अंडा ( संस्मरण)*

 *अंडा ( संस्मरण)*

              मँय आरुग भाजी पाला, दार,आलू, बरी, चटनी खवइया मनखे आँव। मास, मछरी, कुकरी, बोकरा इँहा तक कि अंडा ला खवई तो दुरिहा छुवँव तको नइ। फेर भगवान कभू कभू परीछा लेथे। तीन बच्छर पहिली के सुरता आय। एक दिन मय बहनिया दस बजे अपन फटफटी मा इस्कूल जावत रहेंव। मोर आगू आगू एक ठन फटफटी जावत रहिस। वोहा कोनों गांव के दुकान वाला रहिस। अबड़ अकन झोरा गाड़ी मा दूनों पार अरोय रहय अउ पाछू मा दू सैकड़ा अंडा ला लादे रहय। सड़क मा एकक दू ठन फटफटी, कार, ट्रक घलाव आवत जावत रहय। उदुपहा आगू डहर ले एकठन सर्बिस आगे। आगू फटफटी वाला हा लकर धकर अपन फटफटी ला पाइ मा उतारिस।पछलिग्गा महूँ पाइ मा उतारेंव। सर्बिस हा बुलकिस, तेकर पाछू अब आगू फटफटी वाला अपन फटफटी ला सड़क मा चढ़ाय लगिस। कोन जनी काय होइस पाछू चक्का सड़क मा चढ़े के पहिलिच गाड़ी सुद्धा गाड़ीवाला सड़क के पाइ मा गिर के फेंकावत दू उलानबाटी खागे। मय पाछू मा रहेंव लकर धकर ब्रेक मारेंव अउ गाड़ी ला सड़केच मा तीर मा खड़ा करेंव अउ ओ मनखे ला उठाय बर गेंव। ओकर मुड़ी मा माथा करले लहू निकलत रहय। ओकर गर के पंछा ला ओकर हाथ मा धरा के माथा कर ला चपके बर कहेंव। ओकर गाड़ी डहर देखेंव ता मोर मति छरियागे। गाड़ी मा लदाय अंडा के बंधाय डोरी छूट गे रहय अउ दरजन भर ले आगर अंडा हा उही मेर कुचरा के बोहावत रहय। मय धरम संकट मा परगेंव। गाड़ी अउ अंडा ला कइसे उठावंव।गाड़ीवाला उठेबर नइ सकत रहय। सोंचेव मय अकेल्ला ओकर गाड़ी ला उठा नइ सकंव। एक डहर अंडा ला देख के मन भिरगागे। मन काहय अंडा वाला गाड़ी ला कइसे छूबे, दूसर डहर हिरदे नइ मानय काबर कि पेट्रेाल के गिरे असन सुगंध आवत रहय, गाड़ी उठाना जरुरी होगे रहय। ओतकेच बेरा एक झन साइकिल वाला भगवान बरोबर आवत दिखिस। ओला हांका मारके रोकेंव। दूनो मिलके फटफटी ला उठायेन अउ खड़ा करेंन। झोरामन ला सकेलेन। गाड़ी ला उठात बखत एक ठन अंडा मोर पनही (जूता)मा गिर के फूटगे। मोर गाड़ी मा रखाय पानी ला दुकान वाला ला पियायेन। बाँचे पानी ला मोर पनही मा रुतोएंव।दुकानवाला थोकिन सम्हलिस अउ गोठबात करे लगिस तब तक एक दू झन अउ सकलागे। सायकिल वाला हा ओकर अंडा ला कैरेट संग सकेलिस अउ फटफटी मा बांधे लगिस। ओला अस्पताल जायबर कहिके मय अपन  बस्सावत पनही संग इस्कूल गयेंव। दिन भर अंडा के बिच्छर ला सुंघे ला परगे।

हीरालाल गुरुजी "समय"

छुरा, जिला गरियाबंद