इंसानियत गँवागे-मथुरा प्रसाद वर्मा

 इंसानियत गँवागे-मथुरा प्रसाद वर्मा

    एक दिन कक्षा आठवी के लइका मन ला विलोम शब्द सिखाय बार मोर मन म एक नवाचार करे के मन होइस। काबर कि शिक्षा म नवाचार करे के आजकल बिक्क्ट चलन हे। महुँ कुछु न कुछु करत रहिथव। एकर ले लइका मन के सङ्गे सँग महुँ ल मजा आथे। 

  त मँय विलोम शब्द माने विरुद्धर्थी शब्द के अभ्यास कराय बर एक नवाँ उदिम करेव । छोटे छोटे कागज के पर्ची चिर के ओमा एक एक शब्द लिखत गेंव। जइसे  सत्य, असत्य, दिन , रात, हैवानियत, इंसानियत, कटु, मधुर आदि आदि। लइका मन के संख्या के बरोबर पर्ची बना के सब ल मिझार देव अउ एक एक लइका ल एक एक पर्ची बाँट देव। अउ लइका मन ल अपन अपन विलोम शब्द वाले लइका सँग जोड़ी बनाये बर कहेंव। लइका मन अइसे हल्ला मचाइन की कक्षा नहीं मछरी बाजार होगे।

    थोड़कुन शोर-गुल के बाद सबला अपन अपन जोड़ीदार  मिलगे। अब लइका मन अपन जोड़ी सँग आवय अउ जोर जोर से अपन शब्द ल पढ़य। जेखर सहीं रहय सब लइका ताली बजावै।आखरी म एक झिन लइका एकेला मिलिस। ओखर जोड़ीदार नइ  मिलिस। बिचारा राहुल  मुहँ उतरे अपन पर्ची देखाइस ओमा  लिखाय रहय।

हैवानियत।

 पूरा कक्षा ल खोज डरेंन फेर ओखर जोड़ी विलोम शब्द के पर्ची नइ मिलिस। सब लइका चिल्लाये लागिस इंसानियत गँवागे, इंसानियत गँवागे। हल्ला ल सुन के हेडमास्टर साहब कक्षा म आगे।  

पूछिस त लइका मन फेर कहिन इंसानियत गँवागे। हेडमास्टर साहब मोला पूछिस इंसानियत कहाँ गवागे। मँय आज ले खोजत हौ फेर मिलत नइ हे।

इंसानियत कहाँ गँवागे।

-🙏🏻 मथुरा प्रसाद वर्मा