विश्व सायकल दिवस -3 जून
आज विश्व साइकिल दिवस हवय मनखे मन ला साइकिल चलायबर जागरुक करे खातिर साइकिल रैली निकाले के कार्यक्रम बीते संझा बनिस ओला पूरा करेबर बेर उवे के पहिली हाईस्कूल ठऊर मा अमर गेन। मँय अपन फटफटी मा साइकिल रैली मा संघरे बर गयेव।अइसने हमर सबो संगवारी मन अपन अपन फटफटी मा आइन।आठ दस झन पढ़ईया लइका मन अपन अपन साइकिल मा आइन। आकब तीस झन सकलाय रहेन। फेर साइकिल दसेझन कर रहिस।रैली निकले के बेरा होवत रहय फेर माई पहुना अउ पगरइती करइया के दउहा नइ रहय। एती बेरा होवत देख के सबो असकटियात रहिन। तभेच दू ठन कार धड़धड़ावत आइस। ओमा बइठ के माई पहुना शहर के महापौर अउ उंखर संग छै सात झन अउ पहुना आइन। माई पहुना आवत देख आयोजन के बेवस्था देखइया हा उँखर तीर दँउड़त गइस अउ धीरलगहा पछिस। मेडम साइकिल वाला गाड़ी अभी ले नइ आय हवय। माई पहुना तुरते मोबाइल निकालिस, नंबर लगाइस अउ धमकावत कहिन.. काली संझा के बोले रहेंव ता अभी तक साइकिल कइसे नइ भेजवाय... उँखर गोठबात चलतेच रहिस अउ एक ठन पिकअप जेमा साइकिल भराय रहिस वोहा आइस। ड्राइवर हा साइकिल ला उतार लेवल कहिस। इस्कूल के दूनो चपरासी मन अउ उहाँ खड़े सबो रैली मा संघरइया संगवारी मन उतारे मा सहयोग करिन। अब सबो झन अपन अपन भर साइकिल पोगरा के धर के खड़ा होगे। सबो झन के संघरा फोटू खिचवाय बर माई पहुना हा बेवस्था देखइया ला बोलिस। माई पहुना संग सबो पहुना आघू मा साइकिल धर के खड़ा होइन उँखर पाछू मा सबो हमर संगवारी अउ लइका मन अपन अपन साइकिल धर के खड़ा होइन। फोटू ला खीचे बर मय आघू आयेंव। अब माई पहुना महापौर मेडम ला झंडी देखाय बर कहे गीस ता ओहा साइकिल चलाहूं कहिदीस। पगरइती करइया हा झंडी देखाइस अउ रैली ला बिदा करिन। मँय फोटू खिचइया बनगेंव।एक झन संगवारी ला फटफटी चलायबर कहेंव अउ फटफटी के पाछू मा उल्टा बइठ के रैली के आगू आगू फोटू खींचत विडियो बनावत इस्कूल ठउर ले नगर के पुलिस थाना, स्वर्ण जयंती चौक, नगर निगम कार्यालय, बजरंग चौक, शिव चौक, सदर रोड, सरकारी अस्पताल, वन विभाग कार्यालय होवत फेर इस्कूल ठउर मा अमरगे। सबो पहुना मन साइकिल चलाय के फायदा ला सरेखत बड़का बड़का भाषण कार मा बइठइया मन के हाल, पेट्रोल डीजल के महँगई, प्रदूषण ले बचाय बर देइन।पाछू अंगूर केरा सेवफल बिस्कूट कलाकंद के कलेवा करिन अउ एकक गिलास जूस पी के विश्व साइकिल दिवस के जागरूकता रैली के समापन करिन। सबो साइकिल पिकअप मा फेर लदाके जिहां ले आय रहिस उहाँ चल दिस। माई पहुना संग कार मा आय सबो पहुना मन बिदा होइन। जौन संगवारी मन फटफटी मा आय रहिन उन ला पेट्रोल बर पचास पचास के टोकन देके बिदा करे गीस। दू घंटा मा विश्व साइकिल दिवस के तिहार मनागे। बेवस्था देखइया अउ मय आखिर मा अखबार मा खभर छपवाय बर लिखा पढ़ी करके पत्रकार मन तीर समाचार अउ फोटू भेज के अपन अपन फटफटी चालू करेन अउ अपन अपन घर आगेन।
हीरालाल गुरुजी "समय"
छुरा, जिला-गरियाबंद
No comments:
Post a Comment