पुरषोत्तम महिना के महत्तम-चित्रा श्रीवास

 पुरषोत्तम महिना के महत्तम-चित्रा श्रीवास

     हमर हिंदू धरम जेला सनातन धरम कहे जाथे दुनिया के सबले जुन्ना धरम आय।हिंदू कलेन्डर मा हर तीन बछर मा एक ठन महिना हा जादा होथे जेला अधिक मास, मल मास या फेर पुरषोत्तम  मास कहे जाथे। ये महिना के अब्बड़ महत्तम हावय।महिना भर पूजा -पाठ,उपास,दान-पुन्न करे के बिधान हे।अइसन माने जाथे के ये महिना  मा करे धरम -करम  के काम हा आन महीना ले दस गुना जादा फल देथे।ये पुन्न प्रतापी महीना हा आखिर तीन साल मा काबर आथे एखरो कारन हावे-–-

              हमर कलेन्डर हा सूर्य महिना अउ चंद्र महिना के गणना  के अधार मा चलथे ।*अधिक मास हा चंद्र बछर के जादा भाग ये जेहा 32 महिना 16 दिन अउ 8 घड़ी के अंतर ले आथे*।ये महिना हा सूर्य  बछर अउ  चंद्र बछर के बीच मा संतुलन बनाये बर आथे।

•| *भारत के गणना पद्धति मा हर सूर्य बछर हा  365 दिन  6 घंटा के रहिथे।उहे चंद बछर हा 354  दिन के माने जाथे।दुनो बछर मा 11 दिन के अंतर होथे जेहा हर तीन साल मा एक महीना के बराबर होथे एहि अंतर ला पाटे बर हर तीन साल मा एक चन्द्र महीना जादाआथे जेला अधिक( जादा) होय के कारन  *अधिक मास* कहे जाथे।

*मल महीना काबर कहे जाथे*

अधिक मास होये के कारन येमा बर बिहाव , गृहप्रवेश ,यज्ञोपवीत जईसे पवित्र बुता नही करे जाए। शुभ काम नइ होय के कारण येला मलिन या फेर मल मास माने जाथे ।

*पुरुषोत्तम महीना काबर कहे गए हे*

पुराण मा कहे गय हे की हर  चंद्र मास के एक झिन देवता हवे। अधिक मास हा सूर्य अउ चन्द्रमा के बीच संतुलन बनाए बर परगट होइस ता ओखर देव बने बर कोनो देवता तियार नइ होइन ता ऋषि मुनि मन भगवान विष्णु ले बिनती बिनोइन अउ भगवान विष्णु हा ये महीना के देव बनिन तभे एला पुरुषोत्तम महीना कहे जाथे काबर की भ *भगवान विष्णु के एक नाव पुरुषोत्तम घलो हे।*

       हमर हिन्दू धरम के अनुसार सबो जीव के देह हा पंच महाभूत से बने हे। *ये पंच महाभूत पानी , आगी, आकाश , हवा अउ हमर पृथिवी* आय ये पांचो तत्व मन जीव के प्रकृति ला निर्धारित करथे। पुरुषोत्तम मास मा मनखे ध्यान योग चिंतन मनन करके अपन देह के पांचो तत्व मा संतुलन बनाए के परयास करथे।

चित्रा श्रीवास

बिलासपुर छत्तीसगढ़