ममा गांव अऊ मोर गर्मी के छुट्टी -गीता साहू

 ममा गांव अऊ मोर गर्मी के छुट्टी -गीता साहू

छत्तीसगढ़ मां शिवनाथ अऊ पैरी नदी जे कना मिलथे, ऊंहा ले मोर ममा गांव तीरेच म ही हावे । बाढ़ -पुरा ल देखे मोर ममा- परिवार मा सुमित्रा, लक्ष्मण ,शंभू ,शाम के संग म अयोध्या ह घलो नांव के रुप म सुघ्घर धराय हवे । जइसन नांव वइसन गुण ला समोय नियम धरम अऊ मेहनत के संग आगू बढ़े मोर ममा- परिवार के नांव घलो पहिली ले बड़ बाढ़िस हे । बेरा मा कोन्हों काम ला कइसे सकेलना हे ऐला हमर ममा परिवार म सीखे ला मिलथे । ऊंकर बइठई -उठई ला छोड़ दे ,खवई -पीयई अऊ संझा पाठ तक ह बेरा मा होय ।  जिंहां संझा पाठ म बईठना सब ला  जरूरी रहे, वहीं खाय के बेरा गोठियाना एकदम मना रहीस हे । लीम के दातुन करे  हमर नाना -नानी ला खाए पिए में आखिरी बेरा तक कुछू समस्या नई आईस ।भाई बहिनी में सब ले नान्हे  मैं , तभो ले अपन नाना नानी ला जानथव ,काबर कि उमन सौ बछर  ले जादा जिये -जिये हे, उपर ले दुनो परिवार के अवइ- जवइ लगे रहे त, सबो सुरता ह अइसे हे ,जइसे अभी अभी के बात आय । 

          गर्मी के छुट्टी बिताए बर ममा गांव हमन कभू कभार ही गे हन ,फेर अइसे अवई-जवई ह हरदम लगे रहे , काबर कि दू चार साल ल छोड़ के बाकी सबो पढ़ई ह नांदगांव म ही होय हे , अऊ इंहा ले मोर ममा गांव ह कोई आठ दस किमी ही होही  ,ममा के बेटा मन ह भी पढ़े बर रोज  नांदगांव आय -जाय । हमर घर ह चौके ऊपर रहिस हे ,तेकर सती मेल मिलाप भी कुछ जादा ही रहिस हे ।

                गांव वाले दर्जी ममा के पांच झन बेटाच बेटा रहीस हे।हर राखी म ममा मन के राखी संग म मोरो राखी सबो भैया मन बर तिहार के पहिली पहुचावो ।  कोई चौदस पुन्नी के दिन होगे त राखी ल बांध के घलो आय -आय हो ,या फेर कभू -कभु कोई भैया ह राखी म हमर गांव घलो आ जाए ,पर ऐ सब बीते दिन के बात आए पर ऐ अइसन सोनहा तिहार आय जेमे मोर भैया मन के संग मे ईहु भैया मन के मया के सुगंध ह भरे हवय ।

        जइसे इंहा सबे अपन ममा -मामी बर भगवान के दरजा रखथे वइसने एकर अनुभूति अंतस  म हमू ल  कभू -कभू होय हे। सुरता आथे मृत्यु -शय्या म पड़े अपन एक झन ममा के ,जेन वो हालात मे भी मोर गोड़ ल अपन खटिया म रखवा के अपन नियम धरम के पालन करे रहीस, सिहर जथो आज भी ,कि कोई अइसे -कइसे भगवान हो जथे । अपन से कतको नान्हे के पाँव परई  संग म गोंड धो के वो पानी के पीअई ,अमृत बतावत हे । नहीं-नहीं ये परम्‍परा म बदलाव जरुरी हे ।बहिनी के लइका  भी लइका ए , मानथो बहिनी आने बड़ मयारु ,अऊ ओकर लइका आने मयारु के मयारु आये  ,ओला मयाच बर राखो मयाच बर राखो , रिश्ता कोन्हो होय अपन ले नान्हे के पांव परई  एको कनिक शोभा नइ पाय।

              इंहा हर लइका जहां अपन ममा मामी करा ले भगवान  सही  मान गौन ल पाथे तभो ले लइका मन ममा घर जाके अपने महतारी ले एक कनिक अलगा जथे । काबर कि मइके के मया म बिलराय महतारी  ल अपन पाछू ओधियाय लइका जेन ह नवां नवां मुंह कान ल देख के संशो म हे ,ओकर गोठ बात म एक कनिक हरु नई होन दे ,त  लईका के भाग म आरुग खिसिअई ह आथे , ऊपर ले ऐला देख के  ममा मन ल लगथे सही म ओकर बहिनी ल लईका बड़ पदोथे त बात-बात म कैंची मा कान ल काटे के गोठ ममा मन करे ल लगथे । मोर दरजी ममा अइसनेच रहिस हे,पर अब महतारी के संग म वहू ह  सुरता म ही समा गे हे ।  

       मोर छोटे ममा-मामी मन आज रिटायर होय के बाद भी भिलाई म रहिथे तेकर सेती उंकर मन से मुलाकात होत रहिथे ,बीएड ल इंकरे मन कर रहिके करे हंव ,त सुरता मन घलो सुघ्घर-सुघ्घर हावे। मामी जब दुलहन बन के आय रहिस हे  तब मेहा झांक के देखत केहे रेहेव कि बड़ सुन्दर हे ,पांच साल के उमर म केहे बात ,मामी  आज भी सुरता कर बताथे , अइसे -जइसे कले के बात आय ,फेर वोकर ये सुरता मोला सब ल सहराय के शिक्षा देथे अऊ सबो सुरता ल सुघ्घर बनाथे ।।प्रणाम।।

       श्रीमती गीता साहू

       17.07.2021