व पोस्ट करगी रोड कोटा जिला बिलासपुर (छ.ग.)

पिन कोड -495113

🙏☝️✍️❓✍️💐🌹🌷❤️❤️❤️🤝👏