. *हमर जमाना मा.....*
अशोक जायसवाल
हमर जमाना मा... कहिके सब मनखे अपन अतित ल सुरता करत रोमाँचित हो जाथे | युवा वर्ग भविष्य ल सुरता करके प्रफुल्लित होथे | लइका मन तो वर्तमान मा जियत रइथे ते पाया के सदा खुश रइथे | आज विज्ञान के युग आय , सबो मनखे के पास ज्यादा से ज्यादा भौतिक सुख सुविधा हावय | तभो ले खिन्न पना अउ एकाकी पन हावय |
हमर समय म मनोरंजन के अइसना साधन नइ रहिसे | सुवा, कर्मा, पंथी, नाचा पेखन देख के समय पहावत रहेन | कोनो गाँव म परी वाले नाच होवत हे सुनाई परत त सइकिल म जाके रात -रात भर नाचा देखन | देवारी के पहिली नोनी मन घरो घर अउ दुकान म घलो सुवा नाचे ल जावय , फेर अब कमतिया गेहे | देवारी के बाद हमु मन राउत नाचे ल जावन, अउ परी संग म सिटी बजा बजा के ददरिया गावन तहाँ ले दोहा पारतेन | देवारी म गौरी गौरा पूजा ल उत्साह अउ सौहार्द पूर्वक मनावत रहेन, फेर आज के बेरा म तो छोटे बड़े सब मंद मउहा पीके डंगफाँद मचाथे | भाईचारा, अपनापन हा धीरे धीरे नँदावत जात हे |
जइसे बेरा करवट लिस तइसे विज्ञान ह अपन रूप बदलत गिस |नाचा पेखन के जगा विडियो, टी वी आगे वो कर बाद मोबाइल | मोबाइल ले तो मनखे मानो एक कुरिया म धँधागे | मोबाइल धरे मनखे ल बाजु म बइठे मनखे है तको नइ चिन्हय| जइसे विज्ञान ह नवा नवा संसाधन जुटाइस तइसे रोजी रोजगार घलो बाढ़ीस हे | पहिली तो काम धंधा हा कमतिच रहिसे हे | किराना दुकान म काम म लगे बर सिफारिश ले के जाय बर लगय | रोजी रोजगार नइ मिले ले बेरोजगारी के दंश झेलत कतको झन आत्महत्या घलो कर लिन | फेर अभी के समय म अइसना नइ हे, काम ज्यादा हे लेकिन कमइया नइ मिलत हे|
तइहा जमाना हा समय के चद्दर ओढ़त नवा रूप धर लेहे | छंद के छ परिवार हा साहित्य साधना में उत्कृष्ट योगदान देवत हे | पहिली तो हमन साहित्य के जानकारी बर साहित्यकार मन के पिछलग्गू राहन, अपन डायरी ल धर के सुधरवाय बर आगु पीछु घुमत राहन | काव्य गोष्ठी जायके पहिली दरी उठाय बिछाय के काम करतेन तब एको ठन कविता बोलन देतीच | फेर आज जमाना बदल गेहे , तइहा के बात बइहा लेगे, अब इहाँ सबो साहित्यकार छोटे बड़े एक मंच म आगे | सबो ल सही मंच उचित सम्मान मिलत हे| अब समय हे अपन आप ल निखारें के, लगन अउ मेहनत करेके | तब हमु मन कहिबो "हमर जमाना मा....... |
अशोक जायसवाल
धुरंधर वार्ड भाटापारा छ. ग.
साधक - सत्र 13
No comments:
Post a Comment