चक्कर म चक्कर
---------------------
ये संसार म अइसे कोनो मनखे आरूग नइ होही जेन ह कुछु न कुछु के चक्कर म नइ परे होही। सबके अपन अपन चक्कर हे। ये चक्कर मन ल देखबे -सुनबे त चक्कर आये ल धर लेथे ।
भक्त मन अपन-अपन भगवान ल खोजे अउ पाये के चक्कर म परे हें। एकर बर कतको झन उपग्रह सहीं अपन-अपन ग्रह---पंडित, मुल्ला, मौलवी, पादरी, गुरू, संत ,साधू ----बहुरूपिया मन के चक्कर लगावत हें।अउ ये कतको किरहा ग्रह मन कामिनी कंचन के चक्कर म परे हें। ये चक्कर म कई झन जेल पहुँच के कानून के चक्कर लगावत हें। बस चक्कर उपर चक्कर हे।ये संसार म जानवर,चिरई-चिरगुन , नान नान छै-सात साल के लइका ,जवान अउ निच्चट डोकरा-डोकरी तको मन प्यार के चक्कर म परे हें।
रकतबीज असन बाढ़त प्रजाति जेन नेता कहे जाथें। उँकरो चक्कर मरई कमती नइये। रात दिन कुर्सी के चक्कर हे। कभू टिकट पाये बर चक्कर हे, त कभू एक दल ल किरनी असन चूहक के दूसर दल म जाये के चक्कर हे। कुर्सी मिलगे त कमीशन के चक्कर हे, भाई भतीजावाद जातिवाद, वोट बैंक के चक्कर हे। बाँचे खोंचे म चिखला फेंके के मुकाबला म भाग लेके एक दूसर ल होले पढ़के निपटाये के चक्कर हे।
एक ठन अउ बिकराल चक्कर चलत हावय। चोर मन चोर मन ल पकड़े के चक्कर म , चोरे मन ले साँठ-गाँठ करे के चक्कर म परे हावयँ। कुछ चोर मन मत पकड़ावन सोच के पाला बदले के चक्कर म हें।
ए.सी. रूम में बइठे बड़े-बड़े दिमाग मन आलतू फालतू योजना बनाके पांँचो अँगरी ल घी म चिभोरे ऊपर ले खाल्हे तक खुरचन पानी रूपी प्रसाद के व्यवस्था करके खजाना ल दियाँर किरा कस सफाचट करे के चक्कर म परे हें। ये दिमाग मन के नाना विभाग जिहाँ जोंक मन रहिथें ।वो मन तैं पलोवत जा ,मैं सोंखत हँव कहिके गीत गावत मुफ्तखोरी के चक्कर म परे हें।
अनुभवी मन बताथें के थाना, कचहरी अउ अस्पताल के चक्कर सबले भारी चक्कर होथे। उहाँ सेवा के आड़ म मेवा झड़के के चक्कर म बड़े-बड़े बन बिलबा अउ बिलई मन सीका टूटे के चक्कर म ताकत रहिथें।
एक झन बतावत रहिसे--वो ह डंडाधर टोपीवाले के चक्कर म परे हे। वो डंडा धरे बड़े-बड़े मेंछा वाले ह आवेदक अउ अनावेदक दूनों ल टोपी पहिना के गाय असन दूहे के चक्कर म हे। एक झन ह तो इहाँ तक काहत रहिसे वोकर खाकी के कुरता ल पाकिट मार अउ चोर मन खरीद के दे हें।
एक झन कचहरी के चक्कर के मारे संदउवा काड़ी कस दुब्बर पातर होये ह बतावत रहिसे - करिया कोट वाले मन के चक्कर म परके केस लड़त लड़त वोकर ददा के ददा के ददा सिरागें फेर फैसला होबेच नइ करिस। बस तारीख के ऊपर तारीख के चक्कर हे।
एक झन कका ह अपन भतीजा ल समझावत रहिसे के सरकारी अस्पताल के चक्कर म कभू झन परबे काबर के उहाँ बड़े बीमारी ल कोन काहय दाँत पीरा,खजरी खसू जइसे छोटे-छोटे बीमारी के इलाज के चक्कर म गये मनखे के मुर्दा लहुटे के पूरा संभावना रहिथे।उहाँ इलाज करइया भले नइ मिलही फेर माला कस ओरमाये सादा-सादा पहिने यमराज अउ वोकर दूत मन चक्कर लगावत रहिथें। वो कहिस- बने बताये कका फेर वो दिन मंगलू ह चार मंजिल के बड़े जान प्राइवेट अस्पताल म माथा पीरा के इलाज करवाये बर गे रहिसे। उहाँ तीन दिन म तीन लाख के बील ल देख के वोला चक्कर आगे । चक्कर खाके पट ले गिरिस तहाँ ले राम नाम सत्य होगे।वोकर घर वाले मन लाश ल पाये बर चक्कर लगावत हें।बिना नोट के उहाँ गोठ करे बर कोनो तइयार नइये। मुर्दा के मुँह तको ल नइ देखन देवत यें।
सबो जगा एके हाल हे।जेती देखबे तेती, जेन ल देखबे तेन ल बस चक्कर ऊप्पर चक्कर हे।कुछ झन चक्कर म डारे के चक्कर म हें त कुछ मन चक्कर म चिथियायें हें।
गुरु घंटाल मन हड़ताल बाढ़ते राहय के चक्कर म हें जेकर ले गप्पशाला जिहाँ पाठशाला के बोर्ड टँगाये हे, जायेच ल मत परय। घरेच म बइठे-बइठे बरवाही मिलते राहय। पता हे के वोट के चक्कर म घनचक्कर मन आज नहीं ते काली सोजबाय तनखा ल तो देबे करहीं।
चुनाव के आरो पाके सबो कर्मचारी मन मौका के फायदा उठाये के चक्कर म हावैं।सरकारी खजाना के छाती म होरा भूँजे के चक्कर म सब राजधानी कोती दउँड़त हें।
कोनो सब ले जादा चक्कर म परे हे त वो ह भुँइयाँ के भगवान हर आय। एकर चक्कर सिराबे नइ करय। बिजहा,खातू माटी के चक्कर, सोसाइटी म धान बेंचे के चक्कर, बैंक के चक्कर, नक्शा खसरा बनवइया के चक्कर,करजा लिखइया के चक्कर, नहर पानी के चक्कर चक्कर --- चक्कर ---चक्कर--- चक्कर --चक्कर। रात दिन चक्कर।
सिरतो म ये चक्कर के बीमारी सिरा जतिच त सबके जिनगी कतका बढ़िया हो जतिस।
चोवा राम 'बादल'
हथबंद, छत्तीसगढ़
No comments:
Post a Comment