कहानी-*महतारी*

 कहानी-*महतारी*

संजू अपन दाई ददा के दुलरवा लइका रिहिस।ऊमर छै सात बच्छर के लगभग रिहिस। एकलौता रिहिस ती पाय के ओकर ददा ओला घातेच मया करय।ओकर सबो साध ला पूरा करय। ज्यादा लाड़ दुलार ले लइका मन बिगड़ जाथे।अइसे सियान मन के कहिना हे।उही बात ला चरितार्थ करत संजू हा अपन घर के तीर तार मा रहिने वाले कुकुर,बिलई अउ आने जीव जंतु मन ला मारे। कुकुर मन ला लहू के आत ले ढेला पथरा मारे।कुकरी चिंगरी के पिला मन के गोड़ ला टोर देवय।फुरफुंदी ला धरे अउ ओकर पांख ला नीछ देवय।मेकरा ला अमरा जाय त ओकर गोड़ ला टोर देवय।

कुल मिलाके भारी उज्जट होगे रिहिस संजू हा।संजू के अइसन हरकत ला देख के ओकर महतारी हा ओला अबड़ डाॅंटय।ओला समझावय कि सबो ला पीरा हा जनाथे कहिके। फेर ददा के मया दुलार के सेती ओहा धियान नी देवय।

एक दिन के बात आय। बड़े जनिक कोहा धरे संजू कोनो ला मारे बर शिकार खोजत रहय।तभे ओला एक ठ पिलारी कुकुर दिखगे।जेहा अपन नान्हें नान्हें पिला मन ला दूध पिलावत रहे।आदत से लचार संजू फेंक के कोहा मा मारिस ओला।कोहा परिस त ओकर माथ फूटगे अउ वो पिलारी कुकुर कांय कांय गिंगयावत भगागे।एती संजू थपरा पीटत हाॅंसत रहय।

उही संझौती संजू के महतारी छत में सुखाय कपड़ा मन ला उतारे खातिर गे रिहिस।उंहे ले गोड़ खसलिस ताहने सिढिया ले गिरगे।पारा परोस मा देखो देखो होगे।परोसी मन तत्काल एंबुलेंस मंगवा के ओला अस्पताल लेगिन अउ संजू के पापा ला सीधा अस्पताल के पता बताइन।थोरिक देरी मा संजू के पापा हड़बडावत अस्पताल पहुंचिस। डाक्टर मन बताइन कि संजू के मां के गोड़ मा फ्रेक्चर हे।कुछ दिन अस्पताल मा रुकना पड़ही।संजू के पापा हव किहिस अउ वहू हा अस्पताल में रुकगे।रातकुन संजू घलो अपन पापा के कोरा मा बइठे अस्पताल मा ही सुतगे।सुते के बाद संजू हा सपना मा देखथे कि ओकर मां ला कोनो हा जबरदस्ती ओकर कना ले छोड़ा के लेगत हे अउ ओकर पापा के गोड़ ला दूझन मनखे मन काटत रहय।संजू चिल्ला चिल्ला के रोवत रहय।ये दृश्य ला सपना मा देखत ओहा सिरतोन मा रोवत झकनकाके उठगे।उठते साठ ओहा अपन दाई ददा ला देखिस ताहने सुसकत चुप होइस।

बिहान दिन संजू के नाना नानी मन घलो आगे।चार पांच दिन के बाद ओकर महतारी के अस्पताल ले छुट्टी घला होगे।फेर अस्पताल ले लहुटे के बाद संजू पूरा बदलगे रिहिस।अब ओहा कोनो जीव जंतु ला नी पदोय।ओकर दाई ददा संजू के बदले आदत ला देख के बिकट खुश होइन।

रीझे यादव

टेंगनाबासा