खतरनाक गेम
सरकार हा .... ब्लू व्हेल कस खतरनाक गेम ले होवत मौत के सेती ...... फिकर म बुड़े रहय । एक दिन ......... अइसन मौत बर जुम्मेवार जम्मो गेम उप्पर ..... प्रतिबंध लगाये के घोषणा कर दीस । हमर गांव के एक झिन , भकाड़ू नाव के लइका हा .... गेम उपर प्रतिबंध लगत जइसे सुनिस .... तहन वहू हा सरकार तिर ..... एक ठिन ओकरो ले जादा खतरनाक गेम उप्पर ..... प्रतिबंध लगाये बर ...... गोहनाये लगिस । सरकार हा बिगन ओकर कुछु बात सुने ..... साफ मना कर दिस । पढ़हे लिखे भकाड़ू हा कछेरी पहुंचगे अऊ नालिस कर दिस । कछेरी म जज पूछिस – तोर ये गेम हा कइसे खतरनाक हे .... तेमा प्रतिबंध लगवाये बर पहुंचगे हाबस । भकाड़ू किथे – हमर देस के किसान मन ..... जे गेम ला खेलत आवत हे जज साहेब ..... तेमा ...... हमरे जानती म , कतको फांसी लगाके ...... जहर खाके ..... ट्रक ट्रेक्टर के आगू चपकाके .... , अपन प्राण ला दे दिस । हमर गेम बहुतेच खतरनाक हे जज साहेब ..... , येला खेलइया मनखे हा , भूख प्यास त्याग के ... बारों महिना लगे रहिथे । कनिहा कूबर के टूटत ले खेलथे .... तभो ले करजा म बुड़े रहिथे अऊ जुच्छा कटोरा धरे ....... धान गहूं चना के दाना दाना बर तरसत मर जथे ..... । ये ब्लू व्हेल गेम ले , जादा खतरनाक हे साहेब , ब्लू व्हेल गेम तो सिर्फ , खेलइया के जान लेथे साहेब , ये खेल म तो , पूरा परिवार के परिवार खतम हो जथे , एमा जतका जलदी हो सके प्रतिबंध लगवा देतेव , हमरो घर परिवार गांव अऊ देश बांच जतिस ।
अदालत किथे – तोर हालत ला देख के लगय निही के , तूमन अइसन कन्हो गेम खेल सकत हव , जेमा जान चल देथे .... । जज साहेब हा सरकारी वकील कोती देखिस । सरकारी वकील जवाब देवत किहीस – सरकार केवल उही गेम म प्रतिबंध लगाये हाबे .... जेहा मोबाइल म खेले ले ..... प्राण लेथे । येहा गरीब मनखे आय , येकर तिर मोबाइल कतिहां ले आही तेमा .... ? भकाड़ू किथे – हमर हाथ म कुदारी .... रापा गैंती .... टुकना झउंहा अऊ नांगर के मूठ रिथे जज साहेब , हमन किसान आवन साहेब ..... हमन ला ओतका फुर्सत कहां के ...... मोबाइल के बटन चपक सकन । हमन अपन खेत म , पछीना के बोहावत ले खेलथन तब , अन्न के रन बनथे ........ । चाहे चरचर ले घाम उवे ..... चाहे हाड़ा कांपत जाड़ ...... चाहे कतको बादर पानी पदोये ....... सबला झेल के .... खेत अऊ खलिहान म माटी संग खेलके सरी दुनिया के धोंध भरइया ...... कतेक दिन जीही साहेब ........ । अइसनो म घला ..... जी जतेन जज साहेब फेर ..... हमर विकेट गिराये बर उही मन पाछू परे रहिथे ..... जेमन हमरे गेम के रन ला भुकुर भुकुर के खाथें अऊ मोबाइल म ब्लू व्हेल गेम खेलत .... हमरे संग गेम खेल देथे साहेब ...... । जे दिन हमर गेम म प्रतिबंध लग जही .... वो दिन .... न काकरो हाथ म मोबाइल रहि , न कन्हो प्रकार के अइसन मीडिया ..... तब कोन ब्लू व्हेल गेम खेलही अऊ कोनेच हा मरही ......। हमरो उप्पर कृपा करव , हमर गेम म प्रतिबंध लगवाके .... हमू मन ला बचालव ...... ।
सरकारी वकील घला तैयारी ले आय रहय । ओहा जवाब देवत किहीस – जज साहेब ..... किसान के ..... कन्हो गेम म प्रतिबंध लगाबो .... त जम्मो देस म बिपक्षी मन , फोकटे फोकट चिचियावत हावी हो जही । सरकार के थुवा थुवा हो जही । हमर देश के किसान ला दुनिया के सबले गरीब तबका मान के ..... उंकर तिर म जाके ..... बिसेस ध्यान रखइया रहनुमा आवन हमन ...... ओकर स्वतंत्रता म हमन बाधा नी परन ......। ब्लू व्हेल गेम खेलइया कतकेच मनखे हे जज साहेब ....... ओकर उप्पर प्रतिबंध लगइच दे हाबन ..... त कोनेच ला कतका फरक परिस ..... । भकाड़ू कहितेच रहय – हमर कोई रहनुमा नइये जज साहेब ..... जे हमर सबले तिर म खड़े हन किथे तिही मन ..... स्टम्पिंग करके हमन ला धरती ले आऊट कर देथे .... । चारों डहर के चांव चांव म भकाड़ू के बात दबगे .... ।
केस खारिज करत .... अदालत हा सिर्फ अतके किहीस के ...... किसान अपन गेम खेले के सेती निही ....... बलकी अपन संग ..... गेम खेलइया के सेती ...... मरत हे । दूसर संग गेम खेलइया उप्पर , हमर देश म कन्हो कानून निये , तेकर सेती , अइसन मन के उप्पर अदालत के कन्हो जोर निये .......।
हरिशंकर गजानंद देवांगन , छुरा .
No comments:
Post a Comment