🌈🌈🌈🌈🌈
*शिक्षक दिवस के अवसर म बाल लघुकथा)*
*बादर*
🌈🌈🌈🌈🌈
*अगास म तउरत चारों किसिम के बादर मन के चिन्हारी बतात बाल लघु कथा...*
अगास म रंग- रंग के बादर मन दिखत रहिन ।थोर -थोर कुटी- कुटी तहदार बादर मन त, कनहुँ -कनहुँ जगह म घोड़ा पूछी जइसन दिखत घुड़पुच्छ बादर...
फिर ये सब मन के ऊपर म, पोनी के बड़े-बड़े ढेरी मन असन कपसिला बादर मन के कतेक न कतेक खेप ।नील वरन चिलकत अगास म ये सादा बादर मन के नाचा-कुदा हर देखे के लइक रहिस। ये बादर मन कभु इतरात येती जाँय, त कभु वोती । कभु हाथी -घोड़ा असन दिखें त कभु महला- सतमहला बन जाँय। वोमन तो कभु - कभु सुरुज ल घलव तोप देंय । दिन भर येमन के अइसन येती -वोती धमा- चौकड़ी चलत रहिस ।
" हरे ये झिथरा! हट जा हमर डहर ले !" कपसिला बादल ,घुड़पुच्छ बादल ल कहिस,तब बोपरा घुड़पुच्छ बादल, सिरतोन वोमन के डहर ले तिरिया गय ।
"अरे टुटहा ! तँय फेर दिखऊ देय रे !" कपसिला बादल, मन अबके पइत तहदार बादल मन ल ललकारे रहिन । तब वोहु बोपरा वो जगहा ले परा गय ।अब तो कपसिला बादल मन सुछिंधा होके, अगास म दिन भर, रंग -रंग के भेवा-स्वांग करत फिरत रहिन ।
बेरा ढरक गय...दिन हर खसल गय ,तब अगास के एकठन कोनहा ले भृंग -करिया वर्षा मेघ बादल हर उदगरिस ।
" तहुँ आ गय रे कल्लू !"कपसिला बादल हर ललकारिस ।
"अरे चुप !ये कोनहा म दिन भर संकलात, मंय हर तुमन के ये ही ...ही बक बक ल देख लेय हँव। अब खिसको इहाँ ले,नहीं त मंय तुमन ल तोपत हँव ।" वर्षा मेघ बादल हर कहिस ,अउ सिरतोन म वो सब ल तोप दिस ।
टप टप तड़ तड़ तड़... तहाँ ले फेर रद रद रद गिर के वर्षा मेघ बरसाती बादर मन धरती के पियास ल बुझाइन। नदिया -नरवा, ताल -तलैया मन ल भरत ,वोमन ल कई दिन लग गय ।
अउ जब वोमन रुकिन, तब नानकुन नोनी नैना हर अपन,खोर मुँहाटी के खँचवा म कागज के डोंगा ल चलाइस ! बबा हर तो घलव रमायन गाय के शुरू कर देय रहिस ।
... फेर ददा हर तो बड़ भिनसरहा ले उठ के नांगर अउ बईला मन ल लेके चल देय रहिस ।
*रामनाथ साहू*
***
No comments:
Post a Comment