भूत मन के माँग पत्र*-चोवाराम वर्मा

*भूत मन के माँग पत्र*-चोवाराम वर्मा

                    (व्यंग्य)

यमपुर म यमराज ह इतवार के दिन जनदर्शन के आयोजन करे राहय ।दू किलोमीटर ले जादा लाइन लगे रहिसे तेमा सबले पहिली भूत मन खड़े राहयँ।वोमन दू दिन पहिली ले आके लाइन लगाये रहिन हें ।उँकर पाछू जइसे सरकारी राशन दुकान म एक,दू रुपिया अउ फोकट के चाउँर बर या सहकारी बैंक म पाँच सौ के अनुदान के रुपिया ल निकाले बर या एम्स म इलाज खातिर रजिस्ट्रेशन करवाये बर जूता चप्पल ल मढ़ा के लाइन लगे रहिथें तइसने लम्बा चौड़ा लाइन लगे राहय।

         जइसने बारा बजिस ओइसने दरबार हाल के दरवाजा खुलिच तहाँ ले धक्का मुक्की चालू होगे।सिकरूटी गार्ड मन ले दे के स्थिति ल सम्हालिन ।दू झन चपरासी मन आके भूत मन के हाथ म सेनेटाइजर डारिन अउ सोशल डिस्टेंसिंग बना के चलव, मास्क ल बने लगा लव काहत भूत मन ल प्रवेश कराइन।

      दरबार म पहुँच के भूत मन यमराज जी ल मूँड़ नवाइन।

सब ले पहिली भूत मन के मुखा दर्शन के बोहनी होवत देख के यमराज जी ह थोकुन नराज होवत ,मूँह कान ल अँइठ के कहिस--बोलव तुमन कइसे आये हव?

  भूत मन के नेता भूतनाथ ह हाथ जोर के बोलिस--माँग पत्र देये ल आये हन मालिक।

  हूँ ,जा वोला मोर सेकेटरी चित्रगुप्त ल दे दे।वो ह पढ़के सुनाही।यमराज कहिस।ओतका ल सुनके भूतनाथ ह माँगपत्र ल चित्रगुप्त ल जाके दे दिस।चित्रगुप्त ह माँग पत्र ल खड़ा होके पढ़िस,जेमा लिखाय राहय।

श्रीमान यमराज जी।

  सादर प्रणाम।

 सनम्र निवेदन हे कि हमन मृत्युलोक म बहुतेच परशान हाबँन। मनखे मन अतलंग करत हें।हमर रहे बसे के जगा नइ बाँचत ये।वोमन जबरदस्ती मरघट्टी म घलो बेजा कब्जा करत हें।दू चार साल म चुनाव आथे तहाँ ले वोमन ल परमानेंट सरकारी पट्टा तको मिल जथे। नरवा कोती दस बीस परिवार राहन  तेनो ह नइ बाँचिस।सतनच्चा मन उहू ल चपल के धनहा डोली बना डरिन। तरिया के पार तको नइ बाँचत ए। 

      अमली, डूमर, गस्ती अउ सेम्हरा जइसे बड़े बड़े जुन्नहटहा पेंड़ मन म राहन तेनो खोजे नइ मिलय।बोइर के तो नामो निशान मिटागे। अब तो इँकर छै लेन ,आठ लेन के छिहीं छिहीं सड़क बनइ म जम्मो पेंड़ कटावत जात हे। कहाँ राहन तइसे होगे। हमर तो मरे बिहान हे।

   सूनसान भाँठा मन म राहन तिहों नवा नवा कालोनी अउ शहर बसत जात हे। इहाँ के रहइया मनखे मन अतका खतरनाक हें वोमन थोरको नइ डर्रावयँ। भलुक हमीं मन उँकर डर म भागे भागे फिरत हन। जंगल पहाड़ म रहिबो कहिथन त उहाँ नक्सली अउ आतंकवादी मन कब्जा जमाये बइठे हें। हमर तो मरना होगे हे।

       अतः आप ले निवेदन हे कि नीचे लिखे अनुसार हमर दू ठन  प्रमुख माँग हे तेला जल्दी से जल्दी अउ हो सके ते आजे पूरा करे के असीम कृपा करहू।--

1 हमन ल मृत्यु लोक म भटकत कई कई साल होगे हे।कई झन तो सन् 1947 के पहिली ले भटकत हें।यमलोक म नागरिकता के अधिकार हमर बहुत पहिली ले हे जेकर ले हमन वंचित हन।अतः तत्काल इहाँ के नागरिकता दे जाय।

2 हमर मन बर प्रधानमंत्री, मुख्यमंत्री अवास योजना सहीं यमराज अवास योजना के तहत स्वर्गलोक म सर्वसुविधायुक्त अलग से कालोनी बनाये जाय।

      मान्यवर ! हमला पूरा विश्वास हे कि आप हमर जायज माँग ल जरूर पूरा करहू। अउ कहूँ पूरा नइ करहू त हमन आँदोलन ,भूख हड़ताल अउ तोर दुवारी म धरना प्रदर्शन करे बर मजबूर हो जबो।तब बद्दी झन देहू।

                    प्रार्थी

                    मृत्युलोक के जम्मो भूतगण।

       इतवार-30 अगस्त2020 

        आवेदन ल पढ़के चित्रगुप्त ह बइठगे तहाँ ले यमराज ह भन्नावत कहिस--अरे भूत हो तुमन मोला आवेदन देवत हौ के धमकी देवत हौ रे। तुहँर माँग ल पूरा नइ करहूँ त काय कर लेहू। तभो ले तुमन मोर वोट बैंक सही आव तेकर सेती सहानुभूति पूर्वक बिचार करहूँ। 

   फेर एक बात साफ साफ काहत हँव-- स्वर्ग लोक म कालोनी के माँग ल तुमन भूल जव काबर कि नरक ह मृत्यु लोक के अस्पताल सही फूल होगे हे। मनमाड़े एक्सीडेंट या दारू पीके नहीं ते फाँसी लगा के ,नहीं ते कोरोना म असमय मरके  अवइया मन के मारे जगेच नइये। तेकरे सेती स्वर्ग लोक ल तको कोरनटाइन सेंटर सहीं बना दे हँव। अइसे भी सरग लोक ह जगा जगा बने खंडहर लहुटत सरकारी भवन जइसे  होगे रहिसे। अइसे भी उहाँ रहे के लाइक जीवे नइ आवत रहिसे। अब कुछ तो उपयोग होवत हे।कुल मिला के उँहो जगा नइये।

    यमराज कहिस--अउ सुनौ।ले अब जावव।लाकडाउन म मजदूर मन जइसे दुखम सुखम जींयत हें ओइसने तहूँ मन मृत्युलोक म अपन रहन बसन करौ।

    अतका ल सुनके भूत बपरा मन दुच्छा हाथ झर्रावत,आँसू ल पोंछत लहुटगें।

चोवा राम वर्मा 'बादल'

     हथबंद, छत्तीसगढ़