लघुकथा) नशा

 (लघुकथा)

नशा

-------

रतिहा 8 बजे घर आयेवँ त  3 बछर के नाती हा परछी मा घोंडे मनमाड़े चिहुर पार-पार के मम्मी कार्टुन कहि-कहि के रोवत राहय अउ ओती ओकर महतारी हा अपन सास संग टीवी मा सीरियल देखे मा मगन राहय।

मैं हा थोकुन खिसियावत कहेंव-- ये का होवत हे बहू।बाबू ला चुप कराये ला छोंड़ के तैं टीवी मा मगन हच।ये हा काबर रोवत हे?

कार्टुन देखहूँ कहिथे पापा।

त लगा दे।कोंन मार नइ देखय तेमा।रोज तो देखत रहिथे।

लगाये रहेंव पापा।वोला नइ देखवँ कहिथे--वो कहिच।

त जेला देखहूँ कहिथे तेने ल लगा दे।

वो हा पहिली आठ बजे आवय पापा अब रतिहा 9 बजे आथे।

अच्छा अब लइका मन ला तको रात जगाये के उदिम होये ल धरलिच।मैं हा लम्बा साँस लेवत कहेंव-- कइसनो करके एला चुप करा।

वोहा अपन मोबाइल मा गेम लगा के बाबू ला देवत कहिच-- ये ले रे खेल।

अतका ला सुनके बाबू हा चुप होके टुंग ले उठके बइठगे।

मैं अपन माथा ला धरके बइठगेंव।

चोवा राम वर्मा 'बादल '