कुछ मजेदार सुरता प्रायमरी स्कूल के- अजय अमृतांशु,* भाटापारा

 कुछ मजेदार सुरता प्रायमरी स्कूल के- अजय अमृतांशु,* भाटापारा

1. प्राथमिक शाला म जब मैं पढ़त रहेंव तक हफ्ता मा मोला 10 पइसा मिलय, मोर एक झींन संगवारी ल 15 पइसा मिलय। अब हम दूनों मिल के 25 पइसा ला 5 दिन चलावन माने रोज के पाँच पइसा के खजानी खावन लंच ब्रेक म। 

2. पाँच पइसा म 4 उबले आलू मिल जाय जेला नमक अउ मिर्च मसाला डार के देवय वोला खाय म बड़ मजा आय।

3.  स्लेट ल पोंछे बर कई बेर हमन चिरइया फूल के तना के प्रयोग करन जेला घसरन त पानी निकलय। 

4. वो समय स्कूल ड्रेस बर हाफ पेंट अउ कुर्ता केवल एक जोड़ी नवा बछर म मिलय । पाछू साल के एक जोड़ी मिला के दू जोड़ी कपड़ा हो जावय। फेर हाफ पैंट के सिर्फ पाछू ह घसाँके चिरावय। वइसने शर्ट के केवल कंधा के ऊपर ह चिरावय बाकी साबुत रहय । तब वो पेंट कुर्ता ल फेंके म भारी अँखरय। 

5. पाँच पइसा मा अबड़ अकन अमली मिल जॉय जेला नून सँग चटकार चटकार के खावन। 

6. दस पइसा मा जबरदस्त छोले मिल जाय जेमा नीबू,प्याज,आलु ,धनिया आदि डले रहय येकर सुवाद आज तक सुरता हवय।

7. हमर ले बड़े लइका मन *खड़खड़िया* खेलावय। अउ कहय- एक कलम में खड़खड़िया शून्य मिलेगा दस कलम। लइका मन लालच म आ के खड़खड़िया खेल दँय, फेर जब कागज ल खोलन तब हमेंशा शून्य ही आवय अउ खड़खड़िया खेलाने वाला लइका ह शून्य आय हे तोला कलम नइ मिलय कहिके कलम ल धर के रेंग दय । खेलने वाला लुलवावत रे रहि जाय।

8. पाँच पइसा मा 2 ठिन चकरी मिल जाय जेन धागा म बँधे राहय । धागा ल खींचे म ये चकरी भन्ना जाय। फेर जादा रट्ठाय के फेर म चकरी टूट जाय अउ मुँह कान या हाँथ ल जोर से लगय। वो चकरी ल खाय म बड़ मजा आय

9. हमर मन के कुछ प्रसिद्ध स्लोगन रहय जेकर जादा समझ तो नइ रहिस फेर नारा लगाय म बड़ मजा आय -

(1) गुरुजी गुरुजी पट्टी दे..12 बजगे छुट्टी दे।

(2) गुरुजी गुरुजी चाम चटिया.....

(3) चार चवन्नी तेल में इंदिरा गाँधी जेल में...

10 . हमर अविस्मरणीय पाठ - 

     1/  चल रे मटके टम्मक टू...

     2/  पाँच बातें 

     3/  तीतर के दो आगे तीतर....

*अजय अमृतांशु,* भाटापारा