*तीजा तिहार (हरितालिका तीज)*
*तीजा तिहार* छत्तीसगढ़ के प्रमुख पारंपरिक तिहार आय। तेखर सेती हमर छत्तीसगढ़ मा तीजा तिहार के विशेष महत्व हे। पोरा तिहार के बाद भादो महीना मा शुक्ल पक्ष के तीसरइया दिन तीजा तिहार मनाय जाथे।
तीजा तिहार ला *हरितालिका तीज* के नाम से भी जाने जाथे।
पौराणिक कथा के अनुसार सतयुग में माता पार्वती हर भगवान शंकर ला अपन पति रूप मा पाय बर बिना अन्न जल खाए पीए घोर तपस्या करिस। तब जाके भगवान शंकर हा प्रशन्न होके भादो के महिना हरियाली तीज के दिन माता पार्वती ला पत्नी के रूप में स्वीकार करिस। उसी दिन ले तीजा तिहार मनाय जाथे ।
*तीजा तिहार* के अगोरा हमर छत्तीसगढ़ के तीजहारीन मन ला साल भर रहिथें, काबर कि तीजा उपास ला मइके मा रहिके करे के रिवाज हे। मान्यता हे कि माता पार्वती हर अपन मइके मा रहिके भगवान शंकर ला पाय बर उपास रिहीस हे।
*तीजा तिहार* जब आने वाला रहिथे तब तीजहारीन मन बहुत खुश रहिथें। काबर कि हमर छत्तीसगढ़ मा परंपरा हे कि अपन बहिनी, बेटी मन ला ओकर ससुराल मा भाई मन, पिता जी मन तीजा लाय बर जाथें।
तीजा उपवास के पहली दिन सबो घर घर में करेला के साग बनथे, जेला *करू भात* कहे जाथे। करू भात ला खा के तीजहारीन मन उपास रहिथे। जीजा के दिन बिना पानी पिए निर्जला उपवास रहिथें।
तीजा के दिन बड़े बिहिनिया ले तीजहारीन मन नहाखोर के सुग्घर तइयार होके माता पार्वती अउ भगवान शंकर की पूजा पाठ विधि विधान ले करथें । वइसे तो तीजा उपास व्रत के बहुत नियम होथे। तीजहारीन मन अपन श्रद्धा भाव ले ये विधि ला करथें।माटी के शिवलिंग बनाके पूजा करे जाथे। दिन भर तीजहारीन मन भक्ति मन लगे रहिथे अउ अपन पति के लंबा उमर के कामना करथें। तीजा तिहार पति-पत्नी के अटूट मया ला दर्शाथे।
पहिली तीजहारीन मन तीजा के दिन भर के पेड़ मा झुलना बाँध के एक जगह सकलाके झुलना झुलय, खो-खो खेलय। फेर अभी के जमाना मां ये सब नंदावत जावत हे।
वइसे तो हमर छत्तीसगढ़ के हर तिहार मा रोटी पीठा बनाए जाथे। जब बात तीजा तिहार के आथे ता तीजा में सात प्रकार के रोटी बनाय जाथे। जेमा ठेठरी, खुरमी, अइरसा, सोंहारी, बरा भजिया, नमकीन, येखर अलावा तीजहारीन मन अपन पसंद के अलग अलग प्रकार के रोटी भी बनाथे। ये रोटी मन ला पूजा के बाद प्रसाद के रूप मा चढ़ाथे। अउ तीजा के बिहान दिन मतलब चतुर्थी के फरहार करथें।
रचनाकार
राजकुमार निषाद राज
बिरोदा धमधा जिला-दुर्ग
7898837338
No comments:
Post a Comment