आलेख - पोरा तिहार*‌

*आलेख - पोरा तिहार*‌

हमारे भारत देश कृषि प्रधान देश हरय। पहली जमाना में खेती-किसानी के काम पशु मन के द्वारा करे जावत रिहीस। आज भी गाँव में खेती-किसानी के काम बइला-भँइसा के द्वारा करे जाथे। फेर आधुनिक युग मा कृषि काम ट्रैक्टर, हार्वेस्टर, थ्रेसर, आदि मशीन से होवत हे, तेखर सेती अब खेती-किसानी में पशु मन के उपयोग कम होगे हे।  

वइसे तो हमर छत्तीसगढ़ में तीज-तिहार के विशेष महत्व हे। जेमा पोरा तिहार बहुत ही खास तिहार आय।

*पोरा तिहार* जेला हिंदी में *पोला पर्व* के रूप में हमर छत्तीसगढ़ के अलावा मध्यप्रदेश अउ महाराष्ट्र में बड़े धूमधाम से मनाये जाथे। मान्यता हे कि द्वापर युग में कृष्ण भगवान जब लइका रूप में रिहीस तब कंस ह कृष्ण भगवान ला मारे बर कई झन राक्षस मन ला भेजिस जेमा पोलासुर नाम के राक्षस भी रिहीस हे। भगवान कृष्ण हर  पोलासुर ला मारके  बाल रूप में अपन लीला देखाइस। जे दिन पोलासुर के वध होईस वो दिन भादो के महीना अमावस्या के दिन रिहीस हे,  उही दिन ले पोला पर्व मनाय जाथे।

हमर में छत्तीसगढ़ में *पोरा तिहार* के विशेष महत्व हे। ये दिन विशेष रूप से बइला के पूजा करे के रिवाज हे। ये दिन बइला मन ला सजाय जाथे अउ पूजा करे जाथे। गाँव मा खेती-किसानी में जोताई-बोवाँई के काम होय के बाद पोरा तिहार के दिन किसान मन अपन बइला मन के पूजा करथे। येखर अलावा माटी के बइला के भी पूजा करे जाथे, संगे संग माटी के जाता-पोरा के पूजा भी होथे। मान्यता हे कि पहली जमाना में गहूं, चना, राहेर, तिवरा, कोदो अनाज ला जांता मा दरके खाना बनावै। आज के जमाना में सब चीज रेडिमेंट मिल जाथे। 

*पोरा तिहार* मा रोटी पीठा के विशेष महत्व हे। ये दिन सबों घर मा ठेठरी-खुरमी, बरा, सोंहारी, अइरसा, चौसेला, भजिया, गुजिया, चीला आदि  प्रकार के रोटी बनाय जाथे, जेला पूजा के बाद बइला अउ जाता पोरा मा चढ़ाथे। पूजा के बाद बहिनी मन पोरा पटके बर गाँव के चऊँक मा जाथे। पोरा तिहार के दिन नान्हे-नान्हे लइका मन बर माटी के बइला मा चक्का लगाके ओमा बाँस के कमचील लगाके बने सुग्घर तइयार करें जाथे। फेर लइका मन मगन होके गली मा अब्बड़ चलाथें। अउ नोनी मन घर मा जाता पोरा मा सगा पहुना खेलथें।

हमर छत्तीसगढ़ मा कई जगह मे बइला दौड़ प्रतियोगिता के आयोजन भी होथे। जेमा आस-पास के क्षेत्र के किसान मन अपन बइला मन ला सुग्घर सजाके प्रतियोगिता मा भाग ले बर आथे। अउ ये प्रतियोगिता ला देखेबर भी आस-पास के मनखे मन सकलाथें। 

पोरा तिहार के एक अलग मान्यता हे कि *पोरा* माने "पोटरियाना" मतलब धान मा दूध आना। जब खेत के धान के फसल हर गर्भ धारण करथे, या दूध भराथे तेला पोकरी भरना, या पोटरियाना भी कहिथे। तेखर सेती हमर छत्तीसगढ़ मा *पोरा तिहार* मनाय जाथे।

आप सब ला पोला तिहार के गाड़ा गाड़ा बधाई अउ शुभकामना।

रचनाकार 

राजकुमार निषाद *राज*

बिरोदा, धमधा, जिला-दुर्ग

7898837338