संस्मरण -आशा देशमुख

संस्मरण -आशा देशमुख
नवा दिशा

9 जून 2017
मोर जिनगी हर नवा मोड़ लिस।
ये दिन मोर साहित्य जिनगी में बड़े परिवार से मेल जोल होइस।
ये अइसे परिवार हे जिहाँ सुख दुख मया दया बाँटे जाथे।
अउ एखर नीव है सम्मान अउ सुम्मत।

त कहत रहेंव कि ये दिन येखर बर अविस्मरणीय होगे कि हमर छंद कक्षा के स्थापना दिवस मनाये रहेन।
जिहां राजभाषा आयोग के अध्यक्ष सहित देश प्रान्त के मूर्धन्य साहितकार मन पधारे रहिन हे।
जिंखर आघु काव्य पाठ भी सबो झन बर गौरव के बात रहिस।

जेमा 20 साधक मन पढ़े रहेन, अउ येमा दू चार झन के छोड़ सबो झन बर नवा अनुभव रहिस।
ये अइसे प्लेट फार्म बनिस कि आज कई झन हमर साधक भाई मन साहित्य के दुनिया म नाम कमावत हे अउ बड़े बड़े आयोजन में अग्रणी सूची में नाम होवत हे।
तब मोरो अनुभव बतावत हँव।
जब हमर गुरुदेव श्री अरुण निगम जी ये सूचना देइन कि 9 जून के स्थापना दिवस मनाना हे, जगह स्वरूपानन्द कालेज हे। अउ राजभाषा आयोग हर येमा भूमिका निभाइस।
तब सबो साधक सहित मोला भी अब्बड़ खुशी होइस ,काबर कि ये मोर जीवन में काव्य के पहली प्रस्तुति देना हे ,डर भी लागत रहे अउ खुशी भी होवत रहय।
अउ वो दिन आइस जेकर हम सब अगोरा करत रहेंन।
सबो साधक मन एक जगह जुरियायेन,अउ सबो के मया दुलार पाके मन हा गदगद होगे।
उही दिन हमर गुरुदेव के भी पहली दर्शन करेंन।
भले वाट्सअप म पढ़त रहेंन पर गुरु के साक्षात दर्शन के बात ही अलगे हे।
मोला एक बात अउ सिखाइस मोर गुरुदेव के कर्तव्य पाठ हा।
गुरुदेव के माताजी के देहावसान होय मात्र 3,4 दिन होय रहिस
अउ जो हमर पारम्परिक रीति अनुसार पूरा कार्यक्रम भी नइ होय रहिस,
तेकर बावजूद समय के माँग अउ सबके हित ल ध्यान रखत ये साहित्य कार्यक्रम ल रद्द नइ करिन।
कभू कभू जिनगी में अइसन समय भी आथे,अउ येला किस तरह निभाए जाथे ,ये पाठ भी सीखे बर मिलिस।
जब इँहा पहली छंद पाठ करेंव तब गुरुदेव के साथ साथ जम्मो आये पहुना मन के आशीर्वाद मिलिस।
ये मोर जीवन के अनमोल यादगार पूंजी बनके मोर हिरदे मा सुरक्षित हे।
तब से अब तक हर साधक साहित्य जगत म एक पहिचान बनावत हे।
अब अतका पोठ होगे कि कश्मीर ह् अगर कोई चीज ल केशर हरे कहिके बेचहि ,तब ओखरो गुणवत्ता ल जाँच दिही हमर साधक मन हा।
9 जून 2017 मोर अउ छंद परिवार बर नवा दिशा बनगे।
ये रद्दा म मेहनत ,सुम्मत ,खुशहाली हे।
सन 16 से पहला सत्र शुरू होय ये कक्षा ह अभी 12 सत्र तक पहुंच गए हे।
ये बहुत बड़े अउ उपलब्धि जुड़त जावत हे
नवा दिशा मा।🙏🙏🙏


आशा देशमुख
छंद साधिका  ,छंद सत्र 2 के
एनटीपीसी जमनीपाली कोरबा

🙏🙏