चिट्ठी महराज के नाम*

 

चिट्ठी महराज के नाम*

आदरणीय महराज जी,

 घेरी बेरी प्रणाम।

 लिखत हवँ खत आँसू ले स्याही झन समझना।

असो मोरो बिहाव के दिन आही वो मत समझना।

  इहाँ मैं बिल्कुल बने नइ अवँ।मोला मालूम हे कि आपो बने नइ होहू काबर कि ए कोरोना के सेती सबके धंधा पानी चौपट होगे हे। त आपो के पूजा पाठ,सतनारायण के कथा मन कमतियागे होही।  शादी बिहाव तको ढंग ले नइ होवत ए तेकर सेती आपो ल रोना परगे होही।

     खैर मैं ह आप ल एकर सेती चिट्ठी लिखे हँव कि असो मोर लगिन ल आपे ह धराये रहेव तेमा बिघन बाधा परगे। बने नइ देखे रहेव का? चारे दिन बाँचे रहिसे ओइसने शनी गिरहा समागे। लॉक डाउन उपर लॉक डाउन होये ल धरलिच अउ मोर शादी के दिन ह, भागे मछरी जाँघ असन होगे। फेर सुने हवँ --ददा ह आप करा गे रहिसे अउ नवा मुहरत निकलवा के आये हे। जेमा बिन गाजा बाज के मोर बिहाव ल पुतरा पुतरी कस करही। सगा सोदर घलो नइ आवय। सुने हँव- अराती बराती तको नइ राहय, फटाका तको नइ फुटय ।महराज जी अइसन म तो मोर करम फुट जही। 

   मोर ददा ह कहे रहिसे कि जोंडी गंड़वा बाजा बजवाहूँ, तेकर का होही। मोर संगवारी मन नागिन नाचे के जोखा मंढ़ाये रहिन हें काबर कि मैं उँकर बर आने टाइप के जोखा चार महीना पहिली ले करके रखे हँव ,तेकर का होही?

     अउ ओती वो नीतू के ददा माने मोर ससुर जी हा, संझा बिहनिया दूनों पाँव म खड़े ,सांस ले ले के ददा ल फोन करथे अउ कहिथे निपटा देतेन समधी, निपटा देतेन समधी। ओला काहे।कंजूस हे तइसे लागत हे।अउ मोरो ददा एकदम परबुधिया--मानगे। निपट जही त समझ आही।सुक्खा सकरायेत निकलही न तब चेत चढ़ही।

      महराज जी ,बुरा मत मानहू। आपके कोनो गलती नइये । आप तो बड़ दयालु हव त अतके बिनती हे --ददा ल आके कहि देते कि पोथी पतरा ल जल्दी जल्दी म बने नइ बाचे पाये अवँ।जेन नवाँ मुहरत बताये हवँ ओमा भारी अलहन हे। मृत्यु योग हे----आदि आदि।

      बस मोर बाप काम जोरदार बन जही। मोर शादी केंसिल हो जही। नहीं ते मोला घर ले भाग के ए शादी योग ल दुर्योग म बदले ल परही । बस अतके बिनती हे।इज्जत के सवाल हे। बँचा लौ महराज जी। 

        आप जब कइहू तब  दान दक्षिणा ल अभी जतका मिलतीच तेकर ले डबल तिबल चुपचाप आपके घर पहुँचा देहूँ।

                    प्रार्थना करइया

               आपके जजमान समारू के बेटा भावी जजमान धर्मेंदर

चोवा राम वर्मा 'बादल'

हथबंद, छत्तीसगढ़