छत्तीसगढ़ के बॉलीवुड हस्ती-जीतेन्द्र वर्मा"खैरझिटिया"
1 नवम्बर 2000 मा नवनिर्मित छत्तीसगढ़ राज, आज वैश्विक पटल मा परचम लहरावत हे। कोनो अइसे क्षेत्र नइहे जेमा छत्तीसगढ़ पाछू हे। प्रकृति के देय नदिया,नाला, झरना,पर्वत, पठार, जंगल झाड़ी खनिज सम्पदा आकर्षण के केंद्र हे, ता कला,संस्कृति अउ संस्कार हमर पहिचान। आदिकाल ले आज तक छत्तीसगढ़ मा कतको महान विभूति मन जनम धरिन, अउ छत्तीसगढ़ के नाम ला चारों खूँट बगराइन। फ़िल्म, अउ गीत संगीत के क्षेत्र मा बॉलीवुड पूरा भारत अउ आन देश के शान हे। जिहाँ भारत भर के उत्कृष्ट कलाकार, गीतकार, संगीतकार, निर्माता, निर्देशक, गायक, गायिका अउ नर्तक मन अपन प्रतिभा के लोहा मनवाथें, ता अइसन काम मा हमर छत्तीसगढ़ कइसे पाछू रही सकथे? कम संसाधन अउ प्रचार प्रसार के सीमित साधन होय के बावजूद छत्तीसगढ़ के कतको जुन्ना कलाकार मन अपन कला के दम मा बॉलीवुड तक के सफर तय करिन, अउ कतको फिलिम मा अपन अदाकारी अउ अन्य प्रतिभा के प्रदर्शन करिन। आज भले पइसा पहुँच अउ सोसल मीडिया के जमाना मा बॉलीवुड मा कखरो भी सहज एंट्री हो जावत हे, फेर जुन्ना समय के अभिनेता मनके योगदान ला कभू नइ भुलाये जा सके। बॉलीवुड अउ छत्तीसगढ़ के बड़ जुन्ना अउ गहरा रिस्ता नता हे। बॉलीवुड के कतको नामी गायक, गायिका मन छत्तीसगढ़ी गीत गाये हे, ता छत्तीसगढ़ के कतको कलाकार मन बॉलीवुड मा अपन कला के प्रदर्शन करे हें। ता आवव आज जानथन वो कलाकार, गीतकार, गायक, निर्माता, निर्देशक मन ला जेन मन अपन प्रतिभा के दम मा आजो बॉलीवुड मा राज करथें----
*किशोर साहू जी*
छत्तीसगढ़ के राजनांदगांव जिला के बेटा अभिनेता किशोर साहू(1915-1980), बॉलीवुड मा कोनो परिचय के मोहताज नइहे। किशोर साहू जी एक महान अभिनेता के संगे संग निर्माता, निर्देशक अउ पटकथा लेखक घलो रिहिन। उन मन एक कोरी ले घलो जादा फिलिम मा एक्टिंग करिन अउ वइसने निर्माता निर्देशन। दिलीप कुमार, मनोज कुमार, अशोक कुमार,राजकुमार जइसन कतको बड़े बड़े अभिनेता मन श्री साहू जी के निर्देशन मा काम करिन।
*बतौर अभिनेता किशोर साहू जी के कुछ नामी फिल्म*- अउ फ़िल्म मा उंखर किरदार---
वकील बाबू (1982) …. न्यायमूर्ति राजवंश
हरे राम हरे कृष्णा (1971) …. श्री जयस्वाल
गैम्बलर (1971) …. लोक अभियोजक
पुष्पांजली (1970) …. जमाल पाशा
गाइड (1965) …. मार्को
पूनम की रावत (1965)
काला बाजार (1960)
शिमला में प्यार (1960) …. जनरल राजपाल सिंह (सोनिया के चाचा)
काला पानी (1958) …. राय बहादुर जसवंत राय
हैमलेट (1954)
मयूरपंख (1954) …. रणजीत सिंह
हमारी दुनिया (1952)
सपना (1952)
ज़लज़ाला (1952)
बुजदील (1951)
काली घाटा (1951)
नमूना (1949)
रिमझिम (1949)
सावन आया रे (1949) …. आनंद
सिंदूर (1947)
वीर कुणाल (1945)
इंसान (1944)
शरारत (1943)
राजा (1943)
कुंवारा बाप (1942)
बहुरानी (1940)
जीवन प्रभात (1937) …. रामू
*किशोर साहू जी के निर्देशन मा बने कुछ फिल्म के नाम*-
धुंए की लकीर (1974)
पुष्पांजली (1970)
हरे कांच की चूड़ियाँ (1967)
पूनम की रात (1965)
घर बसा के देखो (1963)
गृहस्ती (1963)
दिल अपना और प्रीत पराई (1960)
बडे सरकार (1957)
किस्मत का खेल (1956)
हैमलेट (1954)
मयूरपंख (1954)
काली घाटा (1951)
सावन आया रे (1949)
नदिया के पार (1948)
साजन (1947)
सिंदूर (1947)
वीर कुणाल (1945)
शरारत (1944)
राजा (1943)
कुंवारा बाप (1942)
*किशोर साहू जी के लिखे कुछ फ़िल्म के नाम*-
तीन बहुरानिया (1968) (लेखक)
औरत (1967) (संवाद)
हरे कांच की चूड़ियाँ (1967) (संवाद) (पटकथा) (कहानी)
दिल अपना और प्रीत पराई (1960) (लेखक)
मयूरपंख (1954) (पटकथा)
*बतौर निर्माता किशोर साहू जी के कुछ फिल्म*-
पुष्पांजली (1970) (निर्माता)
हरे कांच की चूड़ियाँ (1967) (निर्माता)
पूनम की रात (1965)
मयूरपंख (1954) (निर्माता)
काली घाटा (1951)
सावन आया रे (1949)
बहुरानी (1940)
*ये सब ला देखत जम्मो छत्तीगढ़िया के छाती फूल जथे, जे अइसन महान हस्ती हमर राज मा अवतरिन, किशोर साहू जी मन बम्बई मा 1937 ले अपन जीवन के आखिर समय 1980 तक बॉलीवुड के सेवा करिन।* श्री साहू जी मन कई फिलिम( जइसे-नदिया के पार 1948) मा छत्तीसगढ़ी बोली भाषा, संस्कार संस्कृति अउ वेशभूषा ला दर्शक बीच परोसिन। श्री साहू जी कतको अपन कला के दम मा कतको अवार्ड पाइन,तभो छत्तीसगढ़ मा किशोर साहू जी के नाम जइसे चाही, तइसे नइ फइले हे, हर छत्तीगढ़िया ला उन मन ला जानना अउ उंखर गुण ज्ञान ले सीख लेना चाही। आज एक फिलिम मा छोटे से रोल करके कतको मन सोसल मीडिया मा छा जथे, फेर साहू जी के योगदान बॉलीवुड मा कतका हे, दिखते हे। अइसन हस्ती ला शत शत नमन।
*सुलक्षणा पंडित*
सन1954 मा छत्तीसगढ़ के रायगढ़ जिला मा जनम धरइया सुलक्षणा पंडित जी बॉलीवुड जगत के एक जाने माने
हस्ती आय। सुलक्षणा जी के रूप के सबे दीवाना रिहिन, संगे संग उंखर आवाज के जादू घलो सर चढ़के बोले। कहे के मतलब सुलक्षणा जी बॉलीवुड फिल्म अभिनेत्री अउ गायिका दूनो रिहिन। सुलक्षणा जी मन रायगढ़ घराना ला पूरा भारत मा अपन गीत संगीत के माध्यम ले प्रसिद्ध करिन।
*सुलक्षणा जी के गाये कुछ सुपरहिट गीत*
1971(दूर का राही)"बेकरार-ए-दिल तू गाए जा"
1975(चलते चलते)"सपनों का रजा कोई"
उलझन"आज प्यारे प्यारे से लगते"
संकल्प"तू ही सागर है तू ही किनारा"
1976(संकोच)"बांधी रे काहे प्रीत"
1977(अपनापन)"सोमवार को हम मिले" 1979(खानदान)"ये मुलाक़ात एक बहाना है"
गृह प्रवेश"बोलिए सुरीली बोलियाँ"
1980(थोडीसी बेवफाई)"मौसम मौसम लवली मौसम"
स्पर्श"खाली प्याला छलका"
1981(आहिस्ता आहिस्ता)"माना तेरी नज़र"
साजन की सहेली"जिसके लिए सबको छोड़ा"
*अभिनेत्री के रूप मा सुलक्षणा पंडित बड़ अकन फिलिम मा काम करिन, झलकी के रूप मा कुछ फिल्म*
1981-चेहरे पे चेहरा,1979-खानदान,1975-सलाखे,
1975- उलझन(पहली फिलिम),दो वक्त की रोटी, मददगार,काला सूरज, क्षमा, संकोच,गरम खून,हीरा परी, हेराफेरी,बण्डलबाज, शंकर शम्भू,धर्मकांटा, अमर शक्ति, पंछी,गोरा आदि।
*जीतेंन्द्र,धर्मेंद्र,राज बब्बर, विनोद खन्ना,ऋषि कपूर,संजीव कुमार, शशि कपूर, शत्रुघ्न सिन्हा,राजेश खन्ना जइसन कतको सुपर हीरो मन संग सुलक्षणा जी मन काम करिन, अउ कतको पुरस्कार पाइन, गायन अउ अदाकारी दूनो मा। बॉलीवुड मा सुलक्षणा जी मन 9 साल के उम्मर मा गीत गावत रिहिन अउ लता मंगेसर, उषा मंगेसकर जइसन सुर के देवी मन के आशीष पावत रिहिन।
सुलक्षणा जी के पूरा परिवार विलक्षण प्रतिभा के धनी रिहिस। *पिताजी बड़का नामी शास्त्रीय गायक रिहिस, खिलाड़ी, खामोसी, यस बोस जइसे कतको सुपर डुपर हीट फिलिम मा संगीत देवइता भाई जतिन पण्डित अउ ललित पण्डित(संगीतकार जोड़ी-जतिन लिलित) कोनो परिचय के मोहताज नइहे, बहिनी विजयता पंडित के अदाकारी के घलो पूरा भारत कायल हे।* सुनब मा आथे कि,जम्मो भाई बहिनी मा सुलक्षणा जी के जनम अउ बचपन के कुछ दिन रायगढ़ मा बीते हे, बाकी भाई बहिनी मन के कोई जानकारी अउ सम्बन्ध छत्तीसगढ़ ले जुड़े नइ दिखे। सुलक्षणा जी खुद अउ अपन भाई बहिनी संग 70,80, अउ 90 के दशक के जानेमाने बॉलीवुड हस्ती रिहिन। कुमार गौरव के संग फिलिम लव स्टोरी 1981मा विजयता जी मन बॉलीवुड मा पांव रखिन अउ जलजला, मोहब्बत,मिशाल,साजिस,जो जीता वही सिकन्दर जइसन 50 के घलो जादा फिलिम मा काम करिन अउ कुछ फिलिम मा गीत घलो गाइन। 1976 ले 1988 तक के सुलक्षणा जी के योगदान ला बॉलीवुड कभू नइ भुला सके।
*देवेंद्र खंडेलवाल*
बॉलीवुड मा देवेंद्र खण्डेलवाल के अहम योगदान हे। छत्तीसगढ़ के दुर्ग जिला मा प्रारम्भिक पढाई लिखाई करे ये हस्ती अपन अभिनय के लोहा पूरा भारत मा मनवाइन। खण्डेलवाल जी अभिनेता के संगे संग सहअभिनेता, निर्माता अउ निर्देशक के रूप मा 1973 ले 1991 तक बॉलीवुड मा जमे रिहिन। करिश्मा किस्मत का(1990),कमली की मौत(1989), कमांडो(1988), जीना यहाँ(1979),खट्ठा मीठा(1978),
साल सोलवां(1977), यहाँ सब कुशल है,
तुम्हारा कल्लू(1975),आविष्कारी(1974), मौत की सजा,गृह प्रवेश जइसन कतको सुपरहिट फिलिम मा देवेंद्र खण्डेलवाल जी मन अभिनय करत दिखिन। 100 ले घलो जादा हमर महान हस्ती मन ऊपर खण्डेलवाल जी मन टेली फिलिम बनाइन।
*भैया लाल हेड़ाऊ*
छत्तीसगढ़ के हेमंत कुमार के नाम ले मशहूर, माटी पूत भैया लाल हेड़ाऊ जी जम्मो छत्तीगढ़िया मनके शान आय। जेन बॉलीवुड ले जादा छत्तीसगढ महतारी के सेवा करिन। राजनांदगाँव के नामी हस्ती हेड़ाऊ जी के योगदान ला बॉलीवुड घलो नइ भुला सके। 1981 मा सत्यजीत राय के निर्देशन मा बने टेलीफिल्म सदगति मा ओमपुरी,स्मिता पाटिल जइसे हस्ती मन संग अभिनय के संग भैया लाल हेड़ाऊ जी बॉलीवुड मा पांव रखिन अउ कतको फिलिम मा काम करिन, जेमा हल अउ बन्दूक, धर्मचक्र जइसे फिलिम प्रमुख हे। अपन भारी आवाज मा अमरीश पुरी अउ अमिताभ बच्चन के हूबहू आवाज निकाले बर घलो हेड़ाउ जी बड़ प्रसिद्ध रिहिन।
*नत्थू दादा*-
राजनांदगांव के छोटे कद काठी के कलाकार नत्थूराम रामटेके(1950-2019), एक जमाना मा बॉलीवुड मा खूब धूम मचावत रिहिस। बॉलीवुड के 150 ले घलो जादा फिलिम मा बतौर हास्य कलाकार के रूप मा नत्थू जी मन अभिनय करिन, अउ खूब वाहवाही लुटिन। अभिनेता अउ कुश्ती खिलाड़ी दारासिंह के संग मुम्बई जाके, नत्थू दादा जी मन, मेरा नाम जोकर(1970) फिलिम ले अपन कैरियर के शुरुवात करिन अउ धर्मात्मा, कस्मेवादे,शक्ति, रामबलराम,उड़न छू, खोटे सिक्के, टैक्सी चोर,अंजाने जइसन कतको सुपरहिट फिलिम मा काम करिन। राजकपूर, दारासिंह, अमिताभ बच्चन, धर्मेंद्र, राजेन्द्र कुमार, राजकुमार जइसन कतको अभिनेता मन नत्थू जी के दीवाना रिहिन। आज के जमाना मा मनखे एक फिलिम मा दिख के सुपरस्टार बन जथे, फेर नत्थू दादा 150 ले घलो जादा फिलिम मा अभिनय करिन तभो कुछुच नइ पाइस, अपन जीवन के आखरी समय मा पाई पाई बर तरसत परलोक सिधार गिन।
*हबीब तनवीर*
थियेटर के दुनिया के बादशाह हबीब तनवीर(1923-2009) जी कोनो परिचय के मोहताज नइहे। थियेटर के संगे संग बॉलीवुड घलो तनवीर जी के योगदान ला नइ भुला सके। छत्तीसगढ़ के रायपुर जिला के ये महान हस्ती अपन संग अउ कतको छत्तीगढ़िया मन ला मुम्बई नगरी मा अभिनय करवाइन। तनवीर जी निर्माता, निर्देशक अउ लेखक के संगे संग कुशल अभिनेता घलो रिहिन। बॉलीवुड के कतको फिलिम मा बतौर निर्माता, निर्देशक,लेखक अउ आभिनेता के रूप हबीब तनवीर जी मन काम करिन,जेमा राही(1952), पुटपाथ(1953),चरनदास चोर(1975) गीत पटकथा लेखन, स्टे आन आन(1980), गाँधी(1882) भारतीय बैरिस्टर, कुमाऊँ के आदमखोर(1986), मंजिल तो नही(1987)अख्तर बेगी,हीरो हीरालाल(1988), प्रहार(1991)डिसूजा के पिता, द वॉर्निंग सीजन(1993),सरदार(1993),मंगलपांडे(2005)बहादुर शाह जाफरी, ब्लैक एंड व्हाइट(2908) काजी साहब, आदि फिलिम प्रमुख हे। एखर आलावा हबीब तनवीर जी मन कई नाटक अउ टेलीफिलिम घलो बनाइन। छग मा रगमंच ला नवा पहचान देवाइया तनवीर जी संग कतको महान विभूति मन जुड़े रिहिन,जेमा मिर्जा मसूद,राजकमल नायक,आनंद चौबे,अशोक मिश्रा, पुष्पा गुप्ता, परवीन खान,दीपक तिवारी, शिव कुमार दीपक आदि मन बॉलीवुड के छोटे परदा मा घलो अभिनय करिन।
*कल्याणसेन(दादा)*
छालीवुड संग बॉलीवुड मा घलो संगीत अउ आवाज देवइया कल्याण सेन जी अपन जिनगी के 40 बछर मुम्बई ला दिस। सेन जी के निर्देशन मा कतको हिट गाना बॉलीवुड के शान बनिस। सेन जी रवींद्र जैन संग,रवींद्र संगीत मा संगीत निर्देशन अउ गायकी करत कतको फिलिम अउ एल्बम बनाइन। कल्याण सेन जी के बॉलीवुड के संगे संग अपन संगीत निर्देशन में लता मंगेशकर जी संग उषा मंगेशकर, अनुप जलोटा जइसे कतको सुर के धनी गायक गायिका मन ला छत्तीसगढ़ी गाना घलो गवाये रिहिस। कल्याण सेन जी शास्त्रीय अउ सुगम संगीत के उस्ताद रिहिस। "दिल मे तुझे बसाके" जइसे सुपर डुपर गीत के संगीत रवींद्र जैन जी के साथ मिलके तैयार करिन। एखर आलावा अउ बड़ अकन गीत मा सेन जी के अहम योगदान हे जेला बॉलीवुड कभू नई भुला सके।
सुदूर जंगल नारायण पुर के एक छोटे गाँव के लइका(चेंदरू मंडावी) जेला सब टाइगर बॉय के नाम ले जानथे वो तो हॉलीवुड फिलिम मा घलो काम करिन।
आज जब नवा जमाना के दौर मा गाँव अउ शहर के बीच थोरको फासला नइहे, संचार क्रांति और सोसल मीडिया के रोल चरम में हे, ऑडिशन, पइसा अउ पहुँच बढ़ गे हे, अइसन मा प्रतिभावान अउ समर्थ हस्ती मन के बॉलीवुड मा एंट्री सहज हे। आज छत्तीसगढ़ के कई कोरी कलाकार मन बॉलीवुड मा बरोबर छाए हवै। फेर नेव के पथरा ला जानना जरूरी हे, काबर कि छत, सज्जा, सजावट तो दिखबे करथे। फेर चाहे नवा होय या फेर जुन्ना सबे के योगदान ला सराहे जाथे। आज के समय के अभिनेता, अभिनेत्री,गीतकार, संगीतकार,निर्मात्रा निर्देशक आदि सबो के नाम गिना पाना सम्भव तको नइहे। तभो कुछ नाम प्रस्तुत हे---
*ओंकारदास दास मानिकपुरी*-
छत्तीसगढ़ के रगरग मा बसे गीत *चोला माटी के हे राम* ला गावत पिपलीलाइव फिलिम मा मानिकपुरी जी नत्था बनके छत्तीसगढिया मनके दिल ला जीत लिन। ये फिलिम मा मानिकपुरी जी के छत्तीसगढिया अंदाज निराला हे। राहगीर, पिज़्जा, गांव,न्यूटन,विधायक,भारत की बेटी,सफाई बाज,बंपर ड्रा, मुन्ना मांगे मेमसाबी, इब्न बतूता,अब होगा धरना प्रदर्शन असीमित,रोमिया देशी जुलियड जइसे अउ कतको फिलिम मा ओंकारदास मानिकपुरी जी अपन उत्कृष्ट अभिनय के प्रदर्शन करे हे, अउ लगातार फिलिम मा अपन योगदान देवत हे। थियेटर ले चालू होय सफर आज बॉलीवुड के बड़े बड़े फिलिम तक पहुँच गे हे।
*आशीष गंजीर*-
असिस्टेंट डायरेक्टर के रूप मा बॉलीवुड मा एंट्री करइया आशीष जी कोनो परिचय के मोहताज नइहे। गंजीर जी के अदाकारी अउ निर्देशन मा बने कुछ फिलिम
न्यूटन,माय फ्रेंड्स दुल्हनिया,सरवन,जिद,फ्राई डे, कैसा तिगड़म,चमनबहार,धूसरित द ग्रे,पॉइजन-2 (वेबसीरीज),
द चार्जशीट ( वेबसीरीज)
*संजय बत्रा*-
रायपुर के दुर्गा कालेज ले पढ़े बत्रा जी बॉलीवुड मा आजो बड़े पर्दा संग छोटे पर्दा मा आजो राज करत हे। इस प्यार को क्या नाम दूं, पिया रंगरेज, ज्योति, ये उन दिनों की बात है, अपहरण, बावरे, पेशवा बाजीराव जइसे सीरियल मा बत्रा जी अपन अभिनय के शानदार जादू बिखेरे हे।
*साहेबदास मानिकपुरी*
हथबंध बलौदाबाजार के अभिनेता साहेव दास मानिकपुरी बॉलीवुड के छोटे पर्दा के संग बड़े परदा मा घलो खूब वाहवाही बटोरिन,उन मन" मे आई कम इन मैडम" अउ जीजा जी छत पे है जइसे हास्य सीरियल के संगे संग मर्दानी, ब्लैक मनी, हल्ला बोल, फैमिली,प्यार में थोड़ा ट्विस्ट, लव यू पप्पू जइसे फिलिम मन मा भी काम करिन।
*अनुराग बसु*
भिलाई मा जनम धरे अनुराग बसु निर्माता निर्देशक पटकथा लेखक अउ अभिनेता के रूप मा बॉलीवुड मा स्थापित हे, बसु जी 1995 मा जोशीला फिलिम ले अपन कैरियर के शुरुवात करिस। उंखर कतको फिलिम दर्शक मन ला खूब भाथे,जेमा बर्फी,गैंगस्टर, जग्गा जासूस, काइट्स,लूडो, तुम सा नही देखा,बदमाश, लाइफ इन अ मेट्रो मुख्य हे।
*भगवान तिवारी*
अम्बिकापुर जिला के अभिनेता अउ निर्देशक भगवान तिवारी बॉलीवुड मा कतको फिलिम बनाइस अउ ओमा काम घलो करिस, जइसे- फिलिम चलो चलें,रणभूमि, स्पेशल 26, चार, फ्लैट, वंस अगेन, कबाड़ द क्वाइन, 21 तारीख, कोर्ट मार्शल, 21 तोपो की, बाबूमोशाय बंदूकबाज, चमन बहार, मसान, वेडनेसडे,तेवर।
*सौरभ गुप्ता अउ वैभव सिंह*
दूनो अंबिकापुर के युवा संगीतकार मन मिलके बॉलीवुड के फिलिम सोनू के टीटू की स्वीटी मा उम्दा संगीत दिन ठौ आइफा अवार्ड घलो जितिन।
*सत्यजीत दुबे*
बिलासपुर के सत्यजीत दुबे जी ला मुंबई डायरी, बेस्ट सेलर, कैरी ऑन कूटन, महाराजा जी जय हो, प्रस्थानम, लक लक की बात ,लव बाइटस, टॉयलेट, हर्षित, ऑलवेज कभी कभी, बांके की क्रेजी बारात आदि फिलिम मा देखे जा सकथे।
*पूजा साहू*
छोटा परदा के पसंदीदा सीरियल "थपकी प्यार की" मा छोटी बहू के किरदार मा पूजा साहू गजब नाम कमाइन, एखर आलावा नृत्य मा घलो योगदान पूजा साहू के हे।
*संदीप श्रीवास्तव*
बतौर एक्टर,निर्माता,निर्देशक अउ पटकथा लेखक के रूप मा श्रीवास्तव जी शेरशाह सीरियल अउ काबुल एक्सप्रेस जइसे फिलिम मा अहम योगदान प्रदान करे हे।
मुस्कान लालवानी, मारकोश, शगुन सिंह अविनाश मिश्रा,ऐश्वर्या राज भाकुनी,मुकुल जैन जइसे अउ कतको हस्ती, बालीवुड ला बरोबर समय देवत हे। हमर राज के मुख्यमंत्री माननीय भूपेश बघेल जी घलो मछुवारा मन ऊपर बने फिलिम मेरा संघर्ष मा सीएम के भूमिका निभाये हे। आज छालीवुड अउ बॉलीवुड दूनो एके संग कदम मिलाके चलत हे, पहली घलो गायिका,गायिका,निर्मात्रा, निर्देशक,गीतकार,संगीतकार मनके दूनो कोती योगदान रिहिस,अउ आजो घलो एक दूसर के सहयोग ले बॉलीवुड अउ छालीवुड लगातार चलत हे।
जीतेंन्द्र वर्मा"खैरझिटिया"
बाल्को, कोरबा(छग)
No comments:
Post a Comment